بېلگىيەدىكى بارلىق تۈرمىلەردە ئادەم ھەددىدىن كۆپ بولۇپ كېتىش، خادىملارنىڭ يېتىشمەسلىكى ۋە خىزمەت شارائىتلىرىغا نارازىلىق بىلدۈرۈش مەقسىتىدە 24 سائەتلىك ئىش تاشلاش ئېلىپ بېرىلدى.
ئورگان خەۋەر ئاگېنتلىقى «بېلگا» (Belga) نىڭ خەۋەر قىلىشىچە، بارلىق ئىشچىلار ئۇيۇشمىلىرىنىڭ ئورتاق چاقىرىقى بىلەن دۆلەتتىكى تۈرمىلەردە 24 سائەتلىك ئىش تاشلاش ھەرىكىتى باشلانغان.
«ACV» ئىشچىلار ئۇيۇشمىسى ۋەكىلى ئالائىن بلانكې دۆلەتتىكى تۈرمىلەردە كارىۋات بولمىغانلىقى ئۈچۈن 599 مەھبۇسنىڭ يەردە ئۇخلاشقا مەجبۇر بولغانلىقىنى، بۇ ساننىڭ ئىككى ھەپتە بۇرۇنقىغا سېلىشتۇرغاندا 125 كىشى كۆپەيگەنلىكىنى بىلدۈردى.
بلانكې، ئادەمنىڭ بەك كۆپ بولۇپ كېتىشىنىڭ تۈرمە خادىملىرى ئۈستىدە ئېغىر خىزمەت يۈكىنى، مەھبۇسلار ئارىسىدا بولسا جىددىيچىلىك ۋە تاجاۋۇزچىلىق قىلمىشلىرىنىڭ كۆپىيىشىنى كەلتۈرۈپ چىقارغانلىقىنى ئېيتتى.
بلانكې فلامان رايونىدىكى تۈرمىلەردە قوشۇمچە 285 جىددىي ئەھۋال كارىۋىتىنىڭ ئىشلىتىلگەنلىكىنى بىلدۈرۈپ، تۈرمىلەرنىڭ پىلانلانغان سىغىمىغا قايتۇرۇلۇشىنىڭ بىخەتەر ۋە ساغلام خىزمەت شارائىتلىرى نۇقتىسىدىن زۆرۈر ئىكەنلىكىنى ئېيتتى.
بلانكې پايتەخت بىريۇسسېلدىكى خارېن (Haren) تۈرمىسىدە بولسا 157 مەھبۇسنىڭ يەردە ئۇخلاۋاتقانلىقىنى مەلۇم قىلدى.
«ACOD» ئىشچىلار ئۇيۇشمىسى ۋەكىلى روببى دې كائېيمۇ بىر كىشىلىك كامېرلاردا ئىككى ياكى ئۈچ كىشىنىڭ قېلىۋاتقانلىقىغا، بەزى مەھبۇسلارنىڭ تەرەتخانىنىڭ يېنىغىلا سېلىنغان كۆرپىلەردە ئۇخلاشقا مەجبۇر بولۇۋاتقانلىقىغا ئىشارەت قىلدى.
دې كائېي، بۇ شارائىتلارنىڭ تازىلىق ۋە بىللە ياشاش جەھەتتىن ئېغىر مەسىلىلەرنى كەلتۈرۈپ چىقارغانلىقىنى قەيت قىلدى.
ئىشچىلار ئۇيۇشمىلىرى ئادەم بەك كۆپ بولۇپ كېتىش بىلەن بىرگە، خادىملارنىڭ يېتىشمەسلىكى، تۈرمە ئۇل ئەسلىھەلىرىنىڭ كونىرىشى ۋە ئىجتىمائىي كېلىشىم دائىرىسىدە مۆلچەرلەنگەن مائاش ئۆسۈشىگە ئائىت ئېنىقسىزلىقلارغىمۇ نارازىلىق بىلدۈرمەكتە.
ئىلگىرىمۇ نۇرغۇن قېتىم ئىش تاشلاشلار ئېلىپ بېرىلغان بولۇپ، ئىشچىلار ئۇيۇشمىلىرى بىلەن ئەدلىيە مىنىستىرلىقى ئوتتۇرىسىدا ئۆتكۈزۈلگەن سۆھبەتلەردىن ھېچقانداق نەتىجە چىقمىغان ئىدى.
