باشلىقلار يىغىنىغا، مۇشۇ ھەپتىنىڭ باشلىرىدا غەربىي بالقان دۆلەتلىرىنى زىيارەت قىلغاندا ئىتتىپاقنىڭ كېڭىيىش ئىرادىسىنى تەكىتلىگەن ياۋروپا كېڭىشىنىڭ رەئىسى ئانتونىيو كوستا رىياسەتچىلىك قىلىدۇ.
ياۋروپا ئىتتىپاقى ۋە غەربىي بالقان دۆلەتلىرىنىڭ رەھبەرلىرى رايوننىڭ 27 ئەزادىن تەشكىل تاپقان ئىتتىپاققا قوشۇلۇش مۇساپىسىنى تېزلىتىشنى مۇزاكىرە قىلىش ئۈچۈن قاراتاغدا بىر يەرگە جەم بولدى؛ بۇ قەدەم رۇسىيە ۋە خىتاينىڭ تەسىرىگە تاقابىل تۇرۇش جەھەتتىن ناھايىتى زور ئەھمىيەتكە ئىگە.
قاراتاغنىڭ تىۋات شەھىرىدە ئۆتكۈزۈلگەن باشلىقلار يىغىنى، فىرانسىيە پىرېزىدېنتى ئېممانۇئېل ماكرون، گېرمانىيە باش مىنىستىرى فرىدرىخ مېرز، ئىتالىيە باش مىنىستىرى جورجىيا مېلونى ۋە ياۋروپا ئىتتىپاقى كومىتېتىنىڭ رەئىسى ئۇرسۇلا فون دېر لېيېننى ئۆز ئىچىگە ئالغان نۇرغۇنلىغان ياۋروپا رەھبەرلىرىنى بىر يەرگە جەم قىلدى.
2017-يىلىدىن بۇيان ناتو ئەزاسى بولغان قاراتاغ، 2028-يىلىغىچە ياۋروپا ئىتتىپاقىغا تولۇق ئەزا بولۇشنى نىشان قىلغان نامزات دۆلەتلەر ئارىسىدا ئەڭ ئالدىنقى قاتاردا تۇرماقتا.
ياۋروپا ئىتتىپاقى بۇ دۆلەتنىڭ ئەزالىق كېلىشىمى لايىھەسىنى تەييارلاش ئۈچۈن بىر خىزمەت گۇرۇپپىسى تەشكىللىدى. ئالبانىيە، بوسنىيە-گېرتسېگوۋىنا، سېربىيە، كوسوۋو ۋە شىمالىي ماكېدونىيەنى ئۆز ئىچىگە ئالغان رايوننىڭ باشقا نامزات دۆلەتلىرى بولسا مۇساپىنىڭ ئوخشىمىغان باسقۇچلىرىدا تۇرماقتا.
باشلىقلار يىغىنىغا ساھىبخانلىق قىلغان ياۋروپا كېڭىشىنىڭ رەئىسى ئانتونىيو كوستا، ئۇكرائىنا ۋە ئوتتۇرا شەرقتە كۈنسېرى كۈچىيىۋاتقان دۇنياۋى مۇقىمسىزلىق ۋە خەۋپسىزلىك مەسىلىلىرى ئالدىدا، ياۋروپا ئىتتىپاقىنىڭ كېڭىيىشىنىڭ بىر «گېئوستراتېگىيەلىك زۆرۈرىيەت» ئىكەنلىكىنى تەكىتلىدى.
مۇتەخەسسىسلەر، باشلىقلار يىغىنىنىڭ قاراتاغنىڭ ئەزالىق مۇساپىسىنى تېزلىتىدىغانلىقىنى ۋە نامزات دۆلەتلەرنىڭ ياۋروپا ئىتتىپاقىنىڭ دېموكراتىك ۋە قانۇنىي ئۆلچەملىرىگە تولۇق ئەمەل قىلىشىغا كاپالەتلىك قىلىش ئۈچۈن يېڭى مېخانىزملارنىڭ ئورنىتىلىدىغانلىقىنى بىلدۈرمەكتە.
