ئىران ھورمۇز بوغۇزى ئۈستىدە ئامېرىكا قوشما ئىشتاتلىرىغا تەۋە بىر دانە «MQ-9 Reaper» تىپلىق ئۇچقۇچىسىز ھاۋا ئاپپاراتىنى ئېتىپ چۈشۈرگەنلىكىنى بىلدۈردى.
ئىران ئىنقىلابىي مۇھاپىزەتچىلەر قىسمىنىڭ يازما باياناتىدا، ئامېرىكانىڭ بىر ئۇزۇن مۇساپىلىك ئۇچقۇچىسىز ھاۋا ئاپپاراتىنىڭ ھورمۇز بوغۇزى ئۈستىدە ئىراننىڭ زامانىۋى ھاۋا مۇداپىئە سىستېمىلىرى تەرىپىدىن ئېتىپ چۈشۈرۈلگەنلىكى بايان قىلىندى. ئامېرىكا ئارمىيەسىگە تەۋە مەزكۇر ئاپپاراتنىڭ زەربىگە ئۇچرىغاندىن كېيىن پارىس قولتۇقىغا چۈشۈپ كەتكەنلىكى ئۇقتۇرۇلدى.
ئامېرىكا تۈنۈگۈن كەچتە ھورمۇز بوغۇزىغا يېقىن لارك ئارىلىغا ئىككى قېتىم ھۇجۇم قىلغان ئىدى. ئىنقىلابىي مۇھاپىزەتچىلەر قىسمى بۇ ھۇجۇمغا قايتۇرما زەربە سۈپىتىدە، ئىيوردانىيەدىكى ئامېرىكا كۈچلىرى ئىشلىتىۋاتقان مۇۋەپپەق سالتى ۋە پادىشاھ ھۈسەيىن ھاۋا ئارمىيە بازىلىرىنى باللىستىك باشقۇرۇلىدىغان بومبىلار بىلەن ئوققا تۇتقانلىقىنى جاكارلىدى. شۇنداقلا ئەرەب بىرلەشمە خەلىپىلىكىدىكى «ئەلمىنھاد» ھاۋا ئارمىيە بازىسىدىكى ئامېرىكا ئەسكەرلىرى ۋە تىك ئۇچار ئايروپىلانلىرىنىمۇ ئونلىغان ئۇچقۇچىسىز ھاۋا ئاپپاراتلىرى بىلەن نىشان قىلغانلىقىنى بىلدۈردى.
ئىران پىرېزىدېنتى مەسئۇد پەزەشكىيان، قىرغىزىستاندا ئۆتكۈزۈلىدىغان شاڭخەي ھەمكارلىق تەشكىلاتى باشلىقلار يىغىنىغا بېرىشتىن بۇرۇن، تېھراندىكى ئايرودۇرۇمدا ئاخبارات ۋاسىتىلىرىغا بايانات بەردى. ئامېرىكانىڭ لارك ئارىلىغا قىلغان ھۇجۇمى ۋە ئىراننىڭ قايتۇرما زەربىسى ئۈستىدە توختالغان پەزەشكىيان: «بىز ئۇرۇش تەرەپدارى ئەمەس، بۇ بىزنىڭ دۇنياغا ئىزچىل ئېلان قىلىپ كەلگەن ئوچۇق - ئاشكارا سىگنالىمىزدۇر. ئەمما ھېچقانداق تاجاۋۇزچىلىق ئالدىدا سۈكۈت قىلمايمىز ۋە تاجاۋۇزچىلارغا قەتئىي جاۋاب قايتۇرىمىز» دېدى.
