يەرلىك تاراتقۇلارنىڭ چارشەنبە كۈنىدىكى خەۋىرىگە ئاساسلانغاندا، سۈرىيە پىرېزىدېنتى ئەھمەد شارا سۈرىيەنىڭ بىرلىكىنى قوغداشنىڭ مۇھىملىقىنى يەنە بىر قېتىم تەكىتلەپ، ھەرقانداق پارچىلىنىشنىڭ قوشنا دۆلەتلەرگە زىيان ئېلىپ كېلىدىغانلىقى ھەققىدە ئاگاھلاندۇرغان.
سۈرىيە دۆلەتلىك تېلېۋىزىيە ئىستانسىسى «ئەلئىخبارىيە» شارانىڭ نىيۇ يورکتىكى ئوتتۇرا شەرق تەتقىقات ئورنىنىڭ زىيارىتىنى قوبۇل قىلغاندا: «سۈرىيەنىڭ بىرلىكى بىزنىڭ خەۋپسىزلىك ۋە مۇقىملىق سىياسىتىمىزنىڭ مەركىزىي ئورنىدا تۇرىدۇ» دېگەنلىكىنى خەۋەر قىلدى.
شارا سۈرىيەنىڭ رايوندىكى ھالقىلىق رولىغا ئىشارەت قىلىپ: «ھەرقانداق پارچىلىنىش قوشنا دۆلەتلەرگە زىيان يەتكۈزىدۇ ۋە رايون خەۋپسىزلىكىنى بۇزىدۇ» دېدى ۋە سۆزىنى «ۋاشىنگتون سۈرىيە دېموكراتىك كۈچلىرى (س د ك (گ)) نىڭ سۈرىيە ئارمىيەسى بىلەن بىرلىشىشىگە ياردەم بېرەلەيدۇ» دەپ داۋاملاشتۇردى.
جەنۇبتىكى سۇۋەيدا ئۆلكىسىدە يۈز بەرگەن ئىلگىرىكى توقۇنۇشلارغا ئىشارەت قىلغان شارا: «بارلىق تەرەپلەرنىڭ بەزى خاتالىقلىرى بولدى. بىز كېلىشىشنى تاللىدۇق» دېدى.
سۈرىيە پىرېزىدېنتى ئىسرائىلىيە بىلەن مۇمكىن بولىدىغان بىر خەۋپسىزلىك كېلىشىمى ئۈستىدە ئورتاق تونۇش ھاسىل قىلىش ئۈچۈن دىپلوماتىك تىرىشچانلىقلارنىڭ ئېلىپ بېرىلىۋاتقانلىقىنى دەلىللەپ: «ئىسرائىلىيە بىلەن ھەرقانداق كېلىشىمدە مۇۋەپپەقىيەتكە ئېرىشىش، رايوندا تىنچلىقنىڭ كېڭىيىشى ئۈچۈن باشقا كېلىشىملەرگە زېمىن ھازىرلايدۇ» دېگەنلەرنى قەيت قىلدى.
شارا: «ئىسرائىلىيە 1974-يىلىدىكى (ئاجرىلىش) كېلىشىمىدە بەلگىلەنگەندەك خەلقئارالىق قىسىملارنىڭ ئورۇنلاشتۇرۇلۇشىنى قوبۇل قىلىشى كېرەك» دەپ كۆرسىتىپ، سۈرىيەنىڭ ئىلگىرىكى ھالىتىگە قايتىشىنىڭ ھېچكىمنىڭ مەنپەئەتىگە ئۇيغۇن كەلمەيدىغانلىقىنى بىلدۈردى.
ئۆتكەن يىلى دېكابىردا ئەسەد ھاكىمىيىتى يىقىلغاندىن كېيىن، ئىسرائىلىيە سۈرىيە تەۋەسىدىكى ھەربىي نىشانلارغا، جۈملىدىن ئۇرۇش ئايروپىلانلىرى، باشقۇرۇلىدىغان بومبا سىستېمىلىرى ۋە ھاۋا مۇداپىئە ئەسلىھەلىرىگە يۈزلىگەن قېتىم ھۇجۇم قىلدى.
ئىسرائىلىيە يەنە سۈرىيەنىڭ گولان ئېگىزلىكىدىكى ئەسكەرلەردىن خالىي تەڭپۇڭ رايوننى ئىگىلەپ، 1974-يىلى سۈرىيە بىلەن تۈزگەن ئاجرىلىش كېلىشىمىگە خىلاپلىق قىلدى.
شارا دەمەشقنىڭ بارلىق دۆلەتلەرگە ئوخشاش ئارىلىقتا تۇرۇش سىياسىتىنى داۋاملاشتۇرىدىغانلىقىنى بىلدۈرۈپ: «نىيۇ يورك زىيارىتىم سۈرىيەنىڭ خەلقئارا جەمئىيەتكە قايتىپ كەلگەنلىكىنىڭ سىمۋولى» دېدى.
سۈرىيە رەھبىرى 22-سېنتەبىر كۈنى بىرلەشكەن دۆلەتلەر تەشكىلاتى ئومۇمىي كېڭىشىدە نۇتۇق سۆزلەش ئۈچۈن نىيۇ يورکقا يېتىپ باردى. بۇ ئارقىلىق، 1967-يىلدىن بۇيان تۇنجى قېتىم بىر سۈرىيە دۆلەت رەئىسى ب د ت دا نۇتۇق سۆزلەش مەقسىتىدە بۇنداق بىر زىيارەتتە بولغان بولدى.
