ئامېرىكانىڭ دۈشەنبە كۈنىدىن باشلاپ ئىران پورتلىرىغا قورشاۋ تەتبىقلايدىغانلىقىنى ئېلان قىلىشى، يەر شارى ئېنېرگىيە بازارلىرىدىكى مۇقىملىق ئۈمىدىگە يەنە بىر ئېغىر زەربە بولدى. بۇ قەدەم ئامېرىكا بىلەن ئىسرائىلىيەنىڭ 28-فېۋرال ئىرانغا قارشى ئۇرۇش باشلىشى بىلەن ئەۋجىگە چىققان توقۇنۇشنىڭ تېخىمۇ كەسكىنلىشىدىغانلىقىدىن بېشارەت بەرمەكتە.

خەلقئارالىق ئۆلچەم ھېسابلانغان برېنت (Brent) نېفىتىنىڭ بىر ۋارىلى تەخمىنەن %7، ئامېرىكا ئۆلچىمى ھېسابلانغان غەربىي تېكساس خام نېفىتى (WTI) نىڭ بىر ۋارىلى بولسا %8 ئۆرلىدى. نېفىت باھاسى توقۇنۇش باشلانغاندىن بۇيان زور دەرىجىدە داۋالغۇپ تۇرماقتا. ئۇرۇش باشلىنىشتىن ئىلگىرى برېنت نېفىتىنىڭ بىر ۋارىلى تەخمىنەن 70 دوللار ئەتراپىدا بولغان بولسا، كېيىنچە ئەڭ يۇقىرى چەكتە 119 دوللاردىن ئېشىپ كەتكەنىدى.

ئالدىنقى جۈمە كۈنى، ئامېرىكا بىلەن ئىران ئارىسىدا پاكىستاننىڭ ئىسلامئاباد شەھىرىدە ئۆتكۈزۈلىدىغان تىنچلىق سۆھبىتى ئالدىدا، نېفىت باھاسىنىڭ سەل تۆۋەنلىشى بىلەن بازارلاردا ئېھتىياتچان بىر ئۈمىدۋارلىق كۆرۈلگەن ئىدى. بىراق قورشاۋ قارارى بۇ ئىلگىرىلەشلەرنى تېزلا يوققا چىقىرىپ، باھانى قايتىدىن ئۆرلەتتى.

ئامېرىكا مەركىزى قوماندانلىق ئىشتابى (CENTCOM) پىرېزىدېنت ترامپنىڭ باياناتىغا ئاساسەن، 13-ئاپرېل سائەت 10:00 (گىرىنۋىچ ۋاقتى 14:00) دىن باشلاپ، ئىران پورتلىرىغا كىرىدىغان ۋە ئۇنىڭدىن چىقىدىغان بارلىق دېڭىز قاتناش ۋاسىتىلىرىنى قورشاۋغا ئالىدىغانلىقىنى ئېلان قىلدى. قوماندانلىق ئىشتابىنىڭ قورشاۋنىڭ پارس قولتۇقى ۋە ئومان قولتۇقىدىكى بارلىق ئىران پورتلىرىنى ئۆز ئىچىگە ئالىدىغانلىقىنى، بارلىق دۆلەتلەرنىڭ پاراخوتلىرىغا  بىردەك يولغا قويۇلىدىغانلىقىنى بىلدۈردى. شۇنىڭ بىلەن بىرگە، ھورمۇز بوغۇزىدىن ئۆتۈپ ئىران سىرتىدىكى پورتلارغا بارىدىغان پاراخوتلارنىڭ ئەركىن قاتنىشىغا توسالغۇ بولمايدىغانلىقى ۋە سودا پاراخوتلىرىغا ئالدىن رەسمىي ئۇقتۇرۇش بېرىلىدىغانلىقى ئەسكەرتىلدى.