يەرلىك دائىرىلەر پەيشەنبە كۈنى بايانات ئېلان قىلىپ، جەنۇبىي قىسىمدا يۈز بەرگەن بۇ قېتىملىق تەبىئىي ئاپەتنىڭ بىر سۇ ئامبىرى توسمىسىنى ئۆرۈۋەتكەنلىكىنى ھەمدە ئېغىر ئادەم ئۆلۈش تالاپىتىنى كەلتۈرۈپ چىقارغانلىقىنى دەلىللىدى.
دۆلەت تاراتقۇلىرىنىڭ خەۋىرىگە قارىغاندا، مەزكۇر ئۆلۈم-يېتىم ھادىسىسى ۋىيېتنام چېگراسىغا جايلاشقان گۇاڭشى جۇاڭزۇ ئاپتونوم رايونىدا يۈز بەرگەن.
مەسئۇللار رايون مەركىزى نەننىڭدىكى «ليۇلان» (Liulan) سۇ ئامبىرى توسمىسىدا يېرىلىش كۆرۈلگەنلىكىنى ئۇقتۇردى.
نۆۋەتتە ئىزدەش-قۇتقۇزۇش ۋە ياردەم بېرىش خىزمەتلىرى جىددىي داۋاملاشماقتا ئىكەن.
يېقىنقى كۈنلەردە يۈز بەرگەن قاتتىق قۇيۇن، قارا يامغۇر، تاغ گۆمۈرۈلۈش ۋە كەلكۈن ئاپىتى خىتاينىڭ ھەرقايسى رايونلىرىغا ئېغىر زەربە بەردى.
گۇاڭشىنىڭ خېڭجۇ رايونىدىكى بىر فېرمىدا سۇ ئاپىتى تاملارنى ئۆرۈۋەتكەنلىكى ئۈچۈن تەخمىنەن 900 يىلان قېچىپ كەتكەن.
دۆلەت تاراتقۇلىرىنىڭ چارشەنبە كۈنى بەرگەن خەۋىرىدە كۆرسىتىلىشىچە، غەربىي شىمالدىكى گەنسۇ ئۆلكىسىنىڭ تەنچاڭ ناھىيەسىگە قاراشلىق بىر يېزىدىمۇ تاغ گۆمۈرۈلۈپ كەم دېگەندە 21 كىشى قازا قىلغان.
