تۈركىيە دۆلەت بىخەتەرلىك كېڭىشى بايانات ئېلان قىلىپ: «جۇمھۇر رەئىس ئەردوغاننىڭ رىياسەتچىلىكىدە چاقىرىلغان يىغىندا، تېررورلۇقتىن خالىي تۈركىيە ۋە تېررورلۇقتىن خالىي رايون» نىشانىغا يېتىش يولىدا تاشلانغان قەدەملەر ۋە قولغا كەلتۈرۈلگەن ئىلگىرىلەشلەرنىڭ باھالانغانلىقىنى بىلدۈردى.
تۈركىيە جۇمھۇرىيىتى دۆلەت بىخەتەرلىك كېڭىشى جۇمھۇر رەئىس رەجەپ تاييىپ ئەردوغاننىڭ رىياسەتچىلىكىدە جۇمھۇر رەئىسلىك سارىيىدا يىغىن ئۆتكۈزدى.
يىغىندىن كېيىن ئېلان قىلىنغان باياناتقا قارىغاندا، كېڭەشكە پ ك ك / ك ج ك — پ ي د / ي پ گ، فەتۆ ۋە دائېش قاتارلىق تېررورلۇق تەشكىلاتلىرىنى ئۆز ئىچىگە ئالغان، مىللىي بىرلىك، ئىتتىپاقلىق ۋە دۆلەتنىڭ مەۋجۇتلۇقىغا قارىتىلغان ھەر خىل تەھدىت ۋە خەۋپلەرگە قارشى دۆلەت ئىچى ۋە سىرتىدا قەتئىيلىك بىلەن مۇۋەپپەقىيەتلىك ئېلىپ بېرىلىۋاتقان پائالىيەتلەر ھەققىدە مەلۇمات بېرىلدى. يېقىنقى خەلقئارا ئۆزگىرىشلەرمۇ مۇزاكىرە قىلىندى.
يىغىندا سۈرىيەنىڭ بىرلىكى ۋە پۈتۈنلۈكىنى مۇستەھكەملەش، دۆلەت ھوقۇقىنى پۈتۈن زېمىنىغا كېڭەيتىش ۋە بىر گەۋدىلىشىش مۇساپىسىدىكى ئىجابىي ئۆزگىرىشلەر كۆزدىن كەچۈرۈلدى. سۈرىيە خەلقىنىڭ دۆلىتىنى قايتا گۈللەندۈرۈشى ۋە خەلقئارا جەمئىيەت بىلەن بولغان ئالاقىلىرىنى كۈچەيتىشىگە بېرىلىۋاتقان ياردەمنىڭ داۋاملىشىدىغانلىقى قەيت قىلىندى.
باياناتتا ئىراقنىڭ تىنچلىقى ۋە مۇقىملىقىنىڭ پۈتكۈل رايون ئۈچۈن ھالقىلىق ئەھمىيەتكە ئىگە ئىكەنلىكى تەكىتلەندى. ئىراق ھۆكۈمىتىنىڭ دۆلەت ئىگىلىك ھوقۇقىنى پۈتۈن مەملىكەت مىقياسىدا كۈچەيتىش تىرىشچانلىقىدىن مەمنۇنلۇق ئىپادىلىنىپ، ئىراق بىلەن ئىستراتېگىيەلىك ھەمكارلىقنى ئىلگىرى سۈرۈش ئىرادىسى قايتا مۇئەييەنلەشتۈرۈلدى.
باياناتتا مۇنداق دېيىلدى:
«ئامېرىكا ۋە ئىسرائىلىيە بىلەن ئىران ئوتتۇرىسىدىكى ئۇرۇشنىڭ داۋاملىشىۋاتقان توقۇنۇشلار بىلەن خەتەرلىك ئايلانما ھالەتكە ئۆزگىرىپ، رايوندىكى ئاجىزلىقلارنى تېخىمۇ كۈچەيتىۋاتقانلىقى بىلدۈرۈلدى. تەرەپلەر سۆھبەتكە قايتىشقا ۋە دۇنياۋى ئاقىۋەتلىرى بارغانسېرى ئېغىرلىشىۋاتقان ماجىراغا خاتىمە بېرىشكە چاقىرىلدى.
ئىسرائىلىيە ھۆكۈمىتىنىڭ غەززە ۋە لىۋاندا تىنچلىق ئورنىتىش ھەققىدىكى ۋەدىلىرى ۋە مەجبۇرىيەتلىرىنى ئادا قىلماي، ھۇجۇملىرىنى داۋاملاشتۇرۇۋاتقانلىقى ئوتتۇرىغا قويۇلدى. خەلقئارا جەمئىيەت سۈرىيەنىڭ زېمىن پۈتۈنلۈكى ۋە ئىگىلىك ھوقۇقىغىمۇ دەخلى-تەرۇز قىلىپ، رايوندا مۇقىملىق ئورنىتىشقا توسقۇنلۇق قىلىشقا ئۇرۇنۇۋاتقان ئىسرائىلىيە ھۆكۈمىتىگە قارشى ئەمەلىي قەدەم تاشلاشقا چاقىرىلدى.»
يىغىندا رۇسىيە—ئۇكرائىنا ئۇرۇشىنىڭ نۆۋەتتىكى ئەھۋالى، پۇقرالار ئۇل ئەسلىھەلىرى ۋە دېڭىز قاتناش يوللىرىغا مەركەزلەشكەن ھۇجۇملارنىڭ رايون ۋە دۇنياغا كۆرسىتىۋاتقان تەسىرىمۇ مۇزاكىرە قىلىندى. كونترولسىز كەسكىنلىشىش ۋە كېڭىيىش ئالامەتلىرى ئالدىدا، تەرەپلەر ئۆزىنى تۇتۇۋېلىشقا ۋە ئۇرۇش توختىتىشقا چاقىرىلدى.
باياناتتا يەمەندە يېقىندىن بۇيان كەسكىنلىشىپ كەتكەن جىددىيچىلىكنىڭ، بولۇپمۇ قوشنا دۆلەتلەرنى ئۆز ئىچىگە ئالغان رايوندا بىخەتەرلىك خەۋپىنى ئاشۇرۇۋاتقانلىقى تەكىتلەندى. دۇنيا مۇقىملىقى ئۈچۈنمۇ مۇھىم بولغان تىنچ ۋەزىيەتنى جىددىي ئەسلىگە كەلتۈرۈش كېرەكلىكى ئەسكەرتىلدى.
