ئىران رەسىمىي خەۋەر ئاگېنتلىقى — ئىرنانىڭ خەۋىرىگە ئاساسلانغاندا، رايوندىكى ئىككى رەقىب دۆلەت ئوتتۇرىسىدىكى ھەربىي توقۇنۇش داۋاملىشىۋاتقان بىر پەيتتە، ئىران ئارمىيەسى ئىسرائىلىيەلىكلەرنى دۆلىتىدىن ئايرىلىشقا چاقىرىپ، يېقىن كەلگۈسىدە دۆلەتنىڭ «ياشاشقا ماس كەلمەيدىغان» جايغا ئايلىنىپ قېلىشى مۇمكىنلىكى توغرىسىدا ئاگاھلاندۇردى.
ئارمىيە باياناتچىسى رىزا سەيياد يەكشەنبە كۈنى ئىران ئىسرائىلىيەگە قارشى يېڭى بىر قېتىملىق ئۆچ ئېلىش ھۇجۇمىنى باشلىغاندىن كېيىن بايانات ئېلان قىلىپ: «كەلگۈسى كۈنلەر ئۈچۈن سىلەرگە ئاگاھلاندۇرۇش: ئىشغال قىلىنغان زېمىننى (پەلەستىن زېمىنلىرىنى) تاشلاپ كېتىڭلار، چۈنكى كەلگۈسىدە ئۇ يەر ھەرگىزمۇ ياشاشقا ماس كېلىدىغان جاي بولمايدۇ!» دېدى.
ئۇ يەنە: «يەر ئاستىدا پاناھلىنىشنىڭ ئىسرائىلىيەلىكلەرگە بىخەتەرلىك ئېلىپ كېلەلمەيدىغانلىقى» نى ئېيتىپ ئاگاھلاندۇردى.
سەيياد سۆزىنى داۋاملاشتۇرۇپ: «شۇڭلاشقا شۇنى تەكىتلەيمىزكى: جىنايەتچى ھاكىمىيەتنىڭ سىلەرنى تىرىك قالقان قىلىپ ئىشلىتىشىگە يول قويماڭلار» دېدى.
ئىران ئامېرىكا ۋە غەرب ئەللىرىنى بۇ ئىشقا ئارىلاشماسلىقنى ئېيتتى.
ئىران ئىنقىلابىي مۇھاپىزەتچىلەر قىسمىنىڭ يۇقىرى دەرىجىلىك قوماندانلىرىدىن بىرى، شۇنداقلا ئىران مەسلىھەت كېڭىشىنىڭ ئەزاسى بولغان مۇھسىن رىزائى ئايرىم بايانات بېرىپ: «بىز پۈتكۈل رايوننى مۇقىمسىزلاشتۇرىدىغان چوڭ قەدەملەرنى باسىدىغان بىر نۇقتىغا كېلىپ قېلىشىمىز مۇمكىن» دېگەنلەرنى قەيت قىلدى.
رىزائى يەنە: «ئامېرىكا ۋە ياۋروپادىكى ئەقىل-پاراسەتلىك كىشىلەر دۆلەتلىرىنى بۇ ئۇرۇشتىن تېزلىكتە چىقىرىۋېلىشى كېرەك؛ ئەگەر ئۇنداق بولمىسا، بىز ئۇلارنىڭ ئارىلىشىشىغا جاۋاب قايتۇرماي قاراپ تۇرالمايمىز» دېدى.
جۈمە كۈنى ئىسرائىلىيە ئىراندا ھەربىي ۋە يادرو ئەسلىھەلىرىنى ئۆز ئىچىگە ئالغان نۇرغۇن نۇقتىلارغا سەۋەبسىز ھاۋا ھۇجۇمى قىلغان ئىدى.
تېل ئەۋىۋنىڭ بۇ سەۋەبسىز ھۇجۇمى توقۇنۇشقا سەۋەب بولۇپ، ئىراننىڭ ئىسرائىلىيەگە قارشى ئۆچ ئېلىش ھۇجۇملىرىنى قوزغىشىنى كەلتۈرۈپ چىقاردى.
شۇنىڭدىن بۇيان ھۇجۇملار ۋە قارشى ھۇجۇملار داۋاملاشماقتا.
