قاتار كەڭ دائىرىلىك رايونلۇق سۆھبەتلەرنىڭ باشلىنىشىدىن بۇرۇن ھورمۇز بوغۇزىنىڭ قايتىدىن ئېچىلىشىغنى ۋە ھەربىي جىددىيچىلىكنىڭ تېخىمۇ كەسكىنلىشىپ كېتىشىنىڭ ئالدىنى ئېلىشنى ئالدىنقى خىزمەت تەرتىپىگە قويماقتا.
قاتار تاشقى ئىشلار مىنىستىرلىقى باياناتچىسى مەجىد ئەل-ئەنسارى قاتارنىڭ ئامېرىكا-ئىران ئۇرۇشىنىڭ دەرھال ئاخىرلاشتۇرۇلۇشىنى ئەمەس، «بۇ كىرىزىسىنى باسقۇچلۇق ھالدا ئاخىرلاشتۇرۇش» نى نىشان قىلغانلىقىنى ۋە بۇ ئارقىلىق كەڭ دائىرىلىك بىر رايونلۇق دىيالوگ بىلەن سىجىل بىر سىياسىي ھەل قىلىش چارىسى ئۈچۈن زېمىن ھازىرلاشنى مەقسەت قىلغانلىقىنى جەزملەشتۈردى.
ئەل-ئەنسارىCNN قانىلىغا بەرگەن باياناتىدا، دوھانىڭ بۇ توقۇنۇشنى توڭلىتىپ قويغىلى بولمايدىغانلىقىغا ئىشىنىدىغانلىقىنى ئەسكەرتىپ، تۈپ سەۋەبلەر ھەل قىلىنماي تۇرۇپلا توختىتىپ قويۇشنىڭ يېڭى بىر توقۇنۇش دولقۇنىغا يول ئېچىش خەۋپى بارلىقى ھەققىدە ئاگاھلاندۇردى.
ئەل-ئەنسارى: «بۇ كىرىزىسىنى دەرھال ئاخىرلاشتۇرۇشنىڭ ئورنىغا، باسقۇچلۇق ھالدا ھەل قىلىشىمىز كېرەك. بىزنىڭ قىلىشقا تېگىشلىك ئىشىمىز، سىجىل بىر ھەل قىلىش چارىسى ئۈچۈن توغرا سۆھبەتلەرنى ئېلىپ بارالايدىغان بىر مۇھىت يارىتىشتۇر» دېدى.
ئەل-ئەنسارى قاتارنىڭ رايوننىڭ كەسكىن توقۇنۇش چەمبىرىكى ئىچىدە قېلىشىنى خالىمايدىغانلىقىنى تەكىتلەپ: «بىر كەسكىن توقۇنۇشتىن يەنە بىر كەسكىن توقۇنۇشقا ئۆتۈشنى خالىمايمىز. بۇ توقۇنۇشنى توڭلىتىپ قويۇپ بىرنەچچە ئايدىن كېيىن يەنە شۇ ئوخشاش نۇقتىغا قايتىپ كېلىشنىمۇ خالىمايمىز» دېدى.
قاتار تاشقى ئىشلار مىنىستىرى: «ھازىر بىز قىلىۋاتقان ئىشتا ئىككى ئاساسلىق ئالدىنقى خىزمەت تەرتىپىمىز بار. بىرىنچىسى، ھورمۇز بوغۇزىنىڭ ئوچۇق بولۇشىنى ۋە ھەممىمىزگە ئورتاق يۈرگۈزۈلۈۋاتقان ئىقتىسادىي بېسىمنىڭ ئىران خەلقىنىمۇ ئۆز ئىچىگە ئالغان رايوندىكى بارلىق خەلقلەر ئۈستىدىكى تەسىرىنى يوقىتىشقا كاپالەتلىك قىلىش» دېدى.
ئەل-ئەنسارى سۆزىنى مۇنداق داۋاملاشتۇردى: «ئىككىنچى ئالدىنقى خىزمىتىمىز بولسا، رايوندىكى ئالاقىدار تەرەپلەرنىڭ سىغدۇرۇشچان بىر دىيالوگ مۇھىتى يارىتىشى ئۈچۈن يېڭى ھەربىي ھۇجۇملارنىڭ توختىتىلىشىدۇر. شۇ نۇقتىغا كەلگىنىمىزدە، دىيالوگنىڭ ئىشقا ئېشىشىغا ھەمدە بۇنىڭ پەقەت سىرتتىنلا ئەمەس، بەلكى ھەممىمىزنى ئۆز ئىچىگە ئالىدىغان دائىرىسى كەڭ بىر دىيالوگ بولۇشىغا كاپالەتلىك قىلىش ئۈچۈن، دەل ئاشۇ باسقۇچتا ھەممىمىز رايونلۇق تىرىشچانلىق كۆرسىتىشىمىز كېرەك»
