فىرانسىيە رادىئوسى (RFI) يەكشەنبە كۈنى، مالى مۇداپىئە مىنىستىرى سادىئو كامارانىڭ شەنبە كۈنى باماكو ئەتراپىدىكى كاتى ھەربىي بازىسىدىكى تۇرالغۇسىدا، ئەلقائىدەگە چېتىشلىق تېررورلۇق تەشكىلاتى جنىم JNIM تەرىپىدىن ئېلىپ بېرىلغان ھۇجۇمدا ئۆلتۈرۈلگەنلىكىنى خەۋەر قىلدى.
بىرلەشكەن دۆلەتلەر تەشكىلاتى (ب د ت) باياناتچىسى X تىكى يازمىسىدا: «مالى مىقياسىدىكى نۇرغۇن نۇقتىلاردا ئېلىپ بېرىلغان ھۇجۇملار ھەققىدىكى خەۋەرلەردىن باش كاتىپ ئەندىشە قىلماقتا. بۇ زوراۋانلىق ھەرىكەتلىرىنى قاتتىق ئەيىبلەيدۇ» دېگەن سۆزلەرنى ئىشلەتتى.
ئەلقائىدەگە چېتىشلىق تېررورلۇق تەشكىلاتى جنىم JNIM ۋە تۇئارېگلار يېتەكچىلىكىدىكى بۆلگۈنچىلەر، مالىنىڭ پايتەختى باماكو ئەتراپى بىلەن بىرگە ئالتۇن چىقىدىغان رايونلاردا ۋە دۆلەتنىڭ باشقا قىسىملىرىدا ئېلىپ بېرىلغان ماس قەدەملىك ھۇجۇملارنىڭ مەسئۇلىيىتىنى ئۈستىگە ئالدى. بۇ ھۇجۇملار ھۆكۈمەتكە قارشى داۋاملىشىۋاتقان ھۇجۇملار ئىچىدە بۈگۈنگە قەدەر ئېلىپ بېرىلغان ئەڭ جۈرئەتلىك مەشغۇلاتلارنىڭ بىرى سۈپىتىدە خاتىرىگە ئېلىندى.
تۇئارېگلار يېتەكچىلىكىدىكى بۆلگۈنچىلەر، رۇسىيە كۈچلىرىنىڭ ئۆزلىرىنىڭ كونتروللۇقىدا ئىكەنلىكىنى ئېيتقان شىمالدىكى كىدال (Kidal) شەھىرىدىن چېكىنىشىگە ئىمكانىيەت يارىتىپ بەرگەن بىر كېلىشىمنى جاكارلىدى.
رويتېرس ئاگېنتلىقىنىڭ بىر شاھىتقا مەنبە كۆرتسەتكەن خەۋىرىگە قارىغاندا، JNIM ۋە تۇئارېگلار يېتەكچىلىكىدىكى بۆلگۈنچىلەر يېقىنقى يىللاردىن بۇيانقى ئەڭ چوڭ ماس قەدەملىك ھۇجۇملارنىڭ بىرىنى ئېلىپ بارغاندىن بىر كۈن كېيىن، يەكشەنبە كۈنىمۇ ھۇجۇملار داۋاملاشقان ۋە مالىنىڭ پايتەختى ئەتراپىدىكى بىر ھەربىي قىسىم تۇرۇشلۇق شەھەردە ئوق ئاۋازلىرى ئاڭلانغان.
بىرلەشكەن دۆلەتلەر تەشكىلاتى شەنبە كۈنىدىكى كەڭ كۆلەملىك ھۇجۇملاردىن كېيىن، غەربىي ئافرىقىدىكى ساھىل رايونىدا كۈنسېرى ئېشىۋاتقان زوراۋانلىق ۋە تېررورلۇققا قارشى خەلقئارالىق ئىنكاس قايتۇرۇشقا چاقىردى.
كىدالدا ياشايدىغان بىر كىشى AFP غا: «بىر ھەربىي كارۋاننىڭ ئايرىلغانلىقىنى كۆردۇق، ئەمما نېمە ئىشلار بولغانلىقىنىڭ تەپسىلاتىنى بىلمەيمىز... قوراللىقلار ئەمدى كوچىلارنى ئىگىلىدى» دېدى.
ئۆلگەن ۋە يارىلانغانلارنىڭ ئاخىرقى سانى يەكشەنبە كۈنىمۇ يەنىلا ئېنىقلىنالمىدى.
تۇئارېگلار يېتەكچىلىكىدىكى بۆلگۈنچىلەرنىڭ ھۇجۇمدا ھۆكۈمەت كۈچلىرىدىن تارتىۋالغانلىقىنى ئىلگىرى سۈرگەن تالاش-تارتىشتىكى كىدال شەھىرىنىڭ تەقدىرىمۇ نامەلۇم ھالدا تۇرماقتا.
