سۈرىيە تاشقى ئىشلار مىنىستىرى ئەسەد ھەسەن شەيبانى پاكىستانغا قىلغان رەسمىي زىيارىتى جەريانىدا پەيشەنبە كۈنى يەرلىك تاراتقۇلارغا بايانات بېرىپ، تۈركىيەنى سۈرىيەنى قايتا قۇرۇشتىكى «ھالقىلىق شېرىك» دەپ تەرىپلىدى. ئۇ يەنە ئىككى دۆلەت ئوتتۇرىسىدىكى 1000 كىلومېتىردىن ئاشىدىغان چېگرا لىنىيەسى ۋە تارىخىي رىشتىنى ئالاھىدە تىلغا ئالدى.
مۇشۇ ئاينىڭ بېشىدا تۈركىيە، سەئۇدى ئەرەبىستان ۋە پاكىستان تەرىپىدىن ئىمزالانغان «مەككە ئورتاق مۇداپىئە كېلىشىمى» ھەققىدىكى سوئاللارغا جاۋاب بەرگەن شەيبانى، سۈرىيەنىڭ بۇ مۇداپىئە ئىتتىپاقىغا قوشۇلۇش–قوشۇلماسلىق توغرىسىدا تېخى بىر قارارغا كەلمىگەنلىكىنى، نۆۋەتتە بۇ مەسىلە ئۈستىدە ئىزدىنىۋاتقانلىقىنى ۋە كېيىنچە رەسمىي قارار چىقىرىدىغانلىقىنى ئېيتتى.
ئىران بىلەن بولغان ھەرقانداق ئۇچرىشىش ئېھتىماللىقى ھەققىدە توختالغان شەيبانى، بۇ دۆلەتنىڭ ھەممىدىن بۇرۇن سۈرىيە خەلقىگە قىلغان قىلمىشلىرىنى ئېتىراپ قىلىشى كېرەكلىكىنى ئوتتۇرىغا قويدى. ئۇ ئامېرىكا بىلەن ئىران ئوتتۇرىسىدىكى سۆھبەت مۇساپىسىدە پاكىستاننىڭ ئوينىغان رولىغا يۇقىرى باھا بېرىش بىلەن بىرگە، ئىسلامئابادنىڭ نۆۋەتتە سۈرىيە بىلەن ئىران ئوتتۇرىسىدا ھېچقانداق مۇرەسسەچىلىك تەكلىپى ئوتتۇرىغا قويمىغانلىقىنى مەلۇم قىلدى.
ئۆزىنىڭ پاكىستان زىيارىتىنى «مۇۋەپپەقىيەتلىك» دەپ باھالىغان شەيبانىنىڭ ئاشكارىلىشىچە، پاكىستان بىلەن سۈرىيە مىنىستىرلار دەرىجىلىك بىرلەشمە كومىتېتنى قايتا قۇرۇش، بىۋاسىتە نۆۋەتچى ئايروپىلان قاتنىشىنى ئەسلىگە كەلتۈرۈش، سودا كېڭىشى قۇرۇش ۋە مەبلەغ سېلىش مۇنبىرى ئۆتكۈزۈش قاتارلىق مەسىلىلەردە ئورتاق تونۇشقا كەلگەن.
شەيبانى ئىككى تەرەپنىڭ كۆزقاراشلىرىنىڭ بىردەك ئىكەنلىكىنى ۋە ئىككى دۆلەت مۇناسىۋىتىنى ئەڭ يۇقىرى سەۋىيەگە كۆتۈرۈشنى خالايدىغانلىقىنى تەكىتلەپ، سۈرىيەنىڭ پاكىستاندىكى دىپلوماتىك ۋەكىللىك ئورگىنىنى باش ئەلچى سەۋىيەسىگە ئۆستۈرىدىغانلىقىنى سۆزىگە قوشتى.
