پېرۇدا ساياھەتچىلەرنى ئېلىپ ماڭغان بىر ئايروپىلان نازكا (Nazca) شەھىرىگە يېقىن يەرگە چۈشۈپ كەتتى. يەرلىك دائىرىلەر قازادا 13 كىشىنىڭ ھاياتىدىن ئايرىلغانلىقىنى ئۇقتۇردى.

ساقچى باشلىقى خۇرگ ئاندراد (Jorge Andrade) شەنبە كۈنى ئۆلكىنىڭ جەنۇبىدىكى ۋەقە يۈز بەرگەن نەق مەيداندا مۇخبىرلارغا بەرگەن باياناتىدا: «ئۆلكىمىزدىكى ئۇچۇرلارغا قارىغاندا 11 يولۇچى بىلەن 2 ئايروپىلان خادىمى ھاياتىدىن ئايرىلغان» دېدى.

نازكا شەھەرلىك ھۆكۈمىتى فېيسبۇك ئارقىلىق ئېلان قىلغان باياناتىدا، ئايروپىلاننىڭ يۈزلىگەن يىللار ئىلگىرى پېرۇنىڭ يەرلىك ئاھالىلىرى تەرىپىدىن نازكا ئەتراپىدىكى چۆلگە سىزىلغان، ئارخېئولوگىيەلىك گېئوگلىف بېزەكلىرىدىن تەشكىل تاپقان «نازكا سىزىقلىرى» نى ساياھەت قىلدۇرۇۋاتقانلىقىنى ئەسكەرتتى.

جانسىز ھايۋانات شەكىللىرىدىن تەشكىل تاپقان بۇ سىزىقلارنى پەقەت ئايروپىلاندا ياكى يۇقىرى كۆزىتىش مۇنارلىرىدىىنلا تولۇق كۆرگىلى بولىدۇ.

نازكا شەھەرلىك ھۆكۈمىتى ئايروپىلاننىڭ يېقىندىكى ئىكا (Ica) شەھىرىدىن ئاسمانغا كۆتۈرۈلگەنلىكىنى ۋە پېرۇنىڭ Aerodiana شىركىتىگە تەۋە ئايروپىلان ئىكەنلىكىنى ئاشكارىلىدى.

شىركەتنىڭ ئىنترېنت تور بېكىتىدە كۆرسىتىلىشىچە، Cessna Grand Caravan تىپلىق ئايروپىلانلار بىلەن ئۆتكەن 14 يىلدىن بېرى نازكا سىزىقلىرى ئۈستىدە ساياھەت ئۇچۇشلىرى ئورۇنلاشتۇرۇلماقتا.

پېرۇ دائىرىلىرى ۋەقەگە قارىتا تەكشۈرۈش باشلىغانلىقىنى بىلدۈردى. Aerodiana شىركىتى بولسا بۇ ھەقتە ئېنىق بايانات ئېلان قىلمىدى.