Axios نىڭ خەۋىرىگە قارىغاندا، ئامېرىكا مۇئاۋىن پىرېزىدېنتى جەي دى ۋانس (JD Vance) بۇ ھەپتە ئاخىرى ئىسلامئابادتا ئۆتكۈزۈلۈشى پىلانلانغان ۋە ئىران ئىسلامىي مەسلىھەت مەجلىسىنىڭ رەئىسى مۇھەممەد باقىر قالىبافنىمۇ ئۆز ئىچىگە ئالغان ئىران ئەمەلدارلىرى بىلەن ئېلىپ بېرىلىدىغان تىنچلىق باشلىقلار يىغىنىغا قاتنىشىشى مۇمكىن.
ئامېرىكا-ئىسرائىلىيەنىڭ ئىرانغا قارشى ئۇرۇشىنى ئاخىرلاشتۇرۇش ئۈچۈن پاكىستاننىڭ ۋاسىتىچىلىك رولىنى ئۈستىگە ئېلىشنى خالىدى. بۇ ھەپتە ئاخىرى بىر باشلىقلار يىغىنىغا ساھىبخانلىق قىلىشى ۋە ئامېرىكا مۇئاۋىن پىرېزىدېنتى بىلەن ئىران ئىسلامىي مەسلىھەت مەجلىسى رەئىسىنى ئۇرۇش توختىتىش سۆھبىتى ئۈچۈن بىر يەرگە جەم قىلىشى مۇمكىنلىكى خەۋەر قىلىندى.
پاكىستان تاشقى ئىشلار مىنىستىرلىقى مەنبەلىرى دۈشەنبە كۈنى ئانادولۇ ئاگېنتلىقىغا بەرگەن باياناتىدا، ئامېرىكا ۋەكىللەر ئۆمىكىنىڭ ئېھتىماللىققا ئىگە سۆھبەتلەر ئۈچۈن «بىر ياكى ئىككى كۈن ئىچىدە» پاكىستانغا كېلىدىغانلىقىنى، ئەمما ئىراننىڭ ئىشەنچسىزلىك سەۋەبىدىن «يەنىلا تەييار ئەمەسلىكىنى» ئېيتتى.
Financial Times نىڭ سۆھبەتتىن خەۋەردار ئىككى كىشىنى مەنبە كۆرسىتىپ تارقاتقان خەۋىرىگە قارىغاندا، پاكىستان ئارمىيە باش قوماندانى ئاسىىم مۇنىر يەكشەنبە كۈنى ئامېرىكا پىرېزىدېنتى دونالد ترامپ بىلەن كۆرۈشكەن.
ئىسرائىلىيە رەسمىي مەنبەلىرى بولسا Axios خەۋەر تورىغا، ئاقساراينىڭ ئالاھىدە ۋەكىللىرى ستېۋ ۋىت كوف (Steve Witkoff) ۋە جارېد كۇشنېرغا (Jared Kushner) قوشۇمچە، مۇئاۋىن پىرېزىدېنت جەي دى ۋانسنىڭمۇ بۇ ھەپتە ئاخىرى ئىسلامئابادتا ئۆتكۈزۈلۈشى پىلانلانغان ۋە ئىران ئىسلامىي مەسلىھەت مەجلىسىنىڭ رەئىسى مۇھەممەد باقىر قالىبافنىمۇ ئۆز ئىچىگە ئالغان ئىران ئەمەلدارلىرى بىلەن ئۆتكۈزۈلىدىغان تىنچلىق باشلىقلار يىغىنىغا قاتنىشىشى مۇمكىنلىكىنى ئېيتتى.
پاكىستان باش مىنىستىرى شەھباز شەرىفمۇ ئىران پىرېزىدېنتى مەسئۇد پەزېشكىيان بىلەن كۆرۈشكەنلىكىنى ۋە ئىسلامئابادنىڭ رايونغا تىنچلىق ئېلىپ كېلىش مەسىلىسىدە ياردەم بېرىشكە ۋەدە بەرگەنلىكىنى بىلدۈردى.
شەرىف پەزېشكىيان بىلەن «پارىس قولتۇقى رايونىدىكى خەتەرلىك ۋەزىيەت» ھەققىدە سۆھبەتلەشكەنلىكىنى ۋە پاكىستاننىڭ «تىنچلىقنى ئىلگىرى سۈرۈشتە پائال رول ئويناشقا» بەل باغلىغانلىقىنى قەيت قىلدى.
ئىككى رەھبەر ئۆتكەن بىر ئاي ئىچىدە كۆپ قېتىم سۆزلەشتى. رامىزان ئېيى ۋە رامىزان ھېيتى مۇناسىۋىتى بىلەن تەبرىك تىلەكلەرنى يەتكۈزۈشتىن سىرت، ئىككى تەرەپ پاكىستاننىڭ ئامېرىكا ۋە ئىسرائىلىيە بىلەن بولغان توقۇنۇشنىڭ ئاخىرلىشىشىغا بولغان ئۈمىدىنىمۇ مۇقىملاشتۇردى.
