پەلەستىن رەسمىي ئاخبارات ئاگېنتلىقى ۋافانىڭ خەۋەر قىلىشىچە، ئونلىغان ئىسرائىلىيەلىك قانۇنسىز كۆچمەنلەر ئىسرائىلىيە دۆلەت خەۋپسىزلىك كۈچلىرىنىڭ قوغدىشى ئاستىدا، ئىشغالىيەت ئاستىدىكى شەرقىي قۇددۇسقا جايلاشقان مەسجىدى ئەقسا قورۇسىغا باستۇرۇپ كىرگەن.
ۋافانىڭ يەرلىك مەنبەلەرگە ئاساسلىنىپ خەۋەر قىلىشىچە، قانۇنسىز كۆچمەنلەر پەيشەنبە كۈنى ئەتىگەندە ئىسرائىلىيە دۆلەت خەۋپسىزلىك كۈچلىرىنىڭ قوغدىشى ئاستىدا مەسجىدى ئەقسانىڭ ھويلىسىغا بېسىپ كىرىپ، ئوچۇق-ئاشكارا ھالدا تالمۇد دىنىي مۇراسىملىرىنى ئۆتكۈزگەن.
مەسجىدى ئەقسا مۇسۇلمانلار ئۈچۈن دۇنيادىكى ئۈچىنچى ئەڭ مۇقەددەس جاي ھېسابلىنىدۇ. يەھۇدىيلار بۇ رايوننى «ھەيكەل ئېگىزلىكى» دەپ ئاتايدۇ ۋە بۇ يەرنىڭ قەدىمكى دەۋردە ئىككى يەھۇدىي ئىبادەتخانىسى جايلاشقان جاي ئىكەنلىكىنى ئىلگىرى سۈرىدۇ.
ئىسرائىلىيە ساقچىلىرى 2003-يىلىدىن بۇيان، جۈمە ۋە شەنبە كۈنلىرىدىن باشقا كۈنلەردە قانۇنسىز كۆچمەنلەرنىڭ مەسجىدى ئەقسا قورۇسىغا كىرىشىگە رۇخسەت قىلىپ كەلمەكتە.
پەلەستىن فوندى جەمئىيەتلەر ۋە دىنىي ئىشلار مىنىستىرلىقىنىڭ ئىستاتىستىكىلىق مەلۇماتلىرىغا ئاساسلانغاندا، ئاپرېل ئېيىدا ئىسرائىلىيەلىك قانۇنسىز كۆچمەنلەر مەسجىدى ئەقساغا ئۇدا 30 قېتىم باسقۇن قىلغان.
پەلەستىنلىكلەر ئىسرائىلىيەنىڭ نەچچە ئون يىلدىن بۇيان مەسجىدى ئەقسانىمۇ ئۆز ئىچىگە ئالغان ئىشغالىيەت ئاستىدىكى شەرقىي قۇددۇسنى يەھۇدىيلاشتۇرۇش پىلانىنى ئەۋج ئالدۇرۇۋاتقانلىقىنى، شەھەرنىڭ پەلەستىنلىك ۋە ئىسلامىي كىملىكىنى يوقىتىشقا ئۇرۇنۇۋاتقانلىقىنى بىلدۈرمەكتە.
پەلەستىنلىكلەر ئىسرائىلىيەنىڭ 1967-يىلىدىكى ئىشغالىيىتىنى ۋە 1980-يىلىدىكى قانۇنسىز ھالدا بېسىۋېلىشىنى ئېتىراپ قىلمايدىغان خەلقئارالىق قارارلارغا ئاساسەن، شەرقىي قۇددۇسنى كەلگۈسىدە قۇرۇلىدىغان دۆلىتىنىڭ پايتەختى دەپ قارىماقتا.
