جۇمھۇر رەئىس رەجەپ تايىپ ئەردوغان تاشقى ئىشلار مىنىستىرلىقىنىڭ مۇئاۋىن مىنىستىرى نوھ يىلمازنى تۈركىيەنىڭ دەمەشىقتە تۇرۇشلۇق يېڭى باش ئەلچىسى قىلىپ تەيىنلىدى. بۇ، تۈركىيەنىڭ 13 يىلدىن بۇيان سۈرىيەگە تۇنجى قېتىم باش ئەلچى تەيىنلىشى بولۇپ ھېسابلىنىدۇ.

بۇ ھەقتىكى قارار چارشەنبە كۈنى جۇمھۇر رەئىس ئەردوغاننىڭ ئىمزاسى بىلەن «رەسمىي گېزىت»تە ئېلان قىلىندى.

تۈركىيە دۆلەت مۇداپىئە مىنىستىرى ياشار گۈلەر يىلمازنى قوبۇل قىلدى ۋە ئۇنى يېڭى ۋەزىپىسى مۇناسىۋىتى بىلەن تەبرىكلىدى.

يىلماز بۇ ۋەزىپىگە تەيىنلەنگەنلىكى ئۈچۈن جۇمھۇر رەئىس ئەردوغان ۋە تاشقى ئىشلار مىنىستىرى خاقان فىدانغا مىننەتدارلىقىنى بىلدۈردى.

يىلماز ئىجتىمائىي ئالاقە سۇپىسى «X» تە ئۇچۇر ھەمبەھرىلەپ: «تۈركىيە بىلەن سۈرىيە ئارىسىدا ئەسىرلەردىن بۇيان داۋاملىشىپ كېلىۋاتقان كۈچلۈك ئىنسانپەرۋەرلىك ۋە مەدەنىيەت رىشتىسىدىن ئىلھام ئېلىپ، مۇناسىۋەتلىرىمىزنى قوشنىدارچىلىق پىرىنسىپلىرىغا ھەمدە رايونىمىزنىڭ تىنچلىق ۋە مۇقىملىقىغا تۆھپە قوشىدىغان شەكىلدە راۋاجلاندۇرۇشقا تىرىشىمىز» دېگەنلەرنى قەيت قىلدى.

ئۇ يەنە: «مەن تۈركىيەنىڭ سۈرىيە خەلقىنىڭ ئەڭ قىيىن كۈنلىرىدە بەرگەن ياردىمى ۋە قوللىشىغا يېقىندىن گۇۋاھ بولدۇم. بۇنىڭدىن كېيىنمۇ تۈركىيە دۆلىتى سۈپىتىدە، خەلقلىرىمىزنىڭ پاراۋانلىقى، تىنچلىقى ۋە ئورتاق كەلگۈسىنى بىرلىكتە شەكىللەندۈرۈش ئۈچۈن سۈرىيەلىك قېرىنداشلىرىمىز بىلەن بىرلىكتە تىرىشچانلىق كۆرسىتىشنى داۋاملاشتۇرىمىز» دېگەنلەرنى سۆزلىرىگە ئىلاۋە قىلدى.

ئامېرىكانىڭ تۈركىيەدە تۇرۇشلۇق باش ئەلچىسى ۋە سۈرىيە ئالاھىدە ۋەكىلى توم بارراك يېڭى تەيىنلەنگەن باش ئەلچى يىلمازنىڭ سۈرىيەدىكى «تارىخىي» ۋەزىپىسىنىڭ باشلىنىشى مۇناسىۋىتى بىلەن، ئۇنىڭ بىلەن يېقىندىن ھەمكارلىشىشنى ئۈمىد قىلىدىغانلىقىنى بىلدۈردى.