لىۋاننىڭ جەنۇبىغا جايلاشقان ئىشغال ئاستىدىكى دەير سېرىيان (Deyr Seryan) يېزىسىدا، 19-ئاپرېل (2026) كۈنى بىر ئىسرائىلىيە ئەسكىرىنىڭ ئەيسا پەيغەمبەرنىڭ سىمۋولى بولغان ھەيكەلنى چېقىۋەتكەنلىكىنىڭ تالاش-تارتىشى تېخى بېسىلماي تۇرۇپ، ئىسرائىلىيە خىرىستىيانلارغا قاراتقان يېڭى ئۆچمەنلىك جىنايىتى بىلەن يەنە كۈنتەرتىپكە كەلدى.

«ئىسرائىلىيە ۋاقتى گېزىتى» (The Times of Israel) نىڭ خەۋەر قىلىشىچە، 36 ياشلىق بىر ئەر ئىشغال ئاستىدىكى شەرقىي قۇددۇستا بىر راھىبەگە ھۇجۇم قىلغان.

قۇددۇس فىرانسىيە ئىنجىل ۋە ئارخېئولوگىيە مەكتىپىدە ۋەزىپە ئۆتەيدىغان راھىبە، ھۇجۇم نەتىجىسىدە بېشىدىن يارىلاندى.

مەكتەپ مۇدىرى ئولىۋىئېر پوكۈيلون (Olivier Poquillon)  ئېكس (X) ئادرېسىدا بايانات ئېلان قىلىپ، ھۇجۇمنى ئەڭ كۈچلۈك شەكىلدە ئەيىبلىدى ۋە ئىسرائىلىيە دائىرىلىرىدىن دەرھال ھەرىكەتكە ئۆتۈشنى تەلەپ قىلدى.

ئىسىرائىلىيە ساقچى تەرەپ ھۇجۇمچىنى نازارەتكە ئالغانلىقىنى ئېلان قىلدى.

ئىسرائىلىيە تاشقى ئىشلار مىنىستىرلىقىنىڭ باياناتى

ئىسرائىلىيە تاشقى ئىشلار مىنىستىرلىقىنىڭ باياناتىدا، راھىبەگە قىلىنغان ھۇجۇمنىڭ ئىنتايىن ئەستايىدىل

بىر تەرەپ قىلىنىۋاتقانلىقى ۋە ۋەقە ئۈستىدە تەكشۈرۈش باشلانغانلىقى،  گۇماندارنىڭ نازارەت ئاستىدا ئىكەنلىكى ئەسكەرتىلدى.

باياناتتا، «بۇ پەسكەش ھۇجۇمنى قاتتىق ئەيىبلەيمىز» دېيىلگەن بولۇپ، ھۇجۇمنىڭ بىرگە ياشاش ۋە دىنىي ئەركىنلىك قىممەت قاراشلىرىغا زىت ئىكەنلىكى بىلدۈرۈلدى.

 باياناتتا يەنە، يەرگە يىقىتىلىپ جىسمانىي ھۇجۇمغا ئۇچرىغان راھىبە ۋە قۇددۇستىكى لاتىن پاترىكخانىسىغا ھېسداشلىق «ھەمكارلىق» تۇيغۇسى ئىپادىلەندى.

ئىسرائىلىيەنىڭ ئىشغالىيىتى ۋە ھۇجۇملىرى ئاستىدىكى جايلاردا خىرىستىيان جامائىتىمۇ نىشانغا ئېلىنماقتا. ئىسرائىلىيە ئىرقىي قىرغىنچىلىق يۈرگۈزۈۋاتقان غەززە رايونى، ئىشغال ئاستىدىكى غەربىي قىرغاق، شەرقىي قۇددۇس ۋە لىۋاننىڭ جەنۇبىدا ياشايدىغان خىرىستىيان جامائىتى، ئىسرائىلىيە ھۆكۈمىتى ۋە ئاشقۇن ئوڭچىل گۇرۇپپىلارنىڭ جىسمانىي ھۇجۇمى، مال-مۈلكىگە زىيان يەتكۈزۈش، ھاقارەتلەپ تۈكۈرۈش ۋە مۇقەددەس جايلارنى ئوت قويۇپ كۆيدۈرۈشكە ئۇرۇنۇش قىلمىشلىرىغا دۇچ كەلمەكتە.

لىۋاننىڭ جەنۇبىدىكى دەير سېيران يېزىسىدا 19-ئاپرېل كۈنى، بىر ئىسرائىلىيە ئەسكىرىنىڭ ئەيسا پەيغەمبەرنىڭ سىمۋوللۇق ھەيكىلىنى بازغان بىلەن چېقىۋاتقان سۈرىتى ئىجتىمائىي تاراتقۇلاردا تارقالغان ئىدى. ئىسرائىلىيە ئارمىيەسى سۈرەتنىڭ راستلىقىنى ئېتىراپ قىلىپ، تەكشۈرۈش باشلىغانلىقىنى ئېلان قىلغان. ئىسرائىلىيە ئەسكىرىنىڭ دىنىي سىمۋولغا قىلغان بۇ ھۇجۇمى خىرىستىيان دۇنياسىنىڭ قاتتىق نارازىلىقىنى قوزغىغان ئىدى.