گوندۇراس دۆلەتلىك سايلام كېڭىشى رەئىسى ئانا پاۋلا خالل دەسلەپكى نەتىجىلەرگە ئاساسلانغاندا، ئالدىدا ماڭغان ئىككى نامزاتنىڭ بېلەتلىرىنىڭ «تېخنىكىلىق جەھەتتىن تەڭ» ئىكەنلىكىنى ئېيتتى.
ئامېرىكا پىرېزىدېنتى دونالد ترامپ، گوندۇراستىكى سايلام ئەمەلدارلىرىنى تەنقىد قىلىپ، دۆلەتنىڭ 30-نويابىردىكى پىرېزىدېنتلىق سايلىمىنىڭ نەتىجىلىرىنى «ئۆزگەرتىشكە» ئۇرۇنغان تەقدىردە ئېغىر ئاقىۋەتلەرگە دۇچ كېلىدىغانلىقى توغرىسىدا ئاگاھلاندۇردى.
ترامپ دۈشەنبە كۈنى «Truth Social» سۇپىسىدا: «قارىغاندا گوندۇراس، پىرېزىدېنتلىق سايلىمىنىڭ نەتىجىلىرىنى ئۆزگەرتىشكە ئۇرۇنۇۋاتىدۇ. ئەگەر ئۇنداق قىلسا بەدىلى ئېغىر بولىدۇ!» دەپ ئۇچۇر ھەمبەھىرلىدى.
ترامپنىڭ بۇ سۆزلىرى دۆلەتلىك سايلام كېڭىشى رەئىسى ئانا پاۋلا خاللنىڭ سايلامنىڭ دەسلەپكى نەتىجىلىرىگە مۇناسىۋەتلىك باياناتىدىن كېيىن ئوتتۇرىغا چىقتى. خالل ئاساسىي ئىككى نامزات (ئوڭ قانات نامزاتى ناسرى ئاسفۇرا بىلەن سابىق تېلېۋىزىيە رىياسەتچىسى سالۋادور ناسراللا) نىڭ «تېخنىكىلىق بىر تەڭلىك» ھاسىل قىلغانلىقىنى ئېيتقان ئىدى.
خاللنىڭ ئېيتىشىچە، بايانات ئېلان قىلىنغان ۋاقىتتا ئاسفۇرا 515 بېلەت بىلەن ناسراللانىڭ ئالدىدا ئىدى.
ترامپ: «بېلەت ساناش جەريانى بېلەتلەرنىڭ پەقەت 47% ى سانالغاندا توختىتىلدى. كومىتېتنىڭ بېلەتلەرنى ساناپ بولۇشى مەجبۇرىيدۇر. يۈز مىڭلىغان گوندۇراسلىق بېلەتلىرىنىڭ سانىلىشىنى تەلەپ قىلىۋاتىدۇ. دېموكراتىيە غەلىبە قىلىشى كېرەك!» دەپ بايان ئېلان قىلدى.
ئۆتكەن ھەپتە ترامپ، كونسېرۋاتىپ دۆلەتلىك پارتىيە نامزاتى ئاسفۇرانى قوللايدىغانلىقىنى بىلدۈرۈش بىلەن بىرگە، سابىق دۆلەت رەئىسى خۇان ئورلاندو خېرناندېزنى ئەپۇ قىلىدىغانلىقى ھەققىدە ۋەدە بەرگەن ئىدى.
