ئۇكرائىنا پىرېزىدېنتى ۋولودىمىر زېلېنسكىي رۇسىيەنىڭ پېرم رايونىدىكى بىر نېفىت پىششىقلاپ ئىشلەش زاۋۇتى ۋە مارىنوۋكا ھەربىي ئايرودۇرۇمىغا ھۇجۇم ئېلىپ بارغانلىقلىرىنى جاكارلىدى.
زېلېنسكىي ئاممىۋى ئورتاقلىشىش تور بېتىدە ئېلان قىلغان باياناتىدا، رۇسىيەدىكى ئوخشىمىغان نىشانلارغا قارىتا ھۇجۇملارنىڭ داۋاملىشىۋاتقانلىقىنى ئەسكەرتتى. ئۇكرائىنا چېگراسىدىن 1600 كىلومېتىردىن ئارتۇق يىراقلىقتىكى پېرم نېفىت پىششىقلاپ ئىشلەش زاۋۇتىنىڭ تۈنۈگۈن كېچە نىشان قىلىنغانلىقىنى تىلغا ئالغان زېلېنسكىي: «ۋولگوگراد رايونىدىكى مارىنوۋكا ھەربىي ئايرودۇرۇمىغا ئۇزۇن مۇساپىلىك ھاۋا ھۇجۇمى ئېلىپ بېرىلدى. قارادېڭىزدە يەنە نەتىجىلەر قولغا كەلتۈرۈلدى» دېدى.
زېلېنسكىي كراسنودار رايونىدا رۇسىيە ئارمىيەسى ئۇكرائىناغا قاراتقان ھۇجۇملىرىدا ئىشلىتىدىغان ئۇچقۇچىسىز ھاۋا ئاپپاراتلىرىنى قويۇپ بېرىدىغان ۋە ساقلايدىغان بىر نۇقتىنىڭ زەربىگە ئۇچرىغانلىقىنى قەيت قىلدى.
ئۇ يەنە يېقىنقى كۈنلەردە رۇسىيەنىڭ ئاستراخان رايونىدا، ئۇكرائىنا بىلەن ئارىلىقى تەخمىنەن 600 كىلومېتىر كېلىدىغان ئاختۇبىنسك ھەربىي ئايرودۇرۇمىغىمۇ ھۇجۇم قىلىنغانلىقىنى تەكىتلەپ، ئۇ يەردىكى بىر دانە «س - 34» تىپلىق ئۇرۇش ئايروپىلانىنىڭ زىيانغا ئۇچرىغانلىقىدىن خەۋەر تاپقانلىقلىرىنى بىلدۈردى.
