جۇمھۇر رەئىس رەجەپ تاييىپ ئەردوغان جەنۇبىي ئافرىقانىڭ يوھاننېسبۇرگ شەھىرىدە ئۆتكۈزۈلگەن گ 20 دۆلەتلەر گۇرۇھى باشلىقلار يىغىنىدا رەھبەرلەرگە سۆزلىگەن نۇتقىدا، تۈركىيەنىڭ كېلەر يىلى نويابىردا ئۆتكۈزۈلىدىغان بىرلەشكەن دۆلەتلەر تەشكىلاتىنىڭ كىلىمات ئۆزگىرىشى يىغىنى COP31 گە ساھىبخانلىق قىلىشقا تەييار ئىكەنلىكىنى ئېيتتى.
ئاۋسترالىيەنىڭ ساھىبخانلىق ئىلتىماسىنى قايتۇرۇۋېلىشىدىن كېيىن، تۈركىيە كېلەر يىللىق COP31 كىلىمات باشلىقلار يىغىنىنى ئاقدېڭىز ساياھەت شەھىرى ئانتاليادا ئۆتكۈزۈشكە تەييارلىق قىلماقتا.
جۇمھۇر رەئىس ئەردوغان شەنبە كۈنى سۆزلىگەن نۇتقىدا، تۈركىيەنىڭ ئېنېرگىيە نىشانلىرىنى تەكىتلەپ، 2035-يىلغىچە قۇياش ۋە شامال ئېنېرگىيەسى سىغىمىنى تۆت ھەسسە ئاشۇرۇشنى نىشان قىلغانلىقىنى، بۇ يىل قايتا ھاسىل بولىدىغان ئېنېرگىيەنىڭ تۈركىيەنىڭ ئېنېرگىيە قۇرۇلمىسىدىكى نىسبىتىنىڭ ھازىرنىڭ ئۆزىدىلا 60% تىن ئاشقانلىقىنى بىلدۈردى.
ئەردوغان، غەززە مەسىلىسى ئۈستىدىمۇ توختىلىپ، ئۆتكەن ئاي ھاسىل قىلىنغان ئۇرۇش توختىتىش كېلىشىمىنىڭ دۇنياۋى مۇقىملىق ئۈچۈن ھاياتىي ئەھمىيەتكە ئىگە ئىكەنلىكىنى تەكىتلىدى.
ئەردوغان: «بىرلەشكەن دۆلەتلەر تەشكىلاتىنىڭ سانلىق مەلۇماتلىرىغا ئاساسلانغاندا، ئىسرائىلىيە كەلتۈرۈپ چىقارغان ۋەيرانچىلىق پەلەستىننىڭ تەرەققىيات تىرىشچانلىقلىرىنى 70 يىل ئارقىغا چېكىندۈردى» دېدى.
ئەردوغان، تۈركىيەنىڭ مەڭگۈلۈك ئۇرۇش توختىتىشنى قوللاش ۋە پەلەستىن رايونىنىڭ قايتا قۇرۇلۇشىغا ھەسسە قوشۇش ئىرادىسىنىڭ قەتئىي ئىكەنلىكىنى قوشۇمچە قىلدى.
جۇمھۇر رەئىس رەجەپ تاييىپ ئەردوغان: «ھەر ۋاقىتتىكىدەك پەلەستىن خەلقى بىلەن بىر سەپتە تۇرۇشتا ئىرادىمىز قەتئىي ۋە تەييارمىز» دېدى.
جەنۇبىي ئافرىقىنىڭ يوھاننېسبۇرگ شەھىرى، دۇنيانىڭ ئەڭ جىددىي مەسىلىلىرىنى مۇزاكىرە قىلىشنى مەقسەت قىلغان ئىككى كۈنلۈك رەھبەرلەر يىغىنىغا ساھىبخانلىق قىلماقتا.
