مايامى سۆھبىتى ھارپىسىدا ترامپ كىيېۋنى «تېز ھەرىكەت قىلىش»قا زورلىدى
ئامېرىكا قوشما ئىشتاتلىرىنىڭ ۋاسىتىچىلىكىدىكى سۆھبەتلەر ھالقىلىق باسقۇچقا قەدەم قويغان بىر پەيتتە، ۋاشىنگتون تەرەپتە تاقەتسىزلىنىش ئالامەتلىرى كۆرۈلۈشكە باشلىدى، موسكۋا بولسا ئۆزىنىڭ قاتتىق شەرتلىرىدە چىڭ تۇرۇشنى داۋاملاشتۇرماقتا.
پىرېزىدېنت دونالد ترامپ پەيشەنبە كۈنى ئۇكرائىنانى رۇسىيە بىلەن بولغان ئۇرۇشنى ئاخىرلاشتۇرۇش ئېھتىماللىقى بار كېلىشىمنى ئىمزالاش ئۈچۈن تېز ھەرىكەت قىلىشقا چاقىردى. ئۇ يەنە، يېڭى سۆھبەت يېقىنلىشىۋاتقان پەيتتە، كېچىكىشنىڭ موسكۋانىڭ پوزىتسىيەسىنى تېخىمۇ قاتتىقلاشتۇرۇۋېتىش خەۋپى بارلىقى ئېيتىپ ئاگاھلاندۇردى.
ئاق سارايدا مۇخبىرلارغا سۆز قىلغان ترامپ، مۇزاكىرىلەرنىڭ بۇرۇلۇش نۇقتىسىغا يېقىنلاشقانلىقىنى، كىيېۋ تەرەپنىڭ جىددىي ھەرىكەتكە ئۆتۈشى كېرەكلىكىنى تەكىتلەپ: «بىرەر نەتىجە چىقىدىغاندەك تۇرىدۇ، لېكىن ئۇكرائىنانىڭ تېزراق ھەرىكەت قىلىشىنى ئۈمىد قىلىمەن. ئۇلار قانچە كۆپ ۋاقىت ئۆتكۈزۈۋەتسە، رۇسىيە پىكرىنى شۇنچە ئۆزگەرتىۋالىدۇ» دېدى.
بۇ سۆزلەر ئامېرىكا ۋە ئۇكرائىنا ئەمەلدارلىرىنىڭ مۇشۇ ھەپتە ئاخىرى مىيامى (مايامى)دا كۆرۈشۈپ ئۇرۇشنى ئاخىرلاشتۇرۇشنى مەقسەت قىلغان لايىھە تەكلىپلىرىنى مۇزاكىرە قىلىشنى پىلانلاۋاتقان بىر پەيتتە ئوتتۇرىغا چىقتى.
مىيامى سۆھبىتى باشلىنىش ئالدىدا
ئاق ساراي ئەمەلدارىنىڭ بىلدۈرۈشىچە، ئامېرىكانىڭ مەخسۇس ئەلچىسى ستىۋ ۋىتكوف بىلەن ترامپنىڭ كۈيئوغلى جارېد كۇشنېرنىڭ فلورىدادا ئۇكرائىنا مۇزاكىرىچىسى رۇستەم ئۇمەروۋ بىلەن كۆرۈشۈشى كۈتۈلمەكتە ئىكەن.
ئۇكرائىنا پىرېزىدېنتى ۋولۇدىمىر زېلېنىسكىي بۇنىڭدىن بۇرۇن كىيېۋ ئۆمىكىنىڭ جۈمە ۋە شەنبە كۈنلىرى ئامېرىكالىق مەنسەپداشلىرى بىلەن سۆھبەت ئۆتكۈزىدىغانلىقىنى دەلىللىگەنىدى.
ئامېرىكا ئەمەلدارلىرىنىڭ يەنە رۇسىيە ۋەكىللىرى بىلەنمۇ ئايرىم سۆھبەتلەرنى ئۆتكۈزۈشى كۈتۈلمەكتە. «پولىتىكو» (Politico) گېزىتىنىڭ خەۋەر قىلىشىچە، پىرېزىدېنت ۋلادىمىر پۇتىننىڭ يۇقىرى دەرىجىلىك ئىقتىساد ئەلچىسى كىرىلل دمىترىيېۋ موسكۋا ئۆمىكىنىڭ تەركىبىدە بولىدىكەن.
دىپلوماتىك جەھەتتە ئىلگىرىلەشلەر قولغا كەلتۈرۈلگەن بولسىمۇ، ھالقىلىق مەسىلىلەردە ھېچقانداق ئۆزگىرىش بولمىدى.
رۇسىيە تەرەپ ئاخىرقى تەكلىپ-لايىھەلەرگە تېخى ئاشكارا ئىنكاس قايتۇرمىغان بولسىمۇ، پۇتىن موسكۋانىڭ ئەڭ يۇقىرى چەكتىكى ھەربىي نىشانلىرىنى ئىشقا ئاشۇرۇش نىيىتىدە چىڭ تۇرىدىغانلىقىنى قايتا-قايتا تەكىتلىدى.
ۋاشىنگتون بىلەن كىيېۋ ئۇكرائىنانىڭ كەلگۈسى بىخەتەرلىك كاپالىتى مەسىلىسىدە ئىلگىرىلەش بولغانلىقىنى ئوتتۇرىغا قويدى، بىراق رۇسىيە ھەرقانداق بىر كېلىشىمنىڭ شەرتى سۈپىتىدە تەلەپ قىلىۋاتقان زېمىن ئۆتۈنۈپ بېرىش مەسىلىسىدە چوڭقۇر ئىختىلاپلار ھېلىھەم مەۋجۇت.