ئامېرىكا مەركىزىي قوماندانلىق ئىشتابى (CENTCOM) قوماندانى گېنېرال بىراد كوپېر سەيشەنبە كۈنى ئېلان قىلغان باياناتىدا، ئىرانغا قارىتىلغان ئامېرىكا-ئىسرائىلىيە بىرلەشمە ھۇجۇمىغا 50 مىڭدىن ئارتۇق ئەسكەر، 200 ئۇرۇش ئايروپىلانى ۋە ئىككى ئاۋىياماتكىنىڭ قاتناشقانلىقىنى بىلدۈردى.
كوپېر بىر سىنلىق ئۇچۇرىدا، ھەربىي ھەرىكەتنىڭ نۆۋەتتە تۆتىنچى كۈنىگە قەدەم قويغانلىقىنى ۋە بۇنىڭ ئامېرىكانىڭ ئوتتۇرا شەرقتىكى ئەڭ كەڭ كۆلەملىك ئۇرۇشى ھېسابلىنىدىغانلىقىنى ئەسكەرتتى.
كوپېرنىڭ قارىشىچە، ھۇجۇم باشلانغاندىن بۇيان، ئامېرىكا ۋە ئىسرائىلىيە قىسىملىرى ئىران مىقياسىدىكى 2000 غا يېقىن نىشاننى 2000 دىن ئارتۇق ئوق-دورا ئىشلىتىپ پارتلاتقان.
ئىران كەڭ كۆلەملىك قايتۇرما زەربە بېرىش ھۇجۇملىرى بىلەن ئىنكاس قايتۇرغان بولۇپ، 500 دىن ئارتۇق باللىستىك باشقۇرۇلىدىغان بومبا ۋە 2000 دىن ئارتۇق ئۇچقۇچىسىز ھاۋا ئاپپاراتلىرىنى قويۇپ بەرگەن.
ئۇ سۆزىگە ئىلاۋە قىلىپ: «بۇنىڭدىن باشقا، بىز ئىران دېڭىز ئارمىيەسىنى، يەنى پۈتۈن بىر فىلوتنى چۆكتۈرۈۋاتىمىز. ھازىرغىچە ئىراننىڭ 17 پاراخوتىنى ۋەيران قىلدۇق» دېدى.
قايتۇرما زەربىلەرگە قارىماي، كوپېر ھەربىي ھۇجۇمنىڭ داۋاملىشىشىغا ئەگىشىپ، ئىراننىڭ ئامېرىكا قىسىملىرى ۋە ئىتتىپاقداشلىرىغا زەربە بېرىش ئىقتىدارىنىڭ ئاجىزلىغانلىقىنى ئىلگىرى سۈردى.
ئامېرىكا ۋە ئىسرائىلىيەنىڭ شەنبە كۈنى ئىرانغا قوزغىغان كەڭ كۆلەملىك ھۇجۇمىدىن كېيىن، پۈتكۈل رايوننىڭ ۋەزىيىتى كەسكىنلىشىپ كەتتى؛ بۇ ھۇجۇملاردا ئالىي رەھبەر ئەلى خامىنېي ۋە يۇقىرى دەرىجىلىك ھەربىي ئەمەلدارلارنى ئۆز ئىچىگە ئالغان تەخمىنەن 800 كىشى ھاياتىدىن ئايرىلدى.
ئىران ئىسرائىلىيەنى ۋە ئامېرىكا ھەربىي قىسىملىرى تۇرۇشلۇق پارىس قولتۇقى دۆلەتلىرىنى نىشان قىلىپ، ئۇچقۇچىسىز ھاۋا ئاپپاراتلىرى ۋە باشقۇرۇلىدىغان بومبىلار بىلەن قايتۇرما زەربە بەردى.
ئامېرىكا مەركىزىي قوماندانلىق ئىشتابى ھەرىكەت جەريانىدا كۇۋەيتتىكى بىر تاكتىكىلىق ھەرىكەت مەركىزىگە قىلىنغان ئىراننىڭ ھۇجۇمىدا ئالتە ئامېرىكا ئەسكىرىنىڭ ئۆلگەنلىكىنى ۋە بىرنەچچىسىنىڭ يارىلانغانلىقىنى ئۇقتۇردى.
