تۈركىيە جۇمھۇرىيىتى تاشقى ئىشلار مىنىستىرى خاقان فىدان چارشەنبە كۈنى قىلغان سۆزىدە، ئىستانبۇلدا رۇسىيە بىلەن ئۇكرائىنا ئوتتۇرىسىدا ئۆتكۈزۈلگەن ئەڭ يېڭى سۆھبەتنىڭ ئۇرۇشنى ئاخىرلاشتۇرۇش يولىدا بېسىلغان يەنە بىر قەدەم ئىكەنلىكىنى بىلدۈرۈپ، «قولغا كەلگەن ھەر بىر يېڭى مۇۋەپپەقىيەت، تەرەپلەرنى تىنچلىققا بىر قەدەم تېخىمۇ يېقىنلاشتۇرىدۇ» دېدى.
تۈركىيە ساھىبخانلىقىدىكى ئۈچىنچى قېتىملىق بىۋاسىتە سۆھبەتتىن كېيىن سۆز قىلغان فىدان، ھەر ئىككى تەرەپتىن كەم دېگەندە 1200 ھەربىي ئەسىرنى ئۆزئارا ئالماشتۇرۇش توغرىسىدا پۈتۈشۈلگەنلىكىنى، شۇنداقلا بالىلارنىمۇ ئۆز ئىچىگە ئالغان پۇقرالارنىڭ يۇرتلىرىغا قايتىشى ئۈچۈن قوشۇمچە قەدەملەرنىڭ بېسىلغانلىقىنى تىلغا ئالدى.
خاقان فىدان تۈركىيەنىڭ مۇرەسسەچىلىك رولىنى تەكىتلەپ: «سۆھبەتنىڭ تېخىمۇ ئىجابىي ۋە نەتىجە يارىتىشقا قارىتىلغان يۆنىلىشتە كېتىۋاتقانلىقىنى مەمنۇنلۇق بىلەن كۆردۇق» دېدى.
ئۇ تەرەپلەرنىڭ ئۇرۇش توختىتىش ھەققىدىكى تېخنىكىلىق مۇزاكىرىلەرنى كۈچەيتىش ۋە ئورتاق مەيداننى كېڭەيتىش ئۈچۈن بېسىلىدىغان قەدەملەرنى مۇزاكىرە قىلغانلىقىنى، شۇنداقلا سىياسىي، ئىنسانپەرۋەرلىك ۋە ھەربىي ئىشلار بويىچە خىزمەت گۇرۇپپىلىرىنى تەسىس قىلىش ئىدىيەسى ئۈستىدە ئىزدىنىشنى قارار قىلغانلىقىنى بىلدۈردى.
«تەرەپلەرنىڭ ھەل قىلىش چارىسى يولىدا ئورتاق ئىرادە بەرپا قىلىشىغا يەنە بىر خىش قويۇلدى» دېگەن فىدان، «سۆھبەت سەۋرچانلىق بىلەن ئېلىپ بېرىلىشى كېرەك بولغان بىر جەرياندۇر. قولغا كەلگەن ھەر بىر يېڭى مۇۋەپپەقىيەت، تەرەپلەرنى تىنچلىققا بىر قەدەم تېخىمۇ يېقىنلاشتۇرىدۇ» دېگەنلەرنى سۆزلىرىگە ئىلاۋە قىلدى.
ئۇكرائىنا ھەيئىتىنىڭ باشلىقى رۇستەم ئۇمەروۋ، كىيېۋنىڭ ئاۋغۇست ئېيىنىڭ ئاخىرىغىچە پىرېزىدېنت دەرىجىلىك ئۇچرىشىش ئۆتكۈزۈشنى تەكلىپ قىلغانلىقىنى ۋە تۈركىيەنىڭ مۇرەسسەچىلىك رولىغا رەھمەت ئېيتىدىغانلىقىنى بىلدۈردى.
ئۇكرائىنا يەنە ئالدىنقى شەرتسىز ئۇرۇش توختىتىشقا تەييار ئىكەنلىكىنىمۇ تەكىتلىدى.
رۇسىيە تەرەپ سۆھبەتچىسى ۋىلادىمىر مېدىنسكىي، ئەسىر ئالماشتۇرۇشنى تەستىقلاش بىلەن بىر ۋاقىتتا، يارىدارلارنى بىخەتەر جايغا يۆتكەش ۋە ئەسكەرلەرنىڭ جەسەتلىرىنى قايتۇرۇپ بېرىش ئۈچۈن قىسقا مۇددەتلىك ئۇرۇش توختىتىش تەكلىپىنى ئوتتۇرىغا قويدى.
مېدىنسكىي موسكۋانىڭ ئۇكرائىنالىق بالىلارنى قايتۇرۇشقا ئالاقىدار بىر تىزىملىكنى كۆزدىن كەچۈرۈۋاتقانلىقىنى ۋە تۆتىنچى قېتىملىق سۆھبەتكە تەييار ئىكەنلىكىنىمۇ قەيت قىلدى.
