مىسىر تاشقى ئىشلار مىنىستىرى بەدر ئابدۇلاتى بىلەن سومالى تاشقى ئىشلار مىنىستىرى ئەھمەد مۇئەللىم فىقى مىسىرنىڭ پايتەختى قاھىرەدە ئىككى دۆلەت مۇناسىۋەتلىرى ۋە رايون مەسىلىلىرى ھەققىدە سۆھبەتلەشتى.
ئۇچرىشىشىن كېيىن ئېلان قىلىنغان بىرلەشمە باياناتتا مۇنداق دېيىلدى:
«سومالىنىڭ مۇقىملىقى، بىرلىكى ۋە بىخەتەرلىكىنى كۈچەيتىش ئۈچۈن، 2024-يىلى 11-دېكابىر كۈنى ئېلان قىلىنغان <ئەنقەرە باياننامەسى> نىڭ پىرىنسىپلىرىغا ئەمەل قىلىنىشى كېرەك.
سومالىنىڭ مۇقىملىقىنى قوللاش مەقسىتىدە يېڭى ئافرىقا بىرلىكى ياردەم بېرىش ۋە مۇقىملىقنى قوغداش قىسمىنىڭ تەشكىل قىلىنىشى مۇھىم.»
ئېرىترېيەنىڭ 1991-يىلى ئېفىيوپىيەدىن ئايرىلىشى ۋە 1993-يىلى قانۇنىي جەھەتتىن مۇستەقىللىققا ئېرىشىشىدىن كېيىن دېڭىزغا چىقىش يولىدىن مەھرۇم قالغان ئېفىيوپىيە، ئىقتىسادىي سەۋەبلەر تۈپەيلىدىن قىزىل دېڭىزغا چىقىش مەسىلىسىنى كۈنتەرتىپتە تۇتۇپ، سومالىلاند بىلەن 1-يانۋار كۈنى بۇ ھەقتە بىر ھەمكارلىق مېموراندۇمىغا ئىمزا قويغانىدى.
مەزكۇر مېموراندۇم سومالىلاندنى ئېتىراپ قىلىش ۋەدىسىنى ئۆز ئىچىگە ئالغانلىقى سەۋەبلىك سومالى ۋە خەلقئارا جەمئىيەتنىڭ قاتتىق نارازىلىقىغا ئۇچرىغانىدى.
ئەرەب ئەللىرى ئىتتىپاقى بىلەن ئافرىقا ئەللىرى ئىتتىپاقى بۇ ھەمكارلىقنى رەت قىلىپ، قاتتىق ئەيىبلىگەنىدى.
ئېفىيوپىيە بىلەن سومالى كىرىزىسنى ھەل قىلىش ئۈچۈن تۈركىيەنىڭ مۇرەسسەچىلىكىدە سۆھبەت ئۆتكۈزگەنىدى.
