تۈركىيەنىڭ قۇرۇقلۇق ئارمىيە ماشىنىلىرى ئىشلەپچىقارغۇچىسى «كاتمەرجىلەر» شىركىتى، ئىستانبۇلدا ئۆتكۈزۈلىدىغان تۈركىيەنىڭ نوپۇزلۇق دۆلەت مۇداپىئە سانائىتى يەرمەنكىسىدە، مىناغا چىداملىق «خىزىر» ماشىنىسىنى ۋە ئۆزگىچە شوپۇرسىز قۇرۇقلۇق ئاپپاراتىنى كۆرگەزمە قىلىدىغانلىقىنى بىلدۈردى.

«كاتمەرجىلەر» شىركىتىنىڭ بىلدۈرۈشىچە، مۇشۇ ھەپتە ئىستانبۇلدا ئۆتكۈزۈلىدىغان خەلقئارا دۆلەت مۇداپىئە سانائىتى يەرمەنكىسى («IDEF 2025») جەريانىدا، يېنىك تىپتىكى  4x4  تىپلىق تاكتىكىلىق ماشىنىسى «ئەرەن» توغرىسىدا مالايشىيا بىلەن كېلىشىم ئىمزالىنىدىكەن.

«كاتمەرجىلەر» شىركىتى بۇ يىلقى «IDEF 2025» يەرمەنكىسىگە مىنا ۋە پىستىرمىدىن مۇداپىئەلىنىدىغان خادىم توشۇغۇچى «خىزىر» ناملىق ماشىنىسى؛ ھەمدە تۈركىيەدە ئۆز تۈرى بويىچە بىردىنبىر بولغان، «يىراقتىن كونترول قىلىنىدىغان قورال سۇپىسى ۋە ئىز قوغلاش سىستېمىسى (UKAP)» سەپلەنگەن «O-İKA 2» ناملىق شوپۇرسىز قۇرۇقلۇق ئاپپاراتىنىڭ ئالاھىدە نۇسخىسى بىلەن قاتنىشىدۇ.

«خىزىر»  ماشىنىسى پۇختا برونىكىسى، V شەكىللىك بىر گەۋدىلەشتۈرۈلگەن كوزۇپى ۋە ئېنېرگىيەنى سۈمۈرەلەيدىغان ئورۇندۇقلىرى سايىسىدا، مىنا ۋە قولدا ياسالغان پارتلاتقۇچلارغا قارشى ئۈنۈملۈك مۇداپىئە بىلەن تەمىنلەيدۇ. بۇ ماشىنا 400 ئات كۈچىگە ئىگە موتورى ئارقىلىق يېزا ۋە شەھەرلەردىكى كەسكىن توقۇنۇش شارائىتىدا يۇقىرى ئىقتىدارىنى نامايان قىلىدۇ. ئۇنىڭ يىراقتىن كونترول قىلىنىدىغان قورال سىستېمىسى ھەرىكەتچان نىشانلارنى قۇلۇپلاپ نىشانغا ئالالايدۇ.  «خىزىر» توققۇز نەپەر خادىم بىلەن سائىتىگە 120 كىلومېتىرلىق سۈرئەتتە يۈرەلەيدىغان بولۇپ، ئۆز ساھەسىدە ئالدىنقى قاتاردا تۇرىدىغان بولۇپ،  70% لىك يانتۇلۇقتا ماڭالايدۇ.

يەنە بىر تەرەپتىن، «كاتمەرجىلەر» شىركىتىنىڭ تۇنجى شوپۇرسىز قۇرۇقلۇق ئاپپاراتى سىستېمىسى بولغان  «UKAP»، «كاتمەرجىلەر» ۋە «ئاسەلسان» (Aselsan) قاتارلىق تۈركىيەنىڭ ئىككى چوڭ دۆلەت مۇداپىئە سانائىتى شىركىتىنىڭ تېخنىكىسىنى ئۆزىدە مۇجەسسەملىگەن بولۇپ، «ئاسەلسان» نىڭ «SARP»  يىراقتىن كونترول قىلىنىدىغان قورال سىستېمىسى ۋە سۈنئىي ھەمراھ ئالاقە سىستېمىسى سەپلەنگەن. «UKAP» نىڭ 60% لىك يانتۇلۇققا چىقىش، 40% لىك يانتۇلۇقتا مېڭىش ئىقتىدارى بار، ئۇ 900 مىللىمېتىرلىق ئۆستەڭدىن، 400 مىللىمېتىرلىق تىك توسالغۇدىن ئۆتەلەيدۇ ۋە بىر مېتىرىك توننىغىچە يۈك كۆتۈرەلەيدۇ.

تېرمال ۋە ھەرىكەتلىك كامېرالار ھەمدە سېنزورلار سەپلەنگەن «UKAP» سۇپىسى كۆپ خىل ۋەزىپىلەرنى ئۆتىيەلەيدۇ: ئۇ چېگرا رازۋېدكا ئاپپاراتى سۈپىتىدە خىزمەت قىلىپ، مىنا تازىلاش ۋەزىپىلىرىنى ئورۇندىيالايدۇ؛ ئوق ئۆتمەس بۆلمىسى ئارقىلىق توقۇنۇش رايونلىرىدا يارىدارلارنى قۇتقۇزۇش ۋە تارقاقلاشتۇرۇش ماشىنىسى سۈپىتىدە ئىشلىتىلىدۇ؛ يۈك، ئوق-دورا ۋە ئەسلىھەلەرنى توشۇيالايدۇ، شۇنداقلا زۆرۈر تېپىلغاندا ئېغىر تىپتىكى ماشىنىلارنى سۆرەپ ماڭالايدۇ.

«كاتمەرجىلەر» شىركىتىنىڭ مۇئاۋىن ئىجرائىيە ئەمەلدارى فۇرقان كاتمەرجى ئانادولۇ خەۋەر ئاگېنتلىقىغا قىلغان سۆزىدە، شىركىتىنىڭ «IDEF 2025» يەرمەنكىسى جەريانىدا ئىستانبۇلدا مالايشىيانىڭ «DEFTECH» شىركىتى بىلەن «ئەرەن»  4×4 ماشىنىسى ئۈچۈن يېڭى ھەمكارلىق كېلىشىمىنى رەسمىيلەشتۈرىدىغانلىقىنى ۋە ئىمزا قويۇش مۇراسىمىغا ھەر ئىككى شىركەتنىڭ باش ئىجرائىيە ئەمەلدارلىرىنىڭ بىۋاسىتە قاتنىشىدىغانلىقىنى بىلدۈردى.