ياپونىيەدە پاي چېكى قىممىتى باش مىنىستىر سانائې تاكائىچىنىڭ تارىخىي سايلام غەلىبىسىنىڭ مەبلەغ سالغۇچىلاردا كۈچلۈك سىياسىي مۇقىملىق تۇيغۇسى پەيدا قىلىشى بىلەن تېز سۈرئەتتە ئۆرلىدى. «Wall Street» بازىرىنىڭ يۇقىرى نۇقتىدا يېپىلىشىمۇ ئاسىيا بازارلىرىدىكى ئۈمىدۋارلىقنى ئاشۇردى. توكيونىڭ ئاساسلىق كۆرسەتكۈچى بولغان «Nikkei 225» دۈشەنبە كۈنى %5 تىن ئارتۇق ئۆرلەپ، تۇنجى قېتىم 57 مىڭ نۇقتىدىن ئاشتى. بازارلار تاكائىچىنىڭ مالىيە رىغبەتلەندۈرۈش پىلانلىرىغا ئاكتىپ ئىنكاس قايتۇردى، پاي چېكىنىڭ ئۆرلىشىگە ئەگىشىپ يەننىڭمۇ قىممىتى ئۆستى.
تاكائىچى رەھبەرلىكىدىكى لىبېرال دېموكراتلار پارتىيەسى تۆۋەن پالاتادا تەخمىنەن ئۈچتىن ئىككى قىسىم كۆپ سانلىق ئورۇنغا ئېرىشىپ، كەڭ كۆلەملىك چىقىم پىلانلىرى ۋە باجنى كېمەيتىش تەدبىرلىرىنى ئېلان قىلدى. تاكائىچى سايلامدىن كېيىن قىلغان سۆزىدە: «بىز مالىيە سىياسىتىنىڭ سىجىللىقىنى ئالدىنقى ئورۇنغا قويىمىز ۋە زۆرۈر مەبلەغلەرنى سالىمىز. ئاممىۋى ۋە خۇسۇسىي ساھە بىرلىكتە مەبلەغ سېلىشى كېرەك. بىز كۈچلۈك ۋە چىدامچان ئىقتىساد بەرپا قىلىمىز» دېدى.
تەھلىلچىلەر بۇ غەلىبىنىڭ قىسقا مۇددەتلىك سىياسىي خەۋپلەرگە خاتىمە بەرگەنلىكىنى بىلدۈرمەكتە. «Capital.com»دىن كايىل روددا، بۇ نەتىجىنىڭ تاكائىچىنى ئىقتىسادىي پىلانلىرىنى ئىشقا ئاشۇرۇشى ئۈچۈن كۈچلۈك ھوقۇق بەرگەنلىكىنى ئېيتتى. «Saxo Markets»تىن چارۇ چانانا بولسا، ئېنىق سايلام غەلىبىلىرىنىڭ تۇراقسىزلىقنى ئازايتىدىغانلىقىنى، لېكىن قەرز نىسبىتى ئېشىپ كەتسە، ئۇزۇن مۇددەتتە مۇرەككەپ ۋەزىيەتنىڭ شەكىللىنىشى مۇمكىنلىكى ھەققىدە ئاگاھلاندۇردى. ھازىرچە مەبلەغ سالغۇچىلار بۇ خەۋپلەرگە پەرۋا قىلمىدى؛ خوڭكوڭ، شاڭخەي، سىدنىي ۋە سىنگاپور بازارلىرىدىمۇ ئالاھىدە ئۆرلەش كۆرۈلدى.
سېئۇل پاي چېكى بازىرىدا «Samsung» پاي چەكلىرى يېڭى ئەۋلاد «HBM4» ئۆزىكىنى ئىشلەپچىقىرىش خەۋىرىدىن كېيىن %6 ئۆرلىدى. شۇنىڭ بىلەن بىرگە، «Dow Jones» كۆرسەتكۈچى تۇنجى قېتىم 50 مىڭ نۇقتىدىن ئاشتى. باشقا بازارلاردا ئالتۇن ۋە كۈمۈش تۇراقلىق ھالەتنى ساقلىغان بولسا، نېفىت باھاسى ئىران بىلەن ئامېرىكا ئوتتۇرىسىدىكى يادرو سۆھبەتلىرىدىن كېيىنكى جىددىيچىلىكنىڭ سۇسلىشىشى بىلەن بىر ئاز تۆۋەنلىدى.
