رىياد ئىراننىڭ نېفىتلىككە قاراتقان يېڭى ئۇچقۇچىسىز ئايروپىلان ھۇجۇملىرىنى توسۇپ قالدى
سەئۇدى ئەرەبىستان ۋە بىرلەشمە ئەرەب ئەمىرلىكلىرى ئىراننىڭ ئىستراتېگىيەلىك ئۇل ئەسلىھەلەرگە قاراتقان ھۇجۇملىرىغا تاقابىل تۇرۇۋاتقان بىر پەيتتە، پارىس قولتۇق دۆلەتلىرى يەنىلا يۇقىرى دەرىجىلىك ھوشيارلىق ھالىتىدە تۇرماقتا.
سەئۇدى ئەرەبىستان چارشەنبە كۈنى، ئىران قولتۇقتىكى قوشنىلىرىغا ۋە ئېنېرگىيە ئۇل ئەسلىھەلىرىگە قايتىدىن ئوق چىقارغان بىر مەزگىلدە، ئىستراتېگىيەلىك بىر نېفىتلىككە قاراپ كېلىۋاتقان يەتتە دانە ئۇچقۇچىسىز ئايروپىلاندىن تەركىب تاپقان ھۇجۇم دولقۇنىنىڭ توسۇپ قېلىنغانلىقىنى خەۋەر قىلدى.
مۇداپىئە مىنىستىرلىقى X سۇپىسىدا ھەمبەھىرلىگەن ئۇچۇرىدا: «شەيبە نېفىتلىكىگە قاراپ كلىۋاتقان ئىككى ئۇچقۇچىسىز ئايروپىلاننىڭ توسۇپ قېلىنغانلىقىنى ۋە ۋەيران قىلىنغانلىقىنى» بىلدۈردى. مىنىستىرلىق ئايرىم ئۇچۇرلاردا يەنە بەش دانە ئۇچقۇچىسىز ئايروپىلاننىڭمۇ توسۇپ قېلىپ يوقىتىلغانلىقىنى ئۇقتۇردى.
شەيبە نېفىتلىكى سەئۇدى ئەرەبىستاننىڭ كەڭ كۆلەملىك نېفىت ئىشلەپچىقىرىشى جەھەتتىن ھالقىلىق ئەھمىيەتكە ئىگە بولۇپ، بىرلەشمە ئەرەب ئەمىرلىكلىرى چېگراسىغا يېقىن بىر ئورۇنغا جايلاشقان ۋە بازار قىممىتى جەھەتتىن دۇنيادىكى ئەڭ چوڭ شىركەتلەرنىڭ بىرى بولغان «سەئۇدى ئارامكو» (Saudi Aramco) تەرىپىدىن باشقۇرۇلىدۇ.
پادىشاھلىق يەنە، دۆلەتنىڭ شەرق رايونىنى ۋە 1-مارت كۈنى بىر ئامېرىكا ئەسكىرى ئوق تېگىپ يارىلىنىپ بىر ھەپتىدىن كېيىن ۋاپات بولغان شاھزادە سۇلتان ھاۋا ئارمىيە بازىسىنى نىشانلىغان ئايرىم-ئايرىم ھۇجۇملاردا يەتتە باللىستىك باشقۇرۇلىدىغان بومبىنىڭ توسۇپ قېلىنغانلىقىنى ئېلان قىلدى.
بىرلەشمە ئەرەب ئەمىرلىكلىرى چارشەنبە كۈنى ئىران مەنبەلىك يېڭى بىر باشقۇرۇلىدىغان بومبا ۋە ئۇچقۇچىسىز ئايروپىلان ھۇجۇمى مەلۇم قىلىنغانلىقىنى يەتكۈزدى. مۇداپىئە مىنىستىرلىقى نىشان ياكى ھۇجۇم قىلىنغان ئورۇن ھەققىدە تەپسىلىي مەلۇمات بەرمەي، ھاۋا مۇداپىئە سىستېمىسىنىڭ سانى ئېنىق بولمىغان بىر قىسىم باشقۇرۇلىدىغان بومبا ۋە ئۇچقۇچىسىز ئايروپىلانغا تاقابىل تۇرغانلىقىنى بىلدۈردى.
