ئامېرىكانىڭ ئىراندا ئۈچ يادرو ئەسلىھەسىگە زەربە بەرگەنلىكىنى ئىلگىرى سۈرۈشىدىن كېيىن، دۇنيا رەھبەرلىرىدىن كەلگەن نارازىلىقلار ئىسرائىلىيەنىڭ پىرېزىدېنت دونالد ترامپنىڭ قارارىنى ماختىشىدىن تارتىپ، ب د ت نىڭ جىددىيلىكنى پەسەيتىشكە چاقىرىشى ۋە بەزى دۆلەتلەرنىڭ ھۇجۇملارنى ئەيىبلىشىگىچە كۆپ خىل ئىنكاس پەيدا قىلدى.
ب د ت باش كاتىپى ئانتونىيو گۇتېررېس
باش كاتىپ: «بۈگۈن ئامېرىكانىڭ ئىرانغا قارشى كۈچ ئىشلەتكەنلىكىدىن چوڭقۇر ئەندىشە قىلىماقتىمەن. بۇ، ھازىرقىدەك جىددىي ۋەزىيەتتىكى رايوندا خەتەرلىك بىر كەسكىنلىشىش ۋە خەلقئارانىڭ تىنچلىقى ھەم بىخەتەرلىكىگە بىۋاسىتە تەھدىتتۇر» دېدى.
ئۇ يەنە؛ «بۇ توقۇنۇشنىڭ پۇقرالار، رايون ۋە دۇنيا ئۈچۈن ئېغىر ئاقىۋەتلەرنى ئېلىپ كېلىش بىلەن بىرگە، تېزلىكتە كونتروللۇقتىن چىقىپ كېتىش خەۋپى كۈچەيمەكتە. مەن ئەزا دۆلەتلەرنى جىددىيچىلىكنى پەسەيتىشكە ۋە ب د ت نىزامنامىسى ھەمدە خەلقئارا قانۇننىڭ باشقا قائىدىلىرىگە ئۇيغۇن ھەرىكەت قىلىشقا چاقىرىمەن. بۇ خەتەرلىك پەيتتە، قالايمىقانچىلىق گىردابىدىن ساقلىنىش ئىنتايىن مۇھىم. ھەربىي ھەل قىلىش چارىسى يوق. ئالغا ئىلگىرىلەيدىغان بىردىنبىر يول دىپلوماتىيە، بىردىنبىر ئۈمىد بولسا تىنچلىقتۇر» دېدى.
ئىسرائىلىيە باش مىنىستىرى بېنيامىن نېتانياھۇ
نېتانياھۇ بولسا: «تەبرىكلەيمەن، پىرېزىدېنت ترامپ. ئامېرىكانىڭ غايەت زور ۋە ھەقلىق كۈچى بىلەن ئىراننىڭ يادرو ئەسلىھەلىرىنى نىشانلاش ھەققىدىكى جاسارەتلىك قارارىڭىز تارىخنى ئۆزگەرتىدۇ... تارىخ پىرېزىدېنت ترامپنىڭ دۇنيادىكى ئەڭ خەتەرلىك ھاكىمىيەتنى دۇنيادىكى ئەڭ خەتەرلىك قوراللاردىن مەھرۇم قىلىش ئۈچۈن ھەرىكەتكە ئۆتكەنلىكىنى خاتىرىلەيدۇ» دېدى.
ۋېنېزۇئېلا تاشقى ئىشلار مىنىستىرى ئىۋان گىل
ئىۋان گىل: «ۋېنېزۇئېلا ئامېرىكانىڭ ئىرانغا قارشى ھەربىي تاجاۋۇزچىلىقىنى ئەيىبلەيدۇ ۋە دۈشمەنلىكنىڭ دەرھال ئاخىرلىشىشىنى تەلەپ قىلىدۇ» دېدى.
ئۇ يەنە: «بولىۋارچى ۋېنېزۇئېلا جۇمھۇرىيىتى ئامېرىكا ئارمىيەسى تەرىپىدىن ئىسرائىلىيە دۆلىتىنىڭ تەلىپىگە بىنائەن، ئىران ئىسلام جۇمھۇرىيىتىدىكى فوردو، ناتانز ۋە ئىسفاھان قاتارلىق يادرو ئەسلىھەلىرىگە قىلىنغان بومباردىماننى قەتئىي ئەيىبلەيدۇ» دەپ قوشۇمچە قىلدى.
مېكسىكا تاشقى ئىشلار مىنىستىرلىقى
مېكسىكا تاشقى ئىشلار مىنىستىرلىقى: «مىنىستىرلىقىمىز ئوتتۇرا شەرقتىكى توقۇنۇشقا چېتىشلىق تەرەپلەر ئارىسىدا تىنچلىق ئۈچۈن دىپلوماتىك سۆھبەتنىڭ جىددىي باشلىنىشىنى مۇراجىئەت قىلىدۇ. ئاساسىي قانۇنىمىزنىڭ تاشقى سىياسەت پرىنسىپلىرىغا ۋە دۆلىتىمىزنىڭ تىنچلىقپەرۋەر مەيدانىغا ئاساسەن، رايوندا جىددىيچىلىكنى پەسەيتىش چاقىرىقىمىزنى تەكرارلايمىز. رايون دۆلەتلىرى ئارىسىدا تىنچ بىللە ياشاشنى قايتا بەرپا قىلىش ئەڭ مۇھىم ۋەزىپىمىزدۇر» دەپ تەكىتلىدى.
كۇبا دۆلەت رەئىسى مىگۇئېل دىئاز-كانېل
كۇبا دۆلەت رەئىسى: «ئامېرىكانىڭ ئىراننىڭ يادرو ئەسلىھەلىرىنى بومباردىمان قىلىشىنى قاتتىق ئەيىبلەيمىز، بۇ ئوتتۇرا شەرقتىكى توقۇنۇشنىڭ خەتەرلىك دەرىجىدە كەسكىنلىشىپ كەتكەنلىكىدىن دېرەك بېرىدۇ» دېدى ۋە: «بۇ ھۇجۇم ب د ت نىزامنامىسى ۋە خەلقئارا قانۇنغا ئېغىر دەرىجىدە خىلاپلىق قىلىش بولۇپ، ئىنسانىيەتنى قايتىش مۇمكىن بولمايدىغان كرىزىسقا دۇچار قىلماقتا» دېدى.
