خەلقئارا كۆچمەنلەر تەشكىلاتى (IOM) نىڭ بىلدۈرۈشىچە، كۈچىيىۋاتقان بىخەتەرلىك ئەندىشىسى سەۋەبىدىن يېقىنقى ئۈچ كۈندە جەنۇبىي ۋە شىمالىي كوردوفان ئۆلكىلىرىدىن 4000 دىن ئارتۇق پۇقرا قېچىشقا مەجبۇر بولغان.

ب د ت ئورگىنى سەيشەنبە كۈنى ئېلان قىلغان باياناتىدا، 27-دېكابىردىن 29-دېكابىرغىچە بولغان ئارىلىقتا جەنۇبىي كوردوفاندىكى ئەل كۇۋەيكتىن 1500 بىلەن 2500 ئارىسىدا؛ كادۇگلىدىن 375 ۋە دىللىڭدىن 495 كىشىنىڭ كۆچۈپ كەتكەنلىكىنى قەيت قىلدى. يۇرتلىرىدىن ئايرىلغان بۇ كىشىلەرنىڭ شىمالىي كوردوفان، جەنۇبىي كوردوفان ۋە ئاق نىل ئۆلكىلىرىدىكى تۈرلۈك بىخەتەر رايونلارغا يۆتكەلگەنلىكى بىلدۈرۈلدى.

تەشكىلات يەنە، شىمالىي كوردوفاندا بىخەتەرلىك ۋەزىيىتىنىڭ ناچارلىشىشى تۈپەيلى، جەبرەتۇششەيخ مەمۇرىي رايونىغا قاراشلىق ئۇم تاغىرات ۋە ئەلمارخا يېزىلىرىدىن 1020 كىشىنىڭ، پايتەخت خارتۇمنىڭ غەربىدىكى ئومدۇرمانغا قاچقانلىقىنى ئەسكەرتتى. تەشكىلات يەكشەنبە كۈنىمۇ ئوخشاش سەۋەبلەر تۈپەيلى ئىككى ئۆلكىدىن 1290 كىشىنىڭ يۇرتلىرىدىن ئايرىلغانلىقىنى ئېلان قىلغانىدى.

شىمالىي، غەربىي ۋە جەنۇبىي كوردوفان ئۆلكىلىرى ئارمىيە بىلەن تېز ياردەم بېرىش قىسىملىرى (RSF) ئوتتۇرىسىدا ھەپتىلەردىن بېرى داۋاملىشىۋاتقان شىددەتلىك توقۇنۇشلارغا سەھنە بولماقتا.

نۆۋەتتە سۇداننىڭ 18 ئۆلكىسى ئىچىدە، غەربتىكى دارفۇر رايونىنىڭ بەش ئۆلكىسى تولۇقى بىلەن تېز ياردەم بېرىش قىسىملىرىنىڭ كونتروللۇقىدا بولۇپ، پەقەت شىمالىي دارفۇرنىڭ قىسمەن شىمالىي رايونلىرىلا ئارمىيەنىڭ قولىدا تۇرماقتا. ھۆكۈمەت ئارمىيەسى بولسا پايتەخت خارتۇمنىمۇ ئۆز ئىچىگە ئالغان ھالدا جەنۇب، شىمال، شەرق ۋە مەركەزدىكى قالغان 13 ئۆلكىنىڭ مۇتلەق كۆپ قىسمىنى تىزگىنلىمەكتە.

سۇدان ئارمىيەسى بىلەن تېز ياردەم بېرىش قىسىملىرى ئوتتۇرىسىدا 2023-يىلى ئاپرېلدا پارتلىغان توقۇنۇش، شۇنىڭدىن بۇيان مىڭلىغان كىشىنىڭ ئۆلۈشىگە ۋە مىليونلىغان كىشىنىڭ يۇرت-ماكانلىرىدىن ئايرىلىشىغا سەۋەب بولدى.