تاشقى ئىشلار مىنىستىرى خاقان فىدان پايتەخت ئەنقەرەدە زىيارەتتە بولغان بېلگىيە تاشقى ئىشلار مىنىستىرى بېرنارد كۋىنتىن بىلەن ئۆتكۈزگەن بىرلەشمە ئاخبارات ئېلان قىلىش يىغىنىدا مۇھىم باياناتلارنى بەردى.
فىدان سۈرىيەدە بەششار ئەسەد ھاكىمىيىتىنىڭ زۇلمى سەۋەبىدىن مىليونلىغان كىشىنىڭ يۇرت - ماكانلىرىدىن ئايرىلىپ قالغانلىقىنى، ئۇلارنىڭ ئىچىدە تۈركلەرمۇ بار بولۇپ، باشقا دۆلەتلەرگە كېتىشكە مەجبۇر بولغانلىقىنى ئەسكەرتتى، تۈركىيەنىڭ بۇ زۇلۇمدىن قېچىپ كەلگەنلەرنى قىلچە ئىككىلەنمەستىن باغرىغا باسقانلىقىنى قەيت قىلدى.
ئۇ، تۈركىيەنىڭ ئۆزىدىن پاناھلىق تىلىگۈچىلەرنىڭ دەردىگە دەرمان بولغانلىقىنى، سۈرىيەلىكلەرگە تىنچ-خاتىرجەم ياشىيالايدىغان مۇھىت يارىتىپ بېرىش ئۈچۈن داۋاملىق تىرىشچانلىق كۆرسىتىۋاتقانلىقلىرىنى تەكىتلەپ مۇنداق دېدى:
«بۇ يېڭى باسقۇچتا سۈرىيەدە قىيىنچىلىق ۋە ئەندىشە ئىچىدە قالغان مەيلى كۆپ سانلىق ياكى ئاز سانلىق مىللەتلەر بولسۇن، مەيلى نۇسەيرىلەر، ئەلەۋىلەر، يەزىدىلەر ياكى خىرىستىيانلار بولسۇن، كىم بولۇشىدىن قەتئىينەزەر، تۈركىيە ئۇلارنىڭمۇ باشقىلارغا ئوخشاش ھامىيسىدۇر، قوغدىغۇچىسىدۇر. بىز ئۇلارنىڭ سۈرىيەدە بالايىئاپەتكە يولۇقماسلىقى ئۈچۈن ھەر تۈرلۈك تىرىشچانلىقلارنى كۆرسىتىۋاتىمىز. سۈرىيەنىڭ يېڭى ھۆكۈمىتىمۇ بۇ جەھەتتە ئىنتايىن سەزگۈر. خۇدايىم بۇيرۇسا، ھېچقانداق ۋەقە يۈز بەرمەيدۇ، ئەمما يۈز بەرگەن تەقدىردىمۇ جۇمھۇر رەئىسىمىز ئەردوغان بۇ جەھەتتە ئىنتايىن سەزگۈر بولۇپ، پىرىنسىپى ئېنىقتۇر. كىم زۇلۇمغا ئۇچرىسا، بىز زۇلۇمغا ئۇچرىغۇچىنى باغرىمىزغا باسىمىز، ئۇلار بىلەن زىچ ھەمكارلىق ئورنىتىمىز. دەرۋەقە، بىز ئىنسانلارغا ئىنسانىيەت كىملىكى جەھەتتىن قارايمىز.»
بېلگىيە تاشقى ئىشلار مىنىستىرى كۋىنتىن سۈرىيەنىڭ مۇقىملىقىنىڭ مۇھىملىقىنى تەكىتلىدى، ھەمدە بۇ دۆلەتنى قايتا قۇرۇش ئۈچۈن يېڭى ھۆكۈمەت بىلەن بىرگە، تۈركىيەنىڭ تىرىشچانلىقلىرىنىمۇ قوللاپ-قۇۋۋەتلەيدىغانلىقلىرىنى قەيت قىلدى.
