Alphabet شىركىتىگە تەۋە ئاممىۋى ئورتاقلىشىش مۇنبىرى بولغان YouTube، ترامپنىڭ كېڭەش بىناسىدىكى مالىمانچىلىقتىن كېيىن چەكلەنگەنلىكى سەۋەبىدىن سۇنغان ئەرز دەۋالىرىنى ھەل قىلغان ئەڭ ئاخىرقى چوڭ تېخنولوگىيە شىركىتى بولۇپ قالدى.

Alphabet شىركىتىگە تەۋە ئاممىۋى ئورتاقلىشىش مۇنبىرى بولغان YouTube، 2021-يىلى 1-ئايدىكى كېڭەش بىناسىغا بېسىپ كىرىش ۋەقەسىدىن كېيىن، سەھىپىسىنى ۋاقىتلىق توڭلىتىپ قويغانلىقى سەۋەبىدىن ئامېرىكا پىرېزىدېنتى دونالد ترامپ تەرىپىدىن سۇنۇلغان ئەرز مەسىلىسىنى ھەل قىلىش ئۈچۈن 24 مىليون 500 مىڭ دوللار تۆلەشكە قوشۇلدى.

بۇ كېلىشىم گۇگولنى، ترامپ 2021-يىلى 7-ئايدا سۇنغان ۋە كونسېرۋاتىپ قاراشلارنى قانۇنسىز بېسىقتۇرۇش بىلەن ئەيىبلىگەن ئەرزلەرنى ھەل قىلغان ئۈچ چوڭ تېخنولوگىيە شىركىتىنىڭ ئەڭ ئاخىرقىسىغا ئايلاندۇرىدۇ.

ترامپ يەنە X ۋە فېيسبۇكنىڭ ئىگىسى Meta  ۋە بۇ شىركەتلەرنىڭ يۇقىرى دەرىجىلىك باشقۇرغۇچىلىرى ئۈستىدىنمۇ سوتقا ئەرز سۇنغان ئىدى.

Meta  ۋە X بۇ يىلنىڭ باشلىرىدا كېلىشىم ھاسىل قىلىشقا قوشۇلدى. 1-ئايدا، Meta 25 مىليون دوللارلىق كېلىشىم ھاسىل قىلغان بولۇپ، بۇنىڭ ئىچىدە 22 مىليون دوللار ترامپنىڭ مىيامىدا پىلانلىغان پىرېزىدېنت كۇتۇپخانىسىنى قۇرۇش فوندىغا بېغىشلانغان ئىدى.

2-ئايدا بولسا، X تەخمىنەن 10 مىليون دوللارلىق كېلىشىم تۈزدى.

YouTube كېلىشىمىگە ئاساسەن، ترامپنىڭ ئاقسارايدا قۇرۇۋاتقان 200 مىليون دوللارلىق چوڭ زالنى مەبلەغ بىلەن تەمىنلەش ئۈچۈن قۇرۇلغان پايدا ئالمايدىغان بىر تەشكىلات بولغان «Trust for the National Mall» غا ترامپ نامىدىن 22 مىليون دوللار تۆلىنىدۇ.

ئىگىلىنىشىچە، 90 مىڭ كىۋادرات مېتىرلىق بۇ مۇئەسسەسەنىڭ ترامپنىڭ ۋەزىپە ئۆتەش مۇددىتى توشىدىغان 2029-يىلى 1-ئايدىن  بۇرۇن تاماملىنىشى مۆلچەرلەنمەكتە ئىكەن.

كېلىشىمنىڭ قالغان قىسمى، كونسېرۋاتىپ سىياسىي ھەرىكەت كونفېرانسىنىڭ قوللىغۇچىسى بولغان «ئامېرىكا كونسېرۋاتىپلار بىرلەشمىسى» ۋە ئامېرىكالىق يازغۇچى ناۋمى ۋولفنى ئۆز ئىچىگە ئالغان دەۋادىكى باشقا ئەرز سۇنغۇچىلارغا بېرىلىدىكەن.

ھەرقانداق خاتا ئىش قىلغانلىقىنى ئېتىراپ قىلمىغان YouTube، كېلىشىمنىڭ بىر قىسمى سۈپىتىدە مەھسۇلات ياكى سىياسىي بەلگىلىمىلىرىگە ئۆزگەرتىىش كىرگۈزمەيدىكەن.

ترامپنىڭ سەھىپىسى 2021-يىلى YouTube تىن پۈتۈنلەي  ئۆچۈرۈۋېتىلمىگەن بولسىمۇ، يېڭى ۋىدېيولارنى يوللاش ئىقتىدارى ۋاقىتلىق توڭلىتىپ قويۇلغان ئىدى. ئۇنىڭ سەھىپىسى 2023-يىلى قايتىدىن ئەسلىگە كەلتۈرۈلگەن ئىدى.

 بۇ دەۋالارغا كېڭەش بىناسىدىكى مالىمانچىلىقتىن كېيىن، چوڭ مۇنبەرلەرنىڭ تېخىمۇ كۆپ زوراۋانلىق خەۋپىنى باھانە قىلىپ، ترامپنىڭ سەھىپىلىرىنى چەكلەش قارارى سەۋەب بولغانىدى.

ترامپ چەكلەش قارارلىرىنىڭ سىياسىي مەقسەتلىك ئىكەنلىكىنى قايتا-قايتا ئىلگىرى سۈرگەن ئىدى.