بۇ، جەنۇبىي كورېيە پىرېزىدېنتى لى جائې ميۇڭ مۇشۇ ئاينىڭ باشلىرىدا ۋەزىپىگە ئولتۇرغاندىن بۇيان، يادرو قوراللىرىغا ئىگە شىمالىي كورېيەنىڭ تۇنجى قېتىم باشقۇرۇلىدىغان بومبا قويۇپ بېرىشى ھېسابلىنىدۇ.

ئامېرىكا پىرېزىدېنتى دونالد ترامپنىمۇ ئۆز ئىچىگە ئالغان دۇنيا رەھبەرلىرىنىڭ جەنۇبىي كورېيەدە چاقىرىلىدىغان باشلىقلار يىغىنىغا قاتنىشىش ئۈچۈن بىر يەرگە جەم بولۇشىدىن بىر ھەپتە بۇرۇن شىمالىي كورېيە بىرنەچچە ئايدىن كېيىن تۇنجى قېتىم كۆپ ساندا باللىستىك باشقۇرۇلىدىغان بومبا قويۇپ بەردى.

سېئۇل باش ئىشتاب باشقارمىسىنىڭ چارشەنبە كۈنى ئېلان قىلغان باياناتىدا مۇنداق دېيىلدى:

«شىمالىي كورېيەنىڭ قىسقا مۇساپىلىك باللىستىك باشقۇرۇلىدىغان بومبا قويۇپ بەرگەنلىكىنى ئېنىقلاپ چىقتۇق.»

ھەربىي دائىرىلەر باشقۇرۇلىدىغان بومبىلارنىڭ «چارشەنبە كۈنى ئەتىگەن سائەت 08:10 ئەتراپىدا (خەلقئارا ئۆلچەملىك ۋاقتى سەيشەنبە كۈنى كۈنى سائەت 23:10) شىمالىي خۋاڭخائې ئۆلكىسىنىڭ جۇڭخۋا رايونىدىن قويۇپ بېرىلگەنلىكىنى بىلدۈردى.

جەنۇبىي كورېيە ئارمىيەسى كېيىنچە مۇخبىرلارغا بەرگەن باياناتىدا، باشقۇرۇلىدىغان بومبىلارنىڭ قىسقا مۇساپىلىك ئىكەنلىكىنى دەلىللىدى.

شىمالىي كورېيە ئەڭ ئاخىرقى قېتىم ئالدىنقى ئاينىڭ 8-كۈنى شەرقىي دېڭىز قىرغىقىدىن بىرنەچچە قىسقا مۇساپىلىك باشقۇرۇلىدىغان بومبا قويۇپ بەرگەن ئىدى.

سېنتەبىر ئېيىدا، شىمالىي كورېيە رەھبىرى كىم جوڭئۇن ئۇزۇن مۇساپىلىك يادرو باشقۇرۇلىدىغان بومبىلاردا ئىشلىتىلىدىغان قاتتىق يېقىلغۇلۇق موتور سىنىقىغا رىياسەتچىلىك قىلغان ئىدى.

دۆلەتلىك ئاخبارات ۋاسىتىلىرى بۇنىڭ موتورنىڭ توققۇزىنچى ۋە ئاخىرقى سىنىقى ئىكەنلىكىنى، يېڭى قىتئەلەر ئارا باللىستىك باشقۇرۇلىدىغان بومبىنىڭ ئالدىمىزدىكى ئايلاردا تولۇق سىناق قىلىنىدىغانلىقىنى ئۇقتۇرغان ئىدى.

 شىمالىي كورېيەنىڭ قورال - ياراغلاردىن ۋاز كېچىش نىيىتى يوق

 ئامېرىكا پىرېزىدېنتى دونالد ترامپ تۇنجى قېتىملىق ۋەزىپە ئۆتەش مۇددىتىدە كىم جوڭئۇن  بىلەن بىرنەچچە قېتىم كۆرۈشكەن بولۇپ، بۇ يىل يەنە كۆرۈشۈشنى ئۈمىد قىلىدىغانلىقىنى ئېيتقان ئىدى.

پيوڭياڭ كىم جوڭئۇننىڭ كەلگۈسىدىكى سۆھبەتلەرگە قاتنىشىش نىيىتىنىڭ بارلىقىنى، لېكىن يادرو قوراللىرىدىن ۋاز كەچمەيدىغانلىقىنى بىلدۈردى.

شىمالىي كورېيە ئامېرىكا ۋە جەنۇبىي كورېيە قاتارلىق دۆلەتلەر قوللاۋاتقان باللىستىك باشقۇرۇلىدىغان بومبا ياساشنى چەكلەش قانۇنىنى رەت قىلماقتا.

شىمالىي كورېيە بۇ قېتىم دۇنيا رەھبەرلىرىنىڭ ئاسىيا-تىنچ ئوكيان ئىقتىساد مۇنبىرى باشلىقلار يىغىنىغا قاتنىشىش ھارپىسىدا، جۈملىدىن ترامپ بىلەن خىتاي دۆلەت رەئىسى شى جىنپىڭنىڭ كېلەر ھەپتە  جەنۇبىي كورېيەدە ئۇچرىشىشى ھارپىسىدا  باللىستىك باشقۇرۇلىدىغان بومبا قويۇپ بەردى.

شىمالىي كورېيە مۇشۇ ئاينىڭ باشلىرىدا خىتاي باش مىنىستىرىمۇ قاتناشقان بىر پاراتتا ئەڭ يېڭى قىتئەلەر ئارا باللىستىك باشقۇرۇلىدىغان بومبىسىنى قويۇپ بەرگەن ئىدى.