پىرېزىدېنت دونالد ترامپ ئامېرىكا قوشما ئىشتاتلىرى بىلەن جەنۇبىي كورېيە ئوتتۇرىسىدا، جەنۇبىي كورېيەنىڭ ئامېرىكاغا قىلىدىغان ئېكسپورتىغا %15 تاموژنا بېجى يۈرگۈزۈشنى ئۆز ئىچىگە ئالغان يېڭى سودا كېلىشىمى تۈزۈلگەنلىكىنى جاكارلىدى.

ترامپ چارشەنبە كۈنى «Truth Social» ئىجتىمائىي تور سۇپىسىدا ئۇچۇر ھەمبەھرىلەپ: «ئامېرىكا قوشما ئىشتاتلىرىنىڭ كورېيە جۇمھۇرىيىتى بىلەن تولۇق ۋە ئەتراپلىق سودا كېلىشىمى تۈزگەنلىكىنى ئېلان قىلىش پۇرسىتىگە ئېرىشكەنلىكىمدىن تولىمۇ مەمنۇنمەن» دېدى.

ترامپ كېلىشىمنىڭ جەنۇبىي كورېيەنىڭ ئامېرىكاغا 350 مىليارد دوللار مەبلەغ سېلىش ۋەدىسىنى ئۆز ئىچىگە ئالىدىغانلىقىنى، بۇ مەبلەغنىڭ «ئامېرىكانىڭ ئىگىدارچىلىقى ۋە كونتروللۇقىدا بولىدىغانلىقىنى، شۇنداقلا پىرېزىدېنتلىق سالاھىيىتى بىلەن ئۆزىنىڭ تاللايدىغانلىقى»نى تەكىتلىدى.

ئۇ يەنە جەنۇبىي كورېيەنىڭ 100 مىليارد دوللار قىممىتىدىكى سۇيۇقلاندۇرۇلغان تەبىئىي گاز (LNG) ۋە باشقا ئېنېرگىيە مەھسۇلاتلىرىنى سېتىۋالىدىغانلىقىنىمۇ قوشۇمچە قىلدى. ۋە سۆزىنى داۋاملاشتۇرۇپ: «جەنۇبىي كورېيە مەبلەغ سېلىش ئۈچۈن زور سوممىلىق مەبلەغ ئاجرىتىشقا قوشۇلدى» دېگەنلەرنى قەيت قىلدى.

ترامپ كېلىشىمگە ئاساسەن، جەنۇبىي كورېيەنىڭ ئۆز بازارلىرىنى ئامېرىكا مەھسۇلاتلىرىغا، بولۇپمۇ ئاپتوموبىل، يۈك ماشىنىلىرى ۋە دېھقانچىلىق مەھسۇلاتلىرىغا پۈتۈنلەي ئېچىۋېتىدىغانلىقىنى بىلدۈردى. ئۇنىڭ بەدىلىگە، جەنۇبىي كورېيەنىڭ ئامېرىكاغا قىلىدىغان ئېكسپورتىدىن %15 تاموژنا بېجى ئېلىنىدىغانلىقىنى، ئەمما ئامېرىكا مەھسۇلاتلىرىنىڭ جەنۇبىي كورېيەگە باجسىز كىرىدىغانلىقىنى ئەسكەرتتى.

ھەپتە بېشىدا ترامپ ئۆز ھۆكۈمىتىنىڭ پاكىستان بىلەنمۇ سودا كېلىشىمى تۈزگەنلىكىنى، باشقا دۆلەتلەر بىلەن بولغان سۆھبەتلەرنىڭمۇ ئۆزى بېكىتكەن 1-ئاۋغۇست مۆھلىتىگىچە داۋاملىشىۋاتقانلىقىنى ئېلان قىلغانىدى.