ئىسرائىلىيە تاشقى ئىشلار مىنىستىرلىقى پائالىيەتچىلەردىن بەزىلىرىنىڭ بىر نەچچە سائەت ئىچىدە ئايرودۇرۇمدىن ئايرىلىشىنىڭ كۈتۈلۈۋاتقانلىقىنى بىلدۈردى.
ئىسرائىلىيە تاشقى ئىشلار مىنىستىرلىقى، غەززەگە ئىنسانپەرۋەرلىك ياردەم بۇيۇملىرىنى ئېلىپ ماڭغان «مادلېن» ناملىق پاراخوتنى توختاتقاندىن كېيىن، پاراخوتتىكى پائالىيەتچىلەرنىڭ دۆلەتتىن قوغلاپ چىقىرىلىش ئۈچۈن ئايرودۇرۇمغا ئېلىپ كېلىنگەنلىكىنى ئېلان قىلدى.
مىنىستىرلىق سەيشەنبە كۈنى ئەتىگەندە ئېلان قىلغان باياناتىدا، قورشاۋ ئاستىدىكى غەززەگە ھاياتىي ئەھمىيەتكە ئىگە، مۇھىم ئىنسانپەرۋەرلىك ياردەم بۇيۇملىرىنى توشۇۋاتقان «مادلېن» پاراخوتىدىكى پىدائىيلارنىڭ ئىسرائىلىيەدىن ئايرىلىپ ئۆز دۆلەتلىرىگە قايتىش ئۈچۈن بېن گۇرىئون ئايرودۇرۇمىغا يېتىپ كەلگەنلىكىنى بىلدۈردى.
باياناتتا، بەزى پىدائىيلارنىڭ يېقىنقى بىر نەچچە سائەت ئىچىدە دۆلەتتىن ئايرىلىشىنىڭ كۈتۈلىدىغانلىقى ئىپادىلەندى. «دۆلەتتىن قوغلاپ چىقىرىش ھۆججىتىگە ئىمزا قويۇشنى ۋە ئىسرائىلىيەدىن ئايرىلىشنى رەت قىلغانلار، ئىسرائىلىيە قانۇنلىرىغا ئاساسەن ئۇلارنىڭ دۆلەتتىن قوغلاپ چىقىرىلىشىنى تەستىقلاش ئۈچۈن ئەدلىيە ئورگىنىغا ئېلىپ بېرىلىدۇ» دېيىلدى.
مىنىستىرلىق يەنە يولۇچىلار كەلگەن دۆلەتلەرنىڭ كونسۇللىرىنىڭ ئايرودۇرۇمدا ئۇلار بىلەن كۆرۈشكەنلىكىنى بىلدۈردى.
ئىسرائىلىيە قىسىملىرى دۈشەنبە كۈنى ئەتىگەندە پاراخوتنى تۇتۇۋېلىپ، قورشاۋ ئاستىدىكى رايونغا ھالقىلىق ياردەملەرنى يەتكۈزۈش ۋەزىپىسىگە توسقۇنلۇق قىلغان ئىدى.
ياردەم پاراخوتىدا ياۋروپا پارلامېنتىنىڭ ئەزاسى فرانسىيە پۇقراسى پەلەستىنلىك رىما ھەسەننىمۇ ئۆز ئىچىگە ئالغان 12 كىشىلىك بىر گۇرۇپپا بار ئىدى.
ياردەم بېرىش ۋەزىپىسىگە جەمئىي 12 كىشى قاتناشقان بولۇپ، ئۇلارنىڭ 11 ى پائالىيەتچى، بىرسى مۇخبىر ئىدى.
پاراخوتتىكى پائالىيەتچىلەر ئىچىدە گېرمانىيەدىن ياسمىن ئاجار، فرانسىيەدىن باپتىست ئاندرې، پاسكال ماۋرىئېراس، يانىس مەھامدى ۋە رېۋا ۋىئارد، بىرازىلىيەدىن تىياگو ئاۋىلا، تۈركىيەدىن شۇئەيب ئوردۇ، ئىسپانىيەدىن سېرگىيو تورىبىيو، گوللاندىيەدىن ماركو ۋان رېننېس ۋە ئەلجەزىرە تېلېۋىزىيەسىدىن فرانسىيەلىك مۇخبىر ئۆمەر فاياد بار ئىدى.
ئامېرىكا پىرېزىدېنتى دونالد ترامپ بۇ ۋەقە ھەققىدە: «مېنىڭچە ئىسرائىلىيەنىڭ گرېتا تۇنبېرگنى تۇتقۇن قىلىشتىن ئىلگىرى يېتەرلىك مەسىلىسى بار ئىدى» دېدى.
