ئەرمېنىيە ھۆكۈمىتى ئېلان قىلغان يېڭى پىلاندا، ئەزەربەيجان بىلەن تىنچلىقنى مۇستەھكەملەش ۋە تۈركىيە بىلەن دىپلوماتىك مۇناسىۋەت ئورنىتىش نىشان قىلىندى.
ئەرمېنىيە ھۆكۈمىتى ئېلان قىلغان يېڭى بەش يىللىق پىلاندا، ئەزەربەيجان بىلەن تىنچلىقنى مۇستەھكەملەش، تۈركىيە بىلەن دىپلوماتىك مۇناسىۋەت ئورنىتىش ۋە چېگرالارنى ئېچىش مەسىلىلىرى ئورۇن ئالدى. ئارمېنپرېس ئاگېنتلىقىنىڭ خەۋىرىگە قارىغاندا، ئىيۇن ئېيىدىكى سايلامدا غەلىبە قىلغان نىكول پاشىنيان ھۆكۈمىتىنىڭ «ھەقىقىي ئەرمېنىيە» ئۇقۇمىغا ئاساسلانغان 2026-2031-يىللىق پىلانى ئاشكارىلاندى.
پىلاندا كۆزدە تۇتۇلغان مۇھىم تاشقى سىياسەت نىشانلىرى ئارىسىدا ئەزەربەيجان بىلەن تىنچلىقنى مۇستەھكەملەش، تۈركىيە بىلەن دىپلوماتىك مۇناسىۋەت ئورنىتىش ۋە رايون دۆلەتلىرى بىلەن بولغان مۇناسىۋەتلەرنى نورماللاشتۇرۇش قاتارلىق ماددىلار بار. تاشقى سىياسەت بۆلۈمىدە ئەرمېنىيەنىڭ «تەڭپۇڭ تاشقى سىياسەت» لىنىيەسىنى داۋاملاشتۇرىدىغانلىقى توغرىسىدا سىگنال بېرىلدى. گىرۇزىيە، ئىران، تۈركىيە ۋە ئەزەربەيجان بىلەن بولغان مۇناسىۋەتلەرنى تەرەققىي قىلدۇرۇشنىڭ مۇھىملىقى ئەسكەرتىلگەن پىلاندا، باكۇ بىلەن تىنچلىق كېلىشىمى ئىمزالاش ۋە چېگرا بېكىتىش مۇساپىسىنى تاماملاشقا ئەھمىيەت بېرىلدى.
تۈركىيە بىلەن بولغان مۇناسىۋەتلەردە نورماللىشىش مۇساپىسىنى ئىلگىرى سۈرۈش، دىپلوماتىك مۇناسىۋەت ئورنىتىش، چېگرانى ئېچىش ۋە «كەم دېگەندە 2 زامانىۋى چېگرا ئېغىزىنى» ئىشقا كىرىشتۈرۈش يۆنىلىشىدە خىزمەت ئىشلەيدىغانلىقى بىلدۈرۈلدى. ئۇنىڭدىن باشقا ئەنقەرە بىلەن ئىككى تەرەپلىك ۋە كۆپ تەرەپلىك سودىنى ئىلگىرى سۈرۈش، تىرانسپورت، ئېنېرگىيە ۋە رەقەملىك ئۇل ئەسلىھە ساھەلىرىدە ھەمكارلىق ئورنىتىش نىشان قىلىنماقتا.
نىكول پاشىنيان رەھبەرلىكىدىكى پۇقرالار كېلىشىمى پارتىيەسى، ئىيۇندىكى سايلامدا %49.74 ئاۋازغا ئېرىشىپ، پارلامېنتتا كۆپ سانلىق ئورنىنى ساقلاپ قالغان ۋە ھۆكۈمەت قۇرۇش ھوقۇقىنى قولغا كەلتۈرگەن ئىدى.
