ئامېرىكا پىرېزىدېنتى دونالد ترامپ 24-سېنتەبىر كۈنى خىتاي دۆلەت رەئىسى شى جىنپىڭ بىلەن سودا، ئاپتوموبىل ۋە بويىڭ (Boeing) قاتارلىق ئاچقۇچلۇق مەسىلىلەرنىمۇ ئۆز ئىچىگە ئالغان كەڭ دائىرىلىك سۆھبەتلەرنى ئۆتكۈزۈشنى پىلانلىماقتا.
ئامېرىكا پىرېزىدېنتى دونالد ترامپ 24-سېنتەبىر ئاقسارايدا خىتاي دۆلەت رەئىسى شى جىنپىڭ بىلەن ئۆتكۈزىدىغان ئىككى تەرەپلىك سۆھبەتتە «ئاساسەن ھەممە ئىشنى» مۇزاكىرە قىلىشنى كۈتۈۋاتقانلىقىنى ئىپادىلىدى. بۇلارنىڭ ئارىسىدا سودا، ئاپتوموبىل ئىشلەپچىقىرىش، بويىڭ ئايروپىلان سېتىش، ئۇكرائىنا ۋە غەززەدىكى توقۇنۇشلار، سۈنئىي ئىدراك ۋە ئامېرىكا مۇداپىئە سانائىتى ئىشلەپچىقىرىشى قاتارلىق تېمىلار بار.
ئامېرىكا ھۆكۈمىتىنىڭ خىتايدا ئىشلەپچىقىرىلغان ئاپتوموبىللارغا يۈرگۈزگەن 100% تىن 150% كىچە بولغان تاموژنا بېجىنى ياقىلىغان ترامپ، ئىچكى بازارنى مۇۋەپپەقىيەتلىك قوغدىغانلىقىنى تەكىتلەپ، ئامېرىكانىڭ بۇ ئۇسۇلىنى، خىتاي ئىمپورت ماللىرى سەۋەبىدىن «ئېغىر زىيانغا ئۇچرىغانلىقىنى» ئىلگىرى سۈرگەن ياۋروپانىڭ ئەھۋالى بىلەن سېلىشتۇردى.
ترامپ بويىڭ ئايروپىلان سېتىۋېلىشقا ئالاقىدار بىر كېلىشىم ھاسىل قىلىنىش-قىلىنماسلىقى ھەققىدىكى بىر سوئالغا: «مەن ھەر قانداق كېلىشىمنى قىلىمەن» دەپ جاۋاب بەردى.
خىتاي ئورگانلىرىنىڭ ئىيوردانىيەدىكى ئامېرىكا ۋە ئىتتىپاقداشلار ھاۋا ئارمىيە بازىلىرىغا تەۋە سۈنئىي ھەمراھ كۆرۈنۈشلىرىنى ئىرانغا تەمىنلىگەنلىكى توغرىسىدىكى دەۋالارغىمۇ توختالغان ترامپ: «ئۇلارمۇ بىز نېمە قىلساق شۇنى قىلىۋاتىدۇ. بىرى ماڭا ‹خىتاي بىزگە قارشى جاسۇسلۇق قىلىۋاتىدۇ› دېسە، ‹توغرا دەيسىز، بىزمۇ ئۇلارنى كۈزىتىۋاتىمىز› دەيمەن» دېدى.
ئۇكرائىنا، مۇداپىئە ئىشلەپچىقىرىشى ۋە سودا
ئامېرىكا پىرېزىدېنتى رۇسىيە-ئۇكرائىنا ئۇرۇشى توغرىسىدا توختىلىپ، ئۇكرائىنا پىرېزىدېنتى ۋولودىمىر زېلېنسكىيدىن رۇسىيەگە تەۋە دىزېل ئايرىش زاۋۇتلىرىنى نىشان قىلماسلىقنى تەلەپ قىلغانلىقىنى بىلدۈردى ۋە تەمىناتتا يۈز بەرگەن ئاقساشلارنىڭ يەرشارى يېقىلغۇ باھاسىنى ئۆستۈرۈۋەتكەنلىكىنى ئىلگىرى سۈردى.
مۇداپىئە سانائىتى ئىشلەپچىقىرىشى ئۈستىدىمۇ توختالغان ترامپ، ئۇكرائىناغا قىلىنغان قورال توشۇشلاردىن كېيىن ئامېرىكانىڭ ئوق-دورا زاپاسلىرىنى تېز سۈرئەتتە تولۇقلىغانلىقىنى جاكارلاپ: «نۆۋەتتە تارىخىمىزدا كۆرۈلۈپ باقمىغان دەرىجىدە كۆپ مىقداردا پاترىيوت باشقۇرۇلىدىغان بومبىسى ئىشلەپچىقىرىۋاتىمىز» دېدى.
يېڭى زاۋۇتلاردا پاترىيوت ۋە توماخاۋك باشقۇرۇلىدىغان بومبىلىرىنى ئىشلەپچىقىرىشنىڭ ئاشۇرۇلغانلىقىنى سۆزلىرىگە ئىلاۋە قىلغان ترامپ، شۇنىڭ بىلەن بىر ۋاقىتتا لازېر سىستېمىلىرىنىڭ تېخىمۇ ئاستا ھەرىكەت قىلىدىغان باشقۇرۇلىدىغان بومبىلارغا قارشى ھاۋا مۇداپىئەسىدە تەننەرخى مۇۋاپىق بولىدىغانلىقىنى تەكىتلىدى.
ترامپ يەنە، غەززە مەسىلىسىدىكى مۇرەسسەچىلىك تىرىشچانلىقلىرى ئۈچۈن ئامېرىكا ۋەكىللىرى ستىۋ ۋىتكوپ بىلەن جېرېد كۇشنېرغا شۇنداقلا CIA باشلىقى جون راتكلىفقا ئاپىرىن ئوقۇپ، گۆرۈگە ئېلىنغانلار قويۇپ بېرىلگەندىن كېيىن توقۇنۇشلارنىڭ كۆرۈنەرلىك دەرىجىدە ئازايغانلىقىنى ئىلگىرى سۈردى.
رايون خاراكتېرلىك سودا مەسىلىسىدە كانادانى سۆھبەتلىشىش «ئەڭ تەس دۆلەت» دەپ سۈپەتلىگەن ترامپ، كانادا خەلقىنى ماختاپ ئۇلارنى «قالتىس» دەپ تەسۋىرلىدى، ئەمما 1-يانۋاردا يولغا قويۇلۇشى پىلانلانغان ئاپتوموبىل تاموژنا بېجى توغرىسىدا ئاگاھلاندۇرۇش بەردى.
سۈنئىي ئىدراك مەسىلىسىنىمۇ تىلغا ئالغان ترامپ، بۇ تېخنىكىنىڭ «زىيىنىدىن بەكرەك پايدىسى» بولىدىغانلىقىنى ئىلگىرى سۈردى. «سۈنئىي ئىدراك مۇسابىقىسىدە ئۇتقان تەرەپ يېڭىدۇ» دەپ تەكىتلىگەن ترامپ، ئامېرىكانىڭ يەرشارى مىقياسىدا ئىستراتېگىيەلىك ئۈستۈنلۈكىنى قوغداپ قالغانلىقىنى ئىپادىلىدى.