شەرىف پەزىشكىيانغا يېڭى يىلى (نەۋرۇز) مۇناسىۋىتى بىلەن تەبرىكىنى يەتكۈزگەنلىكىنى شۇنداقلا «پارىس قولتۇقى رايونىدىكى خەتەرلىك ۋەزىيەتنى مۇزاكىرە قىلغانلىقىنى ۋە جىددىيلىكنى تۆۋەنلىتىش، سۆھبەت ۋە دىپلوماتىيەگە جىددىي ئېھتىياج بارلىقى مەسىلىسىدە بىرلىككە كەلگەنلىكىنى» ئېيتتى.
ئىراننىڭ IRNA رەسمىي خەۋەر ئاگېنتلىقىنىڭ خەۋىرىگە قارىغاندا، ئىران تاشقى ئىشلار مىنىستىرلىقى باياناتچىسى ئىسمائىل باقايى، «ئامېرىكانىڭ بەزى دوست دۆلەتلەردىن ئۇرۇشنى ئاخىرلاشتۇرۇش ئۈچۈن سۆھبەت تەلەپ قىلغانلىقىنى كۆرسىتىدىغان ئۇچۇرلارنىڭ كەلگەنلىكىنى» بىلدۈرگەن.
تۈركىيە، پاكىستان ۋە مىسىر
Axios نىڭ بىر ئامېرىكا مەنبەسىگە ئاساسلىنىپ بەرگەن خەۋىرىگە قارىغاندا، تۈركىيە، پاكىستان ۋە مىسىر ئۆتكەن ئىككى كۈن ئىچىدە ۋاشىنگتون بىلەن تېھران ئوتتۇرىسىدا ئۇچۇرلارنىڭ يەتكۈزۈلۈشىگە ياردەم بەرگەن.
Axios خەۋىرىدە، ئۈچ دۆلەتنىڭ تاشقى ئىشلار مىنىستىرلىرىنىڭ ئاقساراي ۋەكىلى ۋىت كوف ۋە ئىران تاشقى ئىشلار مىنىستىرى ئابباس ئاراقچى بىلەن ئايرىم-ئايرىم سۆھبەت ئېلىپ بارغانلىقى بىلدۈرۈلدى.
Axios قا سۆز قىلغان بىر مەنبە: «ۋاسىتىچىلىك داۋاملىشىۋاتىدۇ ۋە ئىلگىرىلەش قولغا كەلتۈرۈلدى. سۆھبەتلەر ئۇرۇشنى ئاخىرلاشتۇرۇش ۋە بارلىق مەسىلىلەرنى ھەل قىلىشقا مۇناسىۋەتلىك. يېقىندا جاۋابلارغا ئېرىشىشنى ئۈمىد قىلىمىز» دېدى.
پاكىستان مۇئاۋىن باش مىنىستىرى ۋە تاشقى ئىشلار مىنىستىرى ئىسھاق دار، ئىرانلىق مەنسەپدېشى ئاراقچى بىلەن كۆرۈشۈپ «يېقىنقى رايون خاراكتېرلىك ئۆزگىرىشلەر» نى مۇزاكىرە قىلدى.
دۆلەتنىڭ تاشقى ئىشلار مىنىستىرلىقىدىن ئېلان قىلىنغان باياناتتا: «(ئىككى تەرەپمۇ) رايوندا ۋە رايون سىرتىدا تىنچلىق، بىخەتەرلىك ۋە مۇقىملىقنى ئىلگىرى سۈرۈش ئۈچۈن سۆھبەت ۋە دىپلوماتىيەنىڭ مۇھىملىقىنى تەكىتلىدى. ھەر ئىككى تەرەپ تەرەققىي قىلىۋاتقان ۋەزىيەت بىلەن مۇناسىۋەتلىك يېقىن ئالاقىدە بولۇشنى پۈتۈشتى» دېيىلدى.
پاكىستان ئۆتكەن يىلدىن باشلاپ، سەئۇدى ئەرەبىستان بىلەن ئۇزۇن مۇددەت داۋاملىشىپ كېلىۋاتقان مۇداپىئە مۇناسىۋىتىنى مۇستەھكەملەيدىغان ئۆزئارا مۇداپىئە كېلىشىمىگە ئىگە. كېلىشىمدە «ھەر ئىككى دۆلەتنىڭ بىرىگە قارىتىلغان ھەر قانداق ھۇجۇمنىڭ ھەر ئىككى دۆلەتكە قىلىنغان ھۇجۇم دەپ قوبۇل قىلىنىدىغانلىقى» كۆرسىتىلگەن.
شەرىف ۋە ئارمىيە باش قوماندانى مارشال مۇنىر، بۇ ئاينىڭ بېشىدا رىيادتا ۋەلىئەھد شاھزادە مۇھەممەد بىن سالمان بىلەن كۆرۈشكەن ئىدى.
ئىسلامئاباد ئوخشاش ۋاقىتتا، ئىراننىڭ دىنىي رەھبىرى ئەلى خامەنېينىڭ ئۆلتۈرۈلۈشىنى ئەيىبلىگەن ۋە ئوغلى ھەم ئىز باسارى مۇجتەبانىڭ ۋەزىپىگە ئولتۇرۇشى مۇناسىۋىتى بىلەن تەبرىكلىگەن ئىدى.
