ئىراق تاشقى ئىشلار مىنىستىرلىقىنىڭ باياناتىغا قارىغاندا، تاشقى ئىشلار مىنىستىرى فۇئاد ھۈسەيىن ھۇجۇملاردىن كېيىن ئىرانلىق مەنسەپدىشى ئابباس ئاراقچى بىلەن تېلېفوندا سۆھبەتلەشكەن.
باياناتتا، ھۈسەيىننىڭ: «ئىلگىرىكى ھۇجۇملار ئىران تەرىپىدىن رايوندا ئۆكتىچى گۇرۇپپىلارنىڭ مەۋجۇتلۇقىنى سەۋەب قىلىپ ئاقلانغان ئىدى» دېگەنلىكى، ئەمما بۇ قېتىمقى ھۇجۇمدا مۇھىم نۇقتىلارنىڭ بىۋاسىتە نىشان قىلىنغانلىقىنى تەكىتلىگەنلىكى بىلدۈرۈلدى.
ھۈسەيىن: «بۇ ئەھۋال جىددىيلىكنى تېخىمۇ كۈچەيتىپ، رايوننىڭ مۇقىملىقىغا تەھدىت سالىدىغان خەتەرلىك بىر ۋەزىيەتنى پەيدا قىلىدۇ» دېگەن.
ئۇ ھۇجۇمنى ئەيىبلەپ، تېھران ھۆكۈمىتىدىن ھۇجۇم، ئۇنىڭ ئارقىسىدىكى تەرەپلەر ۋە ھۇجۇمنىڭ سەۋەبلىرى ھەققىدىكى پوزىتسىيەسىنى رەسمىي بايانات ئارقىلىق ئايدىڭلاشتۇرۇشنى تەلەپ قىلغان.
ئىران تاشقى ئىشلار مىنىستىرى ئابباس ئاراقچى بولسا، سۆھبەتتە ئىراننىڭ «جىددىيلىكنى كۈچەيتىدىغان ۋە مۇقىملىقنى بۇزىدىغان ھەر قانداق قەدەمنى رەت قىلىدىغانلىقى»نى بىلدۈرگەن. ئۇ يەنە ئىراننىڭ بۇ ۋەقەگە بولغان مەيدانىنى ئايدىڭلاشتۇرىدىغان رەسمىي بايانات ئېلان قىلىدىغانلىقىنى ئېيتقان.
ئىراق كۇرد رايونلۇق ھۆكۈمىتىنىڭ تېررورلۇققا قارشى تۇرۇش قىسمى ئېلان قىلغان يازما باياناتتا، تۈنۈگۈن شۇ جاي ۋاقتى سائەت 00:28 دە «ئىران تەرەپتىن» بومبا قاچىلانغان ئىككى دانە «Hadid-110» تىپلىق ئۇچقۇچىسىز ھاۋا ئاپپاراتى بىلەن ئەربىلنىڭ سالاھىددىن رايونىدىكى باش مىنىستىرنىڭ خۇسۇسىي ئىشخانىسى ۋە ئىستىخبارات ئورگىنى مۇدىرى تۇرۇۋاتقان جايغا ھۇجۇم قىلىنغانلىقى بىلدۈرۈلگەن.
ھۇجۇمدا ئادەم ئۆلۈش ۋەقەسى كۆرۈلمىگەن.
ئىراق كۇرد رايونلۇق ھۆكۈمىتىنىڭ باش مىنىستىرى مەسرۇر بارزانىمۇ X ئىجتىمائىي ئالاقە سۇپىسىدىكى ھېسابىدا ئېلان قىلغان باياناتىدا، بۇ ھۇجۇمنى رايوننىڭ بىخەتەرلىكى ۋە مۇقىملىقىغا قارىتىلغان بىۋاسىتە تەھدىت دەپ باھالاپ، قاتتىق ئەيىبلىگەن.
