پاپا 14-لېئو جۇمھۇر رەئىس رەجەپ تاييىپ ئەردوغاننىڭ تەكلىپىگە بىنائەن، پەيشەنبە كۈنى تۇنجى رەسمىي چەت ئەل زىيارىتىنى باشلاش ئۈچۈن تۈركىيەگە يېتىپ كەلدى. پاپا تۈركىيەگە قەدەم بېسىشى بىلەن تەڭ دۇنياۋى تىنچلىقنىڭ مۇھىملىقىنى ئالاھىدە تەكىتلىدى ۋە مەزكۇر زىيارەتنىڭ پۈتكۈل دۇنياغا تىنچلىقنىڭ قىممىتىنى يەنە بىر قېتىم ئەسلىتىشىنى ئۈمىد قىلىدىغانلىقىنى بىلدۈردى.

پاپا ئايرودرومدا تۈركىيە مەدەنىيەت ۋە ساياھەت ئىشلىرى مىنىستىرى مەھمەت نۇرى ئەرسوي ۋە ئۇنىڭغا ھەمراھ بولغان ھۆكۈمەت ئەمەلدارلىرى تەرىپىدىن قىزغىن كۈتۈۋېلىندى.

پاپانىڭ تۈركىيە زىيارىتى جەريانىدا ئۇنىڭغا كاردىنال پىيېترو پارولىن ۋە باش ئېپىسكوپ پاۋل رىچارد گاللاگېر قاتارلىق ۋاتىكاننىڭ يۇقىرى دەرىجىلىك ئەمەلدارلىرى ھەمراھ بولماقتا.

پاپا 14-لېئو پاپالىق گېربى چۈشۈرۈلگەن «ITA Airways» ئاۋىياتسىيە شىركىتىنىڭ مەخسۇس ئايروپىلانى بىلەن كېلىپ، ئايرودۇرۇمدا ئۇنى كۈتۈۋاتقان 70 تىن ئارتۇق مۇخبىرغا سالام بەردى.

ئۇ بۇ زىيارەتنى ئەمەلگە ئاشۇرغانلىقىدىن ئىنتايىن مەمنۇن بولغانلىقىنى، بۇ سەپەرنىڭ بارلىق خىرىستىيانلار ۋە دۇنيا ئۈچۈن ئىگە بولغان ئەھمىيىتى تۈپەيلىدىن، تۈركىيەگە كېلىشنى زور ئىشتىياق بىلەن كۈتكەنلىكىنى تىلغا ئالدى.

تۈركىيە ۋە لىۋاندىكى زىيارەت كۈنتەرتىپلىرى ھەققىدە توختالغان پاپا، بۇ قېتىمقى سەپەر ئارقىلىق دۇنيادىكى ھەر بىر ئىنسان ئۈچۈن تىنچلىقنىڭ نەقەدەر مۇھىم ئىكەنلىكىنى تەكىتلەشنى مەقسەت قىلغانلىقىنى يەنە بىر قېتىم تەكرارلىدى.

پاپا دىن ۋە ئېتىقاد پەرقلىرىگە قارىماي، ئىنسانىيەتنىڭ ئورتاق رىشتىلەر ئارقىلىق بىر-بىرىگە باغلانغانلىقىنى تەكىتلەپ، پۈتۈن دۇنيانى تىنچلىق ئۈچۈن بىرلىشىشكە چاقىردى. ۋاتىكان رەھبىرى يەنە تىنچلىق ۋە دۇنياۋى بىرلىكنى ئىلگىرى سۈرىدىغان تەشەببۇسلارغا ئاكتىپ ھەسسە قوشۇشنى نىشان قىلغانلىقىنىمۇ سۆزلىرىگە ئىلاۋە قىلدى.

پاپانىڭ زىيارىتى تۈركىيە جۇمھۇرىيىتىنىڭ قۇرغۇچىسى مۇستافا كەمال ئاتاتۈركنىڭ قەبرىسى جايلاشقان ئانىتكابىردە ئۆتكۈزۈلگەن رەسمىي مۇراسىم بىلەن باشلاندى.

بۇنىڭغا ئۇلاپلا، تۈركىيە جۇمھۇرىيىتى جۇمھۇر رەئىسلىك مەھكىمىسىدە پاپا ئۈچۈن رەسمىي كۈتۈۋېلىش مۇراسىمى ئۆتكۈزۈلىدۇ. پاپا بۇ يەردە تۈركىيە جۇمھۇرىيىتى جۇمھۇر رەئىسى ئەردوغان بىلەن بىرگە تۈركىيە-ۋاتىكان مۇناسىۋەتلىرى، شۇنداقلا پەلەستىندىكى ۋەزىيەتنى ئۆز ئىچىگە ئالغان رايونلۇق ۋە خەلقئارالىق كۈنتەرتىپتىكى مۇھىم مەسىلىلەر ئۈستىدە سۆھبەتلىشىدۇ.

ئىككى رەھبەرنىڭ يەنە ئەنقەرەدىكى جۇمھۇر رەئىسلىك مىللەت كۇتۇپخانىسىنىڭ «جىھاننۇما» زالىدا مۇخبىرلارنى كۈتۈۋېلىش يىغىنى ئۆتكۈزۈشى كۈتۈلمەكتە. مەزكۇر كۇتۇپخانا دۇنيانىڭ ئۈچىنچى چوڭ كۇتۇپخانىسى دەپ تەرىپلىنىدۇ.

پاپا جۈمە كۈنى ئىستانبۇلدىكى «سېنت ئېسپىرىت» (Saint Esprit) كاتېدرالىدا خىرىستىيان دىنىي زاتلىرى بىلەن ئۇچرىشىدۇ، فىرانسىيە يوقسۇللار ساناتورىيەسىنى زىيارەت قىلىدۇ ۋە تىك ئۇچار بىلەن ئىزنىكقا بېرىپ، ئۇ يەردىكى دىنىي مۇراسىمغا قاتنىشىدۇ.

شەنبە كۈنى بولسا سۇلتان ئەھمەد جامەسى ۋە «مور ئېفرەم» سۇريانى ئورتودوكس چېركاۋىنى زىيارەت قىلىدۇ؛ ئۇ يەردە فەنەر رۇم پاترىكى بارتولومېئوس بىلەن كۆرۈشىدۇ. شۇ كۈنى پائالىيەتلەر «ۋولكسۋاگېن» (Volkswagen) مەيدانىدا ئۆتكۈزۈلىدىغان بىر مەيدان مۇراسىم بىلەن ئاياغلىشىدۇ.

پاپانىڭ تۈركىيەدىكى زىيارىتى ئەرمەن ئاپوستول كاتېدرالىدا ئاخىرقى بىر مۇراسىمنىڭ ئۆتكۈزۈلۈشى ۋە قۇرۇلۇش خاتىرە كۈنىنى تەبرىكلەش ئۈچۈن فەنەر رۇم پاترىكخانىسىغا قايتىپ كېلىشى بىلەن ئاخىرلىشىدۇ.

پاپا 27–30-نويابىر كۈنلىرى ئەنقەرە، ئىستانبۇل ۋە ئىزنىكتە زىيارەتتە بولىدۇ.