خىتاي مۇداپىئە مىنىستىرلىقى باياناتچىسى ياپونىيەنى گۇرۇھلار ئارا توقۇنۇشنى كۈشكۈرتۈش بىلەن ئەيىبلىدى. ياپونىيە خىتاينىڭ باياناتىغا قارىتا ھېچقانداق ئىنكاس قايتۇرمىدى.
دۆلەت تاراتقۇلىرىنىڭ خەۋىرىگە قارىغاندا، خىتاي ياپونىيەنى رايونلۇق بىخەتەرلىك ھەمكارلىقى شۇندقلا «ئەركىن ۋە ئوچۇق ھىندى-تىنچ ئوكيان» ئىستراتېگىيەسىنى ھەربىي كېڭەيمىچىلىكنىڭ بىر نىقابى سۈپىتىدە ئىشلىتىش بىلەن ئەيىبلەپ، توكيونىڭ ھەرىكەتلىرىنىڭ رايوننىڭ تىنچلىقى ۋە مۇقىملىقىغا تەھدىت سالىدىغانلىقى ھەققىدە ئاگاھلاندۇردى.
Global Times نىڭ شەنبە كۈنىدىكى خەۋىرىگە قارىغاندا، خىتاي مۇداپىئە مىنىستىرلىقى باياناتچىسى جياڭ بىن، ياپونىيە باش ۋەزىرى سانائې تاكايىچىنىڭ بىخەتەرلىك مۇناسىۋەتلىرىنى كۈچەيتىشنى نىشان قىلغان ئاۋسترالىيە ۋە ۋىيېتنام زىيارەتلىرىگە قارىتا، توكيونى گۇرۇھلار ئارا توقۇنۇشنى تەشۋىق قىلىش بىلەن ئەيىبلىدى.
«ئاتالمىش "ئەركىن ۋە ئوچۇق ھىندى-تىنچ ئوكيان" ۋە "بىخەتەرلىك ھەمكارلىقى" باھانىسى بىلەن ياپونىيەدىكى ئەمەلدارلار گۇرۇھلار ئارا توقۇنۇشنى كۈشكۈرتۈۋاتىدۇ ۋە كىچىك چەمبىرەكلەرنى شەكىللەندۈرۈۋاتىدۇ» دېدى ۋە جياڭ سۆزىنى مۇنداق داۋاملاشتۇردى: «بۇ، باشقا دۆلەتلەرنىڭ ئىستراتېگىيەلىك بىخەتەرلىكى ۋە مەنپەئەتىگە زىيان يەتكۈزىدۇ ھەمدە ياپونىيەنىڭ ھەربىي تەرەققىياتىغا قويۇلغان چەكلىمىلەردىن قۇتۇلۇشى ئۈچۈن بىر باھانە بولۇپ قالىدۇ. بىز بۇنىڭغا قەتئىي قارشى تۇرىمىز»
جياڭ يەنە ياپونىيەدە دۆلەتنىڭ ئۇرۇشتىن كېيىنكى تىنچلىق ئاساسىي قانۇنىنى تۈزۈتۈش ھەققىدىكى چاقىرىقلارنى تەنقىد قىلىپ، بۇ خىل قەدەملەرنىڭ «يوشۇرۇن ھەربىي كۈچىيىشتىن ئاشكارە ئۇرۇش تەييارلىقىغا» قاراپ بۇرۇلۇشنى ئەكىس ئەتتۈرىدىغانلىقىنى ئېيتتى.
بېيجىڭ ياپونىيەدە ئەۋج ئالغان «نېئو-مىلىتارىزم» (يېڭى ھەربىي مەركەزچىلىك) دەپ تەسۋىرلىگەن ئەھۋالنىڭ ئاسىيادىكى تىنچلىققا قارىتا ئېشىۋاتقان بىر تەھدىت ئىكەنلىكىدىن ئاگاھلاندۇردى.
جياڭ «ئالاقىدار دۆلەتلەر» نى گۇرۇھلارغا بۆلۈنۈش ۋە لاگېرلار توقۇنۇشى پەيدا قىلىشنى توختىتىشقا چاقىردى.
ياپونىيە ۋە فىلىپپىن مۇداپىئە مىنىستىرلىرىنىڭ مۇداپىئە ھەمكارلىقىنى كۈچەيتىشكە ۋەدە بەرگەن يېقىنقى ئالىي دەرىجىلىك ئۇچرىشىشىغا باھا بەرگەن خىتاي مۇداپىئە مىنىستىرلىقى باياناتچىسى: «ياپونىيە ۋە فىلىپپىندىكى بەزى سىياسەتچىلەر دېڭىز مەسىلىلىرىدە خاتا قاراشلارنى كۆپتۈرۈپ، خىتايغا قارشى ئاساسسىز ئەيىبلەشلەرنى قىلماقتا. خىتاي بۇ ئەھۋالدىن تولىمۇ نارازى ۋە بۇنىڭغا قەتئىي قارشى تۇرىدۇ» دېدى.
