بىخەتەرلىك سەۋەبىدىن ھاۋا بوشلۇقىنى تاقاش ئاخىرلاشقاندىن كېيىن، ئىراندا ئۇچۇشلار قايتىدىن باشلاندى. رايون خاراكتېرلىك جىددىيچىلىك ۋە خەلقئارالىق تەكشۈرۈشلەر داۋاملىشىۋاتقان بىر پەيتتە، ئايروپىلانلار تېھران سامالىرىغا قايتىپ كەلدى.
كۆپىنچە ئۇچۇشلارنى ۋاقىتلىق توختىتىش مۇساپىسى ئاخىرلاشقاندىن كېيىن، ئىران ھاۋا بوشلۇقى قاتناشقا ئېچىلدى. ئۇچۇشلارنى كۆزىتىش سانلىق مەلۇماتلىرى ئايروپىلانلارنىڭ تېھران يۆنىلىشىگە قاراپ ئىلگىرىلەۋاتقانلىقىنى كۆرسەتمەكتە.
توردا ئۇچۇشلارنى كۆزىتىش ئورگىنى FlightRadar24 پەيشەنبە كۈنى ھاۋا ۋەزىپىلىرى ئۇقتۇرۇشى (NOTAM) بىلەن ئىران ھاۋا بوشلۇقىنى چەكلىگەن ئۇقتۇرۇشنىڭ مۇددىتى توشقانلىقىنى دەلىللىدى ۋە كۆپ ساندىكى ئايروپىلاننىڭ دۆلەت ھاۋا بوشلۇقىغا كىرگەنلىكىنى ئۇقتۇردى.
ئىران بىخەتەرلىك تەدبىرلىرىنى سەۋەب كۆرسىتىپ، رۇخسەت قىلىنغان خەلقئارالىق پۇقراۋى قونۇش ۋە قوزغىلىشلار سىرتىدىكى بارلىق ئۇچۇشلارغا ھاۋا بوشلۇقىنى ۋاقىتلىق تاقىغان ئىدى.
تۇنجى ئۇقتۇرۇشتا، تېھران ھاۋا بوشلۇقىنىڭ 15-يانۋارغىچە يېپىق تۇرىدىغانلىقى، پەقەت پۇقراۋى ئاۋىياتسىيە ئىدارىسىدىن ئالدىن رۇخسەت ئالغان مەخسۇس پۇقراۋى ئۇچۇشلارغىلا رۇخسەت قىلىنىدىغانلىقى بىلدۈرۈلگەن ئىدى.
بۇ قەدەم، ئىراندا ھاكىمىيەتكە قارشى نامايىشلار ۋە كۈچەيگەن خەلقئارالىق تەكشۈرۈشلەرنىمۇ ئۆز ئىچىگە ئالغان رايون خاراكتېرلىك ۋە ئىچكى جىددىيچىلىكلەر كۈچەيگەن بىر مەزگىلدە بېسىلدى.
ئامېرىكا پىرېزىدېنتى دونالد ترامپ ئىراندا نامايىشچىلارنىڭ قەتل قىلىنىشىنىڭ توختىتىلغانلىقى ھەققىدە مەلۇماتقا ئېرىشكەنلىكىنى ئېيتىش بىلەن بىرگە، ۋاشىنگتوننىڭ ئۆزگىرىشلەرنى يېقىندىن كۆزىتىدىغانلىقى ھەققىدە ئاگاھلاندۇرۇش بەردى.
ترامپ كۆپ قېتىم نامايىشچىلارنى قوللايدىغانلىقىنى بىلدۈرگەن ۋە قەتل قىلىش قىلمىشلىرى يۈز بەرگەن تەقدىردە ئامېرىكانىڭ «ئىنتايىن كۈچلۈك قەدەملەرنى» باسىدىغانلىقىنى ئېيتقان ئىدى.
يەتتە دۆلەت گۇرۇھى تاشقى ئىشلار مىنىستىرلىرىمۇ نامايىشچىلارغا قارشى «قەستەن زوراۋانلىق قىلىش» نى قاتتىق ئەيىبلەپ، دائىرىلەرنى سوغۇققان بولۇشقا ۋە كىشىلىك ھوقۇققا ھۆرمەت قىلىشقا چاقىردى ھەمدە قوللىنىش ئېھتىماللىقى بولغان قوشۇمچە تەدبىرلەر ھەققىدە ئاگاھلاندۇردى.
يەنە بىر تەرەپتىن، ئىران دائىرىلىرى نامايىشلار بىلەن مۇناسىۋەتلىك قالايمىقانچىلىق ۋە تېررورلۇق ھەرىكەتلىرىنى ئامېرىكا بىلەن ئىسرائىلىيەنىڭ قوللاۋاتقانلىقىنى ئىلگىرى سۈردى؛ غەرب بولسا بۇ دەۋالارنى رەت قىلماقتا.
ئىران دائىرىلىرى رەسمىي تالاپەت رەقەملىرىنى ئاشكارىلىمىغان بولسىمۇ، كىشىلىك ھوقۇق تەشكىلاتلىرى نامايىشلارنىڭ يانۋار ئېيىنىڭ باشلىرى باشلانغاندىن بۇيان مىڭلارچە كىشىنىڭ ھاياتىدىن ئايرىلغانلىقىنى ۋە يارىلانغانلىقىنى خەۋەر قىلماقتا.
