ۋاسىتىچى دۆلەتلەر سۈپىتىدە رول ئويناۋاتقان تۈركىيە، قاتار ۋە مىسىر، ئىسرائىلىيەنىڭ غەززەدە ئۈزلۈكسىز داۋاملاشتۇرۇۋاتقان دەپسەندىچىلىكلىرىگە قارىتا ئورتاق مەيدانىنى نامايان قىلدى.
مەزكۇر قوشما باياناتتا كۆرسىتىلىشىچە، بۇ ئۈچ دۆلەت ئىسرائىلىيەنىڭ غەززە رايونىدىكى قىلمىشلىرىنى، جۈملىدىن ساقلىقنى ساقلاش ئورۇنلىرى ۋە تېببىي ئۇل ئەسلىھەلەرنى زەربە ئوبيېكتى قىلىپ، ئاياللار ۋە بالىلارنى ئۆز ئىچىگە ئالغان كۆپلىگەن پۇقرالارنىڭ تالاپەتكە ئۇچرىشىغا سەۋەبچى بولغان، شۇنداقلا خەلقئارا قانۇن ۋە خەلقئارا ئىنسانپەرۋەرلىك قائىدىلىرىنى ئاياغ ئاستى قىلغان دەپسەندىچىلىكلىرىنى قاتتىق ئەيىبلىگەن ۋە لەنەتلىگەن.
باياناتتا، پەلەستىن ئىسلامىي قارشىلىق كۆرسىتىش ھەرىكىتى — ھاماس ۋە پەلەستىندىكى باشقا گۇرۇپپىلار تىنچلىق يول خەرىتىسىنى، خۇسۇسەن قورال تاشلاشقا ئائىت ماددىلارنى قوبۇل قىلغانلىقىنى ئېلان قىلغاندىن كېيىنمۇ، ئىسرائىلىيەنىڭ ھۇجۇملارنى داۋاملاشتۇرۇۋاتقانلىقىغا ئالاھىدە دىققەت تارتىلدى. ۋاسىتىچى دۆلەتلەر بۇ قىلمىشنىڭ ھاسىل قىلىنغان كېلىشىمگە ئاشكارا خىلاپلىق قىلغانلىق ھەمدە كېلىشىمنىڭ ئىككىنچى باسقۇچىنى ئەمەلگە ئاشۇرۇش تىرىشچانلىقلىرىغا بۇزغۇنچىلىق قىلغانلىق ئىكەنلىكىنى تەكىتلەپ، ئىسرائىلىيەنى خەلقئارا مەجبۇرىيەتلىرىگە رىئايە قىلىشقا ۋە ئۇرۇش توختىتىش كېلىشىمىدىكى ۋەدىلىرىنى تولۇق ئادا قىلىشقا چاقىردى.
بۇنىڭدىن سىرت، مەزكۇر ھۇجۇم ۋە دەپسەندىچىلىكلەرنىڭ جىددىيچىلىكنى پەسەيتىش تىرىشچانلىقلىرىغا ئېغىر تەھدىت ئېلىپ كېلىدىغانلىقى، غەززەدىكى پۇقرالار دۇچ كېلىۋاتقان ئىنسانىي كىرىزىسنى تېخىمۇ يامانلاشتۇرۇۋېتىدىغانلىقى توغرىسىدا ئاگاھلاندۇرۇش بېرىلدى.
ۋاسىتىچى دۆلەتلەر پۇقرالارنى، تېببىي ئاپپاراتلارنى ۋە قۇتقۇزۇش خادىملىرىنى تولۇق قوغداشقا كاپالەتلىك قىلىش، شۇنداقلا پۈتۈن غەززە رايونىغا ئىنسانپەرۋەرلىك ياردەم بۇيۇملىرى ۋە دورا-دەرمەكلەرنى ئۈزلۈكسىز يەتكۈزۈپ بېرىش ھەققىدىكى چاقىرىقىنى يەنە بىر قېتىم تەكرارلىدى.
بۇ ئۈچ دۆلەت يەنە خەلقئارا جەمئىيەتنى ئامېرىكا قوشما ئىشتاتلىرى پىرېزىدېنتى دونالد ترامپنىڭ تىنچلىق پىلانىنىڭ تولۇق ئەمەلىيلىشىشىگە كاپالەتلىك قىلىدىغان ئاساستا، ئىسرائىلىيەنى خەلقئارا قانۇن ۋە ئۇرۇش توختىتىش كېلىشىمىدىكى مەجبۇرىيەتلىرىنى ئادا قىلىشقا قىستاش ئۈچۈن مەسئۇلىيەتنى ئۈستىگە ئېلىشقا ۋە زۆرۈر بولغان بېسىملارنى ئىشلىتىشكە چاقىردى. شۇنىڭ بىلەن بىرگە، ترامپنىڭ ئىككىنچى باسقۇچلۇق يول خەرىتىسى توغرىسىدىكى ئورتاق تونۇشنى «تارىخىي كېلىشىم» دەپ ئاتىغانلىقىغا دىققەتنى تارتتى.
ئاخىرىدا، مەڭگۈلۈك ئۇرۇش توختىتىشقا ۋە ئىنسانىي ئازاب-ئوقۇبەتلەرنى ئاخىرلاشتۇرۇشقا ئاساس سالىدىغان سىجىل جىددىيچىلىكنى پەسەيتىش تىرىشچانلىقلىرىنىڭ توسالغۇغا ئۇچرىشىنىڭ قەتئىي ئالدىنى ئېلىش كېرەكلىكى يەنە بىر قېتىم تەكىتلەندى.
