جۇمھۇر رەئىس ئەردوغان بىلەن پىرېزىدېنت ماكرون تېلېفون سۆھبىتى ئۆتكۈزدى

تۈركىيە ۋە فىرانسىيە رەھبەرلىرى تېلېفون سۆھبىتى ئۆتكۈزۈپ، غەززە، كاۋكازىيە ۋە سۈرىيەدىكى ۋەزىيەتنى، شۇنداقلا ئىككى دۆلەت ھەمكارلىقىنى كۈچەيتىش مەسىلىلىرىنى مۇزاكىرە قىلدى؛ جۇمھۇر رەئىس ئەردوغان موسكۋا بىلەن كىيېۋ ئوتتۇرىسىدا توختاپ قالغان تىنچلىق تىرىشچانلىقلىرىنى جانلاندۇرۇش ئۈچۈن، دىپلوماتىيە يولىنى قايتا ئىشقا سېلىش چاقىرىقىنى ئوتتۇرىغا قويدى.

تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر-ئالاقە ئىدارىسى جۇمھۇر رەئىس رەجەپ تاييىپ ئەردوغان بىلەن فىرانسىيە پىرېزىدېنتى ئېممانۇئېل ماكروننىڭ چارشەنبە كۈنى رۇسىيە-ئۇكرائىنا ئۇرۇشى، رايونلۇق كىرىزىسلار ۋە ئىككى تەرەپ مۇناسىۋەتلىرىنىڭ كەلگۈسى ھەققىدە تېلېفون سۆھبىتى ئۆتكۈزگەنلىكىنى ئېلان قىلدى.

ئۇچۇر-ئالاقە ئىدارىسى تۈركىيەنىڭ يەرلىك ئىجتىمائىي تاراتقۇ سۇپىسى «NSosyal» دا ئېلان قىلغان باياناتىدا، ماكروننىڭ تەلىپىگە بىنائەن ئېلىپ بېرىلغان بۇ سۆھبەتتە يەرشارىۋىي مەسىلىلەردىن سىرت، ئەنقەرە بىلەن پارىژ ئوتتۇرىسىدىكى ھەمكارلىقنىڭمۇ مۇزاكىرە قىلىنغانلىقىنى بىلدۈردى.

جۇمھۇر رەئىس ئەردوغان تۈركىيە بىلەن فىرانسىيە ئوتتۇرىسىدىكى ھەمكارلىقنى چوڭقۇرلاشتۇرۇشنىڭ «مۇھىم» ئىكەنلىكىنى تەكىتلىدى؛ شۇنداقلا ھەر ئىككى تەرەپنىڭ مۇناسىۋەتلەردە ئىلگىرىلەش ھاسىل قىلىشى ئۈچۈن ئەمەلىي قەدەملەرنى تاشلاشنى داۋاملاشتۇرۇشى كېرەكلىكىنى ئوتتۇرىغا قويدى.

ئۇكرائىنادىكى ئۇرۇشنى ئاخىرلاشتۇرۇش

جۇمھۇر رەئىس ئەردوغان رۇسىيە-ئۇكرائىنا توقۇنۇشىغا قارىتا، تۈركىيەنىڭ ئادىل ۋە ئۇزاققىچە داۋاملىشىدىغان بىر تىنچلىقنى قوللاش يولىدا «ئەڭ زور تىرىشچانلىق كۆرسىتىۋاتقانلىقى» نى، شۇنداقلا ئىستانبۇل مۇساپىسىنى قايتا جانلاندۇرۇش ئۈچۈن ئەنقەرەنىڭ ھەر ئىككى تەرەپ بىلەن بولغان دىيالوگىنى ئۈزۈلدۈرمەي داۋاملاشتۇرۇۋاتقانلىقىنى تىلغا ئالدى.

جۇمھۇر رەئىس ئەردوغان يەنە تۈركىيەنىڭ تىنچلىق ئىشىكىنى تېزرەك ئېچىش ئۈچۈن «قولىدىن كەلگەن ھەممىنى قىلىشقا تەييار ئىكەنلىكى»نى بىلدۈردى.

مۇقىم تىنچلىققا ئېرىشىشتە دىپلوماتىيە يوللىرىدىن ئەڭ ئۈنۈملۈك پايدىلىنىش كېرەكلىكىنى تەكىتلىگەن ئەردوغان، دۇنيا تىنچلىقىغا خەۋپ يەتكۈزىدىغان قەدەملەردىن يىراق تۇرۇشنىڭ تىنچلىق تىرىشچانلىقلىرىغا پايدا ئېلىپ كېلىدىغانلىقىنىمۇ سۆزلىرىگە ئىلاۋە قىلدى.

ئىككى رەھبەر يەنە كاۋكازىيە، غەززە ۋە سۈرىيەدىكى ئۆزگىرىشلەر ھەققىدىمۇ پىكىر ئالماشتۇردى.