شىمالىي كورېيە ئىسرائىلىيەنىڭ ئىرانغا قاراتقان ھەربىي ھۇجۇملىرىنى «ئىنسانىيەتكە قارشى جىنايەت» دەپ ئەيىبلەپ، بۇ ۋەزىيەتنىڭ ئوتتۇرا شەرقتە تېخىمۇ كەڭ كۆلەملىك ئۇرۇش كەلتۈرۈپ چىقىرىش خەۋپى بارلىقى توغرىسدا ئاگاھلاندۇردى.
شىمالىي كورېيە تاشقى ئىشلار مىنىستىرلىقىنىڭ باياناتچىسى پەيشەنبە كۈنى دۆلەت كونتروللۇقىدىكى كورېيە مەركىزىي خەۋەر ئاگېنتلىقى (KCNA) تەرىپىدىن ئېلان قىلىنغان باياناتىدا، پيوڭياڭنىڭ ئىسرائىلىيەنىڭ ئىراننىڭ پۇقرالار، يادرو ۋە ئېنېرگىيە مۇئەسسەسەلىرىگە قاراتقان ھەربىي ھۇجۇملىرىدىن «قاتتىق ئەندىشە» قىلىۋاتقانلىقىنى ۋە بۇ ھۇجۇملارنى «كەسكىن ئەيىبلەيدىغانلىقىنى» بىلدۈردى.
باياناتچى ئىسرائىلىيە ھۇجۇملىرىدا پۇقرالارنىڭ قازا قىلىشىنى «كەچۈرگىلى بولمايدىغان ئىنسانىيەتكە قارشى جىنايەت» دەپ سۈپەتلەپ، تېل ئاۋىۋنى «دۆلەت دەرىجىلىك تېررورلۇق» بىلەن شۇغۇللىنىش بىلەن ئەيىبلىدى. ئۇ يەنە بۇ ئەھۋالنىڭ رايوندا «يېڭى بىر قېتىملىق ئومۇميۈزلۈك ئۇرۇش» خەۋپىنى كۈچەيتىۋەتكەنلىكىنى تەكىتلىدى.
شىمالىي كورېيە ئامېرىكا ۋە ياۋروپا دۆلەتلىرىنى بۇ ئىشقا تېخىمۇ كۆپ ئارىلىشىۋالماسلىق توغرىسىدا ئاگاھلاندۇردى.
تاشقى ئىشلار مىنىستىرلىقىنىڭ باياناتچىسى بۇ ھەقتە توختىلىپ: «دۇنيا گۇۋاھ بولۇۋاتقان ھازىرقى جىددىي ۋەزىيەت شۇنى ئوچۇق ئىسپاتلىدىكى، ئامېرىكا ۋە غەربنىڭ ھىمايىسىدىكى ئىسرائىلىيە ئوتتۇرا شەرق تىنچلىقى ئۈچۈن راكقا ئوخشاش بىر ۋۇجۇدتۇر، شۇنداقلا دۇنيا تىنچلىقى ۋە بىخەتەرلىكىنى بۇزىدىغان ئاساسلىق جىنايەتچىدۇر» دېدى.
ئۇ يەنە: «خەلقئارا جەمئىيەت زىيانكەشلىككە ئۇچرىغان تەرەپ بولۇش سۈپىتى بىلەن، ئىراننىڭ ئۆزىنىڭ قانۇنلۇق ئىگىلىك ھوقۇقى ۋە ئۆزىنى قوغداش ھوقۇقىنى يۈرگۈزۈشىنى تەنقىد قىلىۋاتقان ئامېرىكا ۋە غەرب كۈچلىرىنىڭ ئۇرۇش يالقۇنىنى تېخىمۇ ئەۋج ئالدۇرۇۋاتقانلىقىنى دىققەت بىلەن كۆزەتمەكتە» دېگەنلەرنى سۆزلىرىگە ئىلاۋە قىلدى.
پالاكەت باسقۇچى
شىمالىي كورېيەنىڭ بۇ باياناتلىرى ئامېرىكا پىرېزىدېنتى دونالد ترامپنىڭ ئىرانغا قارىتا «سەۋر-تاقىتىنىڭ قالمىغانلىقىنى» ئېيتقىنىدىن كېيىن ئېلان قىلىندى.
شىمالىي كورېيە ۋاشىنگتوننى ئاگاھلاندۇرۇپ، ئامېرىكا ۋە ئۇنىڭ ئىتتىپاقداشلىرىنىڭ ھەرىكەتلىرىنىڭ «ئوتتۇرا شەرقتىكى ۋەزىيەتنى كونترول قىلغىلى بولمايدىغان بىر ئاپەت باسقۇچىغا سۆرەپ كىرىۋاتقانلىقىنى» بىلدۈردى.
ترامپنىڭ باياناتى ئىراننىڭ ئالىي رەھبىرى ئەلى خامەنېي «شەرتسىز تەسلىم بولۇش» تەلىپىنى رەت قىلىپ، ئامېرىكانى «تۈزەتكىلى بولمايدىغان زىيانلارنى پەيدا قىلىش» بىلەن ئاگاھلاندۇرغاندىن كېيىن ئېلان قىلىنغانىدى.
بۇ جەرياندا، «ۋال كوچىسى گېزىتى» ترامپنىڭ سەيشەنبە كۈنى مەسلىھەتچىلىرىگە ئىرانغا ھۇجۇم قىلىش پىلانىنى تەستىقلىغانلىقىنى، لېكىن ئىراننىڭ يادرو پىروگراممىسىدىن ۋاز كېچىش-كەچمەسلىكىنى كۈتۈپ تۇرىدىغانلىقىنى ئېيتقانلىقىنى خەۋەر قىلدى.
