ئىران تاشقى ئىشلار مىنىستىرى ئابباس ئاراقچى جۈمە كۈنى ئوماندا ئامېرىكا بىلەن ئۆتكۈزۈلىدىغان سۆھبەتلەر ھارپىسىدا، تېھراننىڭ «ياخشى نىيەت» بىلەن دىپلوماتىيە ئېلىپ بېرىۋاتقانلىقىنى، «ۋەدىلەرنىڭ ئورۇندىلىشى كېرەكلىكى»نى بىلدۈردى.
ئابباس ئاراقچى «X»تە ھەمبەھرىلىگەن بىر ئۇچۇرىدا: «ئىران كۆزىنى يوغان ئاچقان ھەمدە ئۆتكەن يىلنىڭ ئازابىنى ئۇنتۇمىغان ھالدا دىپلوماتىيەگە كىرىشتى. بىز ياخشى نىيەت بىلەن يېقىنلىشىۋاتىمىز ۋە ھەق-ھوقۇقلىرىمىزنى قوغداش مەسىلىسىدە قەتئىيمىز» دېگەن ئىبارىلەرگە ئورۇن بەردى.
«ۋەدىلەرگە ئەمەل قىلىنىشى كېرەك» دېگەن ئاراقچى، باراۋەرلىك سالاھىيىتى، ئۆزئارا ھۆرمەت ۋە ئورتاق مەنپەئەتنىڭ «زۆرۈر ۋە مەڭگۈلۈك بىر كېلىشىمنىڭ ئاساسلىرى» ئىكەنلىكىنى تەكىتلىدى.
ۋاشىنگتون بىلەن تېھران جۈمە كۈنى ئوماندا يادرو سۆھبەتلىرى ئۆتكۈزۈشنى پىلانلىماقتا. ئامېرىكا تەرەپكە ئامېرىكا قوشما ئىشتاتلىرى پىرېزىدېنتى دونالد ترامپنىڭ كۈيئوغلى جارېد كۇشنېر بىلەن ئامېرىكا ئالاھىدە ئەلچىسى ستېۋ ۋىتكوف ۋەكىللىك قىلىدۇ.
ئىرانغا ئاراقچى رەھبەرلىكىدىكى بىر دىپلوماتىك ئۆمەك ۋەكىللىك قىلىدۇ. مەزكۇر دۆلەتنىڭ يېرىم رەسمىي تەسنىم خەۋەر ئاگېنتلىقى، ئىران تاشقى ئىشلار مىنىستىرىنىڭ سۆھبەت ئۈچۈن ئوماننىڭ پايتەختى ماسقاتقا يېتىپ بارغانلىقىنى خەۋەر قىلدى.
بۇ ھەپتىنىڭ بېشىدا گۇمانلىق دەپ قارالغان بولسىمۇ، ئاقساراي ئەمەلدارلىرىدىن بىرى ئانادولۇ خەۋەر ئاگېنتلىقىغا سۆھبەتلەرنىڭ ئۆتكۈزۈلىدىغانلىقىنى دەلىللىدى.
پىلانلانغان سۆھبەتلەر، پارس قولتۇقىدا ئامېرىكا ھەربىي كۈچلىرىنىڭ كۆپىيىشى ۋە دېكابىرنىڭ ئاخىرىدا باشلانغان ئىران نامايىشلىرىدىن كېيىن، ئامېرىكا پىرېزىدېنتى دونالد ترامپنىڭ قايتا-قايتا تەكرارلىغان ھەربىي ئارىلىشىش تەھدىتلىرى تۈپەيلىدىن ۋاشىنگتون بىلەن تېھران ئوتتۇرىسىدىكى جىددىيچىلىك كۈچەيگەن بىر مۇھىتتا ئەمەلگە ئاشماقتا.
يېقىنقى كۈنلەردە، جىددىيچىلىكنى پەسەيتىش ئۈچۈن نۇرغۇن دۆلەتلەر تېھران بىلەن ۋاشىنگتون ئوتتۇرىسىدا مۇرەسسەچىلىك تەكلىپىنى سۇندى، بولۇپمۇ تۈركىيە بۇ جەھەتتە ئاكتىپ رول ئوينىدى.
ئامېرىكا ۋە ئۇنىڭ ئىتتىپاقدىشى ئىسرائىلىيە ئىراننى يادرو قورالى ئىشلەپچىقىرىشقا ئۇرۇنۇش بىلەن ئەيىبلىمەكتە؛ تېھران بولسا، يادرو پىروگراممىسىنىڭ توك ئىشلەپچىقىرىشنى ئۆز ئىچىگە ئالغان تىنچلىقپەرۋەر نىشانلارنى يېتىشنى مەقسەت قىلىدىغانلىقىنى ئىلگىرى سۈرمەكتە.