ئىران ئىسرائىلىيە ۋە ئامېرىكا بازىلىرىغا باشقۇرۇلىدىغان بومبا ھۇجۇمى باشلىدى
ئىران ئىنقىلابىي مۇھاپىزەتچىلىرى (IRGC) سەيشەنبە كۈنى تېل ئاۋىۋنى ئۆز ئىچىگە ئالغان ئىسرائىلىيە شەھەرلىرىگە ۋە رايوندىكى ئامېرىكا نىشانلىرىغا يېڭى بىر باشقۇرۇلىدىغان بومبا ھۇجۇمى دولقۇنى باشلىغانلىقىنى خەۋەر قىلدى. ئىران قوراللىق كۈچلىرى كېيىنرەك، ئىران تاراتقۇلىرى چارشەنبە كۈنى سەھەردە خەۋەر قىلغىنىدەك، بەھرەيندىكى ۋە ئىراقنىڭ شىمالىدىكى كۇرد رايونىغا جايلاشقان ئامېرىكا بازىلىرىنى نىشانلىغانلىقىنى يەتكۈزدى.
تاسنىم ئاگېنتلىقى نەقىل كەلتۈرگەن بىر باياناتقا ئاساسلانغاندا، ئىنقىلابىي مۇھاىزەتچىلەت قىسمى، بەھرەيندىكى ئامېرىكا دېڭىز ئارمىيەسى 5-فلوت بازىسىغا ۋە ئىراقنىڭ شىمالىدىكى ئۈچ باشقا ئەسلىھەگە «تۈركۈلەپ» باللىستىك باشقۇرۇلىدىغان بومبىلارنىڭ ئېتىلغانلىقىنى بىلدۈردى. ئەمەلدارلارنىڭ ئېيتىشىچە، بەھرەين ئىرانغا تەۋە ئۇچقۇچىسىز ئايروپىلان ۋە باشقۇرۇلىدىغان بومبىلارنىڭ ھۇجۇم نىشانىغا ئايلانغان. بۇ ھۇجۇملار ھازىرغىچە دۆلەتتە ئىككى كىشىنىڭ ئۆلۈشىنى كەلتۈرۈپ چىقارغان.
فارس (Fars) ۋە مېھر (Mehr) خەۋەر ئاگېنتلىقلىرىغا ئاساسلانغاندا، IRGC كېيىنرەك ئاز دېگەندە ئىككى باشقۇرۇلىدىغان بومبىنىڭ كۇۋەيتتىكى بىر ئامېرىكا بازىسىنى نىشانلىغانلىقىنى خەۋەر قىلدى. خەۋەرلەردە كۇۋەيت شەھىرىنىڭ جەنۇبىغا جايلاشقان ئارىفجان لاگېرى تىلغا ئېلىنىپ: «ئارىفجاندىكى ئامېرىكا بازىسى IRGC قۇرۇقلۇق قوشۇنى باشقۇرۇلىدىغان بومبا قىسمى تەرىپىدىن ئېتىلغان 2 بومبا بىلەن زەربىگە ئۇچرىدى» دېيىلدى. كۇۋەيت دائىرىلىرى مەزكۇر خەۋەرلەرگە قارىتا تېخىچە بايانات بەرمىگەن بولسىمۇ، دۆلەت مۇداپىئە قوشۇنى چارشەنبە كۈنى دۆلەتنى نىشانلىغان سەككىز ئۇچقۇچىسىز ئايروپىلاننىڭ ئېتىپ چۈشۈرۈلگەنلىكىنى ئېلان قىلدى.