ئامېرىكانىڭ «CNN» قانىلىنىڭ نۆۋەتتىكى تەكشۈرۈشى ئامېرىكا بىلەن ئىران ئوتتۇرىسىدىكى جىددىيچىلىكنىڭ رايوندىكى ئامېرىكا ھەربىي بازىلىرىغا كۆرسەتكەن تەسىرىنى كۆز ئالدىمىزدا نامايان قىلىپ بەردى.
«CNN» نىڭ سۈنئىي ھەمراھ كۆرۈنۈشلىرى، زىيان مۆلچەرلەش دوكلاتلىرى شۇنداقلا ئامېرىكا ۋە پارس قولتۇقى مەنبەلىرىگە ئاساسلانغان خەۋىرىدە، 28-فېۋرالدىن بۇيان ئىراننىڭ ھۇجۇملىرى نەتىجىسىدە ئامېرىكا ئارمىيەسىنىڭ ئوتتۇرا شەرقتىكى كەم دېگەندە 16 بازىسىنىڭ تۈرلۈك دەرىجىلەردە زىيانغا ئۇچرىغانلىقى ئىپادىلەندى. خەۋەردە زىيانغا ئۇچرىغان بەزى جايلارنىڭ ئېغىر ۋەيرانچىلىققا ئۇچرىغانلىقى ۋە بەزى ئەسلىھەلەرنىڭ ئىشلەتكىلى بولمايدىغان ھالەتكە كەلگەنلىكى قەيت قىلىنىپ، ئىران ھۇجۇملىرىنىڭ ئاساسلىقى رايوننىڭ ھەر قايسى جايلىرىغا ئورۇنلاشتۇرۇلغان ئىلغار رادار سىستېمىلىرى، ئالاقە ئۇل ئەسلىھەلىرى، باشقۇرۇلىدىغان بومبا مۇداپىئە مۈلۈكلىرى ۋە ئايروپىلانلارغا مەركەزلەشكەنلىكى بىلدۈرۈلدى.
مەلۇم قىلىنغان زىيانلار ئارىسىدا ئىيوردانىيەدىكى ئامېرىكا «THAAD» باشقۇرۇلىدىغان بومبا باتارېيەسىگە باغلانغان رادار سىستېمىلىرى ۋە ئەرەب بىرلەشمە خەلىپىلىكىدىكى بەزى ئەسلىھەلەردىكى رادار سىستېمىلىرى ئورۇن ئالدى. «CNN» شۇنداقلا سەئۇدى ئەرەبىستاندىكى ھاۋا ئارمىيە بازىسىغا قىلىنغان ئىران ھۇجۇمى جەريانىدا بىر ئامېرىكا «Boeing E-3 Sentry» ئايروپىلانىنىڭمۇ ۋەيران قىلىنغانلىقىنى ئەسكەرتتى.
پېنتاگون ئەمەلدارلىرى ئۆتكەن ھەپتە قۇرۇلتايدا بەرگەن ئىسپات سۆزلىرىدە، ئامېرىكانىڭ ئىرانغا قاراتقان ھۇجۇملىرىنىڭ چىقىمىنىڭ 25 مىليارد دوللار ئەتراپىدا ئىكەنلىكىنى ئېلان قىلغانىدى. بىراق «CNN» ۋە «CBS News» غا ئوخشاش مەنبەلەرنىمۇ ئۆز ئىچىگە ئالغان نۇرغۇن ئامېرىكا تاراتقۇ ئورگانلىرى ئىران بىلەن بولغان ئۇرۇشنىڭ ئومۇمىي چىقىمىنىڭ كەم دېگەندە 50 مىليارد دوللار ئىكەنلىكىنى ئىلگىرى سۈرمەكتە.
