تۈركىيە جۇمھۇرىيىتى تاشقى ئىشلار مىنىستىرى خاقان فىدان، دۆلەت مۇداپىئە مىنىستىرى ياشار گۈلەر، مىللىي ئىستىخبارات ئىدارىسى باشلىقى ئىبراھىم قالىن، سۈرىيەدىكى يېڭى ھۆكۈمەتنىڭ تاشقى ئىشلار مىنىستىرى ئەسەد ھەسەن شەيبانى، مۇداپىئە مىنىستىرى مۇرھەف ئەبۇ قەسرا ۋە ئىستىخبارات ئىدارىسى باشلىقى ئەنەس خەتتاب بىلەن پايتەخت ئەنقەرەدە ئېلىپ بارغان 3+3 فورماتىدىكى يىغىندىن كېيىن شەيبانى بىلەن قوشما مۇخبىرلارنى كۈتۈۋېلىش يىغىنى ئۆتكۈزدى.

8-دېكابىردا بەششار ئەسەد تۈزۈمىنىڭ ئاغدۇرۇلۇشىدىن كېيىن سۈرىيەدە يېڭى بىر سەھىپىنىڭ ئېچىلغانلىقىنى بىلدۈرگەن فىدان، سۈرىيەدىكى يېڭى ھۆكۈمەت ۋە خەلقئارا جەمئىيەتنىڭ بۇ پۇرسەتتىن توغرا پايدىلىنىشى كېرەكلىكىنى تەكىتلىدى.

مىنىستىر خاقان فىدان بۇ جەھەتتە سۈرىيەلىكلەرنىڭ باشلامچىلىقى ۋە ئىگىدارچىلىقىدا ھەممىنى باغرىغا باسىدىغان بىر سىياسىي جەرياننىڭ بەرپا قىلىنىشىنىڭ ناھايىتى مۇھىملىقىنى تەكىتلەپ: «سۈرىيەدىكى بارلىق دىنىي، ئېتنىك ۋە مەزھەپ گۇرۇپپىلىرىنىڭ قۇچاقلىشىش ۋاقتى كەلدى. يېڭى ھۆكۈمەتنىڭ سىغدۇرۇشچان چۈشەنچە بىلەن ھەرىكەت قىلىشى كىشىنى مەمنۇن قىلىدۇ. تۈركىيە بولۇش سۈپىتىمىز بىلەن، مىللىي دىيالوگ قۇرۇلتىيىنىڭ سۈرىيەدىكى بارلىق تەركىبىي قىسىملارنىڭ ئىرادىسىنى ئەكس ئەتتۈرۈشىگە قارىتىلغان تىرىشچانلىقلىرىنى قوللايمىز» دېدى.

بۇ تارىخىي بۇرۇلۇش نۇقتىسىدا خەلقئارا جەمئىيەتنىڭ ۋەزىپىسىنىڭ سۈرىيەگە ھەر تۈرلۈك ياردەملەرنى قىلىش ئىكەنلىكىنى ئەسكەرتكەن مىنىستىر فىدان: «سۈرىيە خەلقىنىڭ ئۆزىگە تايىنىپ تۇرۇشىغا ياردەم قىلىشىمىز كېرەك. سۈرىيەنى رىقابەت مەيدانى ئەمەس، ھەمكارلىق مەيدانى دەپ قارىشىمىز كېرەك» دېگەنلەرنى قەيت قىلدى.

ئۇ ئارىدىن 12 يىل ئۆتكەندىن كېيىن ئۆتكەن ئايدا تۈركىيەنىڭ دەمەشىق ئەلچىخانىسىنىڭ ئېچىلغانلىقىنى ئەسلىتىپ: «ھەلەب كونسۇلخانىمىز 20-يانۋار كۈنى خىزمەت باشلايدۇ. تۈرك ھاۋا يوللىرى قاتنىشىمۇ يېقىندا باشلىنىدۇ» دېدى.

ئەسەد دەۋرى سۈرىيەسىنىڭ يىللار بويى تېررورلۇق تەشكىلاتلىرىغا ماكان بولغانلىقىنى ۋە تېررورلۇق ئېكسپورت قىلغانلىقىنى قەيت قىلغان فىدان: «يېڭى سۈرىيەدە پ ك ك / ي پ گ ۋە دائىش قاتارلىق تېرورچى تەشكىلاتلارغا ئورۇن يوق» دېدى.

مىنىستىر فىدان ئۆزىنىڭ سۈرىيەدىكى يېڭى ھۆكۈمەتنىڭ تېررورلۇققا قارشى كۈرەش قىلىش ئىرادىسىدىن مەمنۇن ئىكەنلىكىنى بىلدۈرۈپ، بۇ جەھەتتە ئەمەلىي قەدەم بېسىشقا ئۆتۈش كېرەكلىكىنى ئوتتۇرىغا قويدى.

تۈركىيە ۋە خەلقىگە «سۈرىيەدە ئىنقىلاب» باشلانغاندىن تارتىپ دۆلىتى بىلەن بىللە بولغان تۈركىيە ۋە ئۇنىڭ خەلقىگە رەھمەت ئېيتقان ئەسەد ھەسەن شەيبانى بولسا: «سۈرىيە بىلەن تۈركىيە يېڭى بىر تارىخ يازدى» دېدى.

ئۇ بۇنىڭ قېرىنداشلىق ئاساسىغا قۇرۇلغان بىر تارىخ ئىكەنلىكىنى قەيت قىلىپ، بۇ قېرىنداشلىقنىڭ رايوندا مۇقىملىق ۋە بىخەتەرلىكنى ئىشقا ئاشۇرۇش ئۈچۈن قۇرۇلغانلىقىنى تەكىتلىدى.

تۈركىيە بىلەن سۈرىيە مۇناسىۋەتلىرىنىڭ ناھايىتى يېقىن كەلگۈسىدە «يېڭى ئۇپۇقلارغا قاراپ» ھەر خىل ساھەلەردە تېز تەرەققىي قىلىدىغانلىقىنى ئېيتقان شەيبانى: «يېڭى ھۆكۈمەت سۈرىيە زېمىنىنىڭ تۈركىيە ۋە تۈرك خەلقىگە قارشى تەھدىت بولۇشتىن چىقىرىلىشى كېرەكلىكىگە ئىشىنىدۇ» دېگەنلەرنى سۆزلىرىگە ئىلاۋە قىلدى.