ئامېرىكانىڭ يېتەكچىلىكىدە مىيامىدا ئۆتكۈزۈلگەن ۋە يەكشەنبە كۈنى ئاخىرلاشقان تىنچلىق سۆھبەتلىرىدىن بىرنەچچە كۈن كېيىنلا، ئۇكرائىنا ئارمىيەسى سەيشەنبە كۈنى ئەتىگەن تەرەپلەردە رۇسىيەنىڭ كىيېۋغا ھاۋا ھۇجۇمى قوزغىغانلىقىنى جاكارلىدى.
كىيېۋ ھەربىي دائىرىلىرىنىڭ ئاممىۋى ئورتاقلىشىش تور بېتى تېلېگرام سەھىپىسىدە ئېلان قىلىنغان باياناتىدا مۇنداق دېيىلدى:
«دۆلەت خەۋپسىزلىك كۈچلىرى پايتەخت سامالىرىدىكى تەھدىتنى بىر تەرەپ قىلىش ئۈچۈن خىزمەت ئىشلىمەكتە. خەلقىمىزنى جىددىي ھالەتنىڭ بىكار قىلىنغانلىقى توغرىسىدا ئۇقتۇرۇش چىقىرىلغانغا قەدەر پاناھلىنىش ئورۇنلىرىدىن ئايرىلماسلىق توغرىسىدا ئاگاھلاندۇرىمىز.»
دائىرىلەر مەزكۇر ۋەقەگە مۇناسىۋەتلىك تالاپەت ياكى زىيان-زەخمەت ھەققىدە تېخى مەلۇمات بەرمىدى، ھۇجۇمنىڭ تەپسىلىي دائىرىسىمۇ تېخى ئېنىقلانمىدى.
ۋاشىڭتون رۇسىيەنىڭ ئۇكرائىنادىكى ئۇرۇشىنى ئاخىرلاشتۇرىدىغان بىر كېلىشىم ئۈچۈن ئاساس بار-يوقلۇقىنى سىناۋاتقان بىر پەيتتە، مىيامىدىكى ھەپتە ئاخىرى سۆھبەتلىرىدە ئامېرىكا دائىرىلىرى ئۇكرائىنا ۋە ياۋروپا ۋەكىللىرى بىلەن بىر يەرگە جەم بولدى، شۇنداقلا رۇسىيە ۋەكىللىرى بىلەنمۇ ئايرىم ئالاقە قىلدى.
ئۇرۇش توختىتىش نىشان قىلىنغان مۇزاكىرىلەردە ئىجابىي نەتىجىلەر قولغا كەلتۈرۈلدى
ئۇكرائىنا پىرېزىدېنتى ۋولودىمىر زېلېنسكىي رۇسىيە بىلەن ئۇدا تەخمىنەن تۆت يىلدىن بۇيان داۋاملىشىۋاتقان ئۇرۇشنى ئاخىرلاشتۇرۇشنى نىشان قىلغان مۇزاكىرىلەردە «ھەقىقىي بىر نەتىجىگە ئېرىشىش زېمىنى ھازىرلانغانلىقى» نى بىلدۈردى.
ئۇكرائىنا دىپلوماتلىرىنىڭ بىر يىغىنىدا سۆز قىلغان زېلېنسكىي ئۇكرائىنا، ئامېرىكا ۋە ياۋروپالىق شېرىكلىرىنى ئۆز ئىچىگە ئالغان سۆھبەتلەردە مۇھىم ئىلگىرىلەشلەرنىڭ قولغا كەلتۈرۈلگەنلىكىنى تەكىتلەپ: «ھەممە نەرسە ئىنتايىن قىممەتلىك كۆرۈنۈۋاتىدۇ. بۇ يەردە مۇھىم بولغىنى، بۇنىڭ ھەم بىزنىڭ ھەم ئامېرىكا قوشما ئىشتاتلىرىنىڭ خىزمىتى بولغانلىقىدۇر. بۇ بىزنىڭ ھەقىقىي نەتىجىگە ئىنتايىن يېقىنلاشقانلىقىمىزنى كۆرسىتىدۇ» دېدى.
يۇقىرى دەرىجىلىك ئەمەلدار رۇستەم ئۇمەروۋ باشچىلىقىدىكى ئۇكرائىنا مۇزاكىرىچىلىرى ئامېرىكا ۋەكىللىرى بىلەن فىلورىدادىكى ئاخىرقى سۆھبەتلەرنىمۇ ئۆز ئىچىگە ئالغان بىر يۈرۈش مۇزاكىرىلەرنى ئېلىپ باردى.
پىرېزىدېنت ۋلادىمىر پۇتىننىڭ مەبلەغ سېلىش ئىشلىرى ۋەكىلى رۇسىيەلىك مۇزاكىرىچى كىرىل دمىترىيېۋمۇ ئوخشاش بىر جايدا ئامېرىكا دائىرىلىرى بىلەن ئايرىم سۆھبەتلەرنى ئېلىپ باردى.
ئۇكرائىنا ۋە رۇسىيە دائىرىلىرى ۋەكىللەر ئۆمەكلىرىنىڭ سۆھبەت نەتىجىسىنى مەلۇم قىلىش ئۈچۈن دۈشەنبە كۈنى دۆلەتلىرىگە قايتقانلىقىنى بىلدۈردى.
