ئەنقەرە (ئانادولۇ ئاگېنتلىقى) — جۇمھۇر رەئىس رەجەپ تاييىپ ئەردوغان: «رايونىمىزنىڭ ئەمدى ئۇرۇش، تېررورلۇق ۋە توقۇنۇشلار بىلەن ئەمەس، بەلكى تەرەققىيات، پاراۋانلىق، خاتىرجەملىك ۋە مۇقىملىق بىلەن تىلغا ئېلىنىشى ئۈچۈن تىرىشچانلىق كۆرسىتىۋاتىمىز» دېدى.
جۇمھۇر رەئىس ئەردوغان جۇمھۇر رەئىسلىك مەھكىمىسى سارىيىدا، پايتەخت ئەنقەرەدە دۆلەت ئىشلىرى زىيارىتىدە بولۇۋاتقان ئىراق باش مىنىستىرى ئەلى ئەززەيدى بىلەن ئايرىم ۋە ھەيئەتلەر ئارا سۆھبەت ئۆتكۈزگەندىن كېيىن، ھەرقايسى ساھەلەردىكى كېلىشىملەرنى ئىمزالاش مۇراسىمىغا قاتناشتى.
ئارقىدىن ئۆتكۈزۈلگەن قوشما مۇخبىرلارنى كۈتۈۋېلىش يىغىنىدا سۆز قىلغان ئەردوغان، ئەززەيدىنىڭ رايون ئىنتايىن قىيىن ئۆتكەلنى بېسىپ ئۆتۈۋاتقان بىر مەزگىلدە زىمىمسىگە يۈكلەنگەن ۋەزىپىسىنى يەنە بىر قېتىم تەبرىكلىدى.
قېرىنداشلىق ئاساسىدا مۇناسىۋەتلەرنى تەپسىلىي كۆزدىن كەچۈرگەنلىكلىرىنى تىلغا ئالغان ئەردوغان: «ئىران، سۈرىيە ۋە پەلەستىننى ئۆز ئىچىگە ئالغان رايونلۇق ئۆزگىرىشلەر توغرىسىدا ئۆزئارا پىكىر ئالماشتۇردۇق» دېدى.
ئەردوغان تۈركىيەنىڭ ئەتراپىدىكى ئۇرۇش مۇھىتىنىڭ تەسىرى بىلەن سۆھبەتلەردە خەۋپسىزلىك، تېررورىزمغا قارشى كۈرەش، ئېنېرگىيە ۋە قاتناش مەسىلىلىرىنىڭ مۇھىم ئورۇننى ئىگىلىگەنلىكىنى تەكىتلەپ مۇنداق دېدى:
«تولىمۇ ئەپسۇسكى، قوشنىمىز ئىراق بۇ ئۇرۇش ۋە مۇقىمسىزلىق مۇھىتىنىڭ تەسىرىگە ئەڭ كۆپ ئۇچرىغان دۆلەتلەرنىڭ بىرىدۇر. بىز باشتىن-ئاخىر ئىراقنىڭ خاتىرجەملىكى ۋە مۇقىملىقىنى دۆلىتىمىزنىڭ ئەھۋالىدىن ئايرىپ قارىمىدۇق، قارىمايمىز. رايونىمىزنىڭ ئەمدى ئۇرۇش، تېررورلۇق ۋە توقۇنۇشلار بىلەن ئەمەس، بەلكى تەرەققىيات، پاراۋانلىق، خاتىرجەملىك ۋە مۇقىملىق بىلەن تىلغا ئېلىنىشى ئۈچۈن تىرىشچانلىق كۆرسىتىۋاتىمىز. تېررورلۇقتىن خالىي تۈركىيە مۇساپىمىزنىڭ ۋە تېررورلۇقتىن خالىي رايون تەسەۋۋۇرىمىزنىڭ رېئاللىققا ئايلىنىشى ئۈچۈن ئىراقتىكى قېرىنداشلىرىمىز بىلەن زىچ ھەمكارلىق ئورناتماقتىمىز.»
ئەردوغان British Petrol شىركىتى تىجارەت قىلىۋاتقان كەركۈك ئىشلەپچىقىرىش مەيدانىدا تۈركىيە نېفىت شىركىتىگە پايچى بولۇش ھوقۇقى بېرىلگەنلىكىنى تەكىتلەپ: «ئىراق بىلەن بولغان ۋە ئالدىنقى يىلى 17 مىليارد دوللارغا يېقىنلاشقان سودا سوممىمىزنى تېخىمۇ يۇقىرى سەۋىيەگە يەتكۈزۈشنى خالايمىز» دېدى.
«ئىراقتىن كېلىدىغان 1 مىليون ۋارىل نېفىت ئېھتىياجىمىزنى قامدايدۇ»
ئىراق باش مىنىستىرى ئەلى ئەززەيدىنىڭ سۆزىدە «تۈركىيەگە كۈنىگە 1 مىليون ۋارىل نېفىت بېرەلەيمىز» دېگەنلىكىنى تىلغا ئالغان جۇمھۇر رەئىس ئەردوغان: «باشقا يەرگە مۇھتاج بولماڭلار دەۋاتىدۇ. 1 مىليون ۋارىل. دەرھال قوشنىمىز ئىراقتىن خۇدا خالىسا 1 مىليون ۋارىل نېفىتنى بۇ يەرگە يۆتكىسەك، ئېھتىياجىمىزنى قامدايدۇ» دېدى.
