تۈركىيە جۇمھۇرىيىتى تاشقى ئىشلار مىنىستىرلىقى تۈرك دۆلەتلىرى تەشكىلاتىنىڭ قۇرغۇچى ھۆججىتى بولغان ناخچىۋان كېلىشىمى ئىمزالانغانلىقىنىڭ 17 - يىللىقى مۇناسىۋىتى بىلەن، 3-ئۆكتەبىر «تۈرك دۆلەتلىرى ھەمكارلىق كۈنى» نى ئېلان قىلغان باياناتى بىلەن تەبرىكلىدى.
مىنىستىرلىقنىڭ يازما باياناتىدا، تۈرك دۆلەتلىرى تەشكىلاتىنىڭ ئورتاق تارىخ، تىل ۋە قېرىنداشلىق رىشتىدىن ئالغان كۈچى بىلەن تۈرك دۇنياسى ئوتتۇرىسىدىكى ھەمكارلىقنى سىستېمىلىق ھالەتكە كەلتۈرگەن ۋە مۇستەھكەملىگەن مۇھىم بىر سۇپىغا ئايلانغانلىقى قەيت قىلىندى.
باياناتتا يەنە تۈركىيەنىڭ 29-30-ئۆكتەبىر كۈنلىرى تۈرك دۆلەتلىرى تەشكىلاتىنىڭ 13-نۆۋەتلىك باشلىقلار يىغىنىغا ساھىبخانلىق قىلىدىغانلىقى ئەسكەرتىلىپ: «ئېلىمىزنىڭ ساھىبخانلىقىدا ئۆتكۈزۈلىدىغان 13-نۆۋەتلىك باشلىقلار يىغىنى بۇ شېرىكلىك مۇناسىۋىتىنى تېخىمۇ يۇقىرى پەللىگە كۆتۈرىدۇ» دېيىلدى.
تاشقى ئىشلار مىنىستىرلىقى تۈركىيەنىڭ تۈرك دۇنياسىنىڭ ئىنسانىي، ئىقتىسادىي ۋە ئىستراتېگىيەلىك يوشۇرۇن كۈچىنى ئورتاق پاراۋانلىققا ئايلاندۇرۇش ۋە «تۈرك ئەسىرى» نى ئىتتىپاقلىق ئىچىدە بەرپا قىلىش نىشانى بىلەن خىزمەتلىرىنى قەتئىيلىك بىلەن داۋاملاشتۇرىدىغانلىقىنى تەكىتلىدى.
