ئەرەب بىرلەشمە ئارمىيەسىنىڭ باياناتچىسى، بىرىگادا گېنېرالى تۇركى ئەلمالىكى ««X سۇپىسىدا بايانات ئېلان قىلىپ، سەئۇدى ئەرەبىستان خان جەمەتى ھاۋا مۇداپىئە قىسىملىرىنىڭ تۈنۈگۈن شۇ يەر ۋاقتى سائەت 18:50 ئەتراپىدا، ھۇسىيلار تەرىپىدىن قويۇپ بېرىلگەن بىر ئۇچقۇچىسىز ھاۋا ئاپپاراتىنى مەككەدىكى چەكلەنگەن ھاۋا بوشلۇقىغا كىرىشتىن بۇرۇنلا بايقاپ، مەككە شەھىرىنىڭ جەنۇبىدا پاچاقلاپ تاشلىغانلىقىنى بىلدۈردى.

بىرىگادا گېنېرالى مالىكى سۆزىنى داۋاملاشتۇرۇپ: «بۇ دۈشمەنلەرچە ۋە تېررورلۇق قىلمىشى 2017-يىلى 27-ئىيۇلدىكى باللىستىك باشقۇرۇلىدىغان بومبا ھۇجۇمىدىن كېيىنكى، مەككە مۇكەررەمەنى زەربە ئوبيېكتى قىلغان ئىككىنچى قېتىملىق ئۇرۇنۇشتۇر. ۋەھىي نازىل بولغان، پەيغەمبەرلىك ماكانى بولغان شۇنداقلا دۇنيانىڭ ھەرقايسى جايلىرىدىكى مىليونلارچە مۇسۇلمانلارنىڭ سۆيگۈسىگە نائىل بولغان بۇ مۇقەددەس تۇپراقنى زەربە ئوبيېكتى قىلىشقا ئۇرۇنۇش نومۇسسىزلارچە بىر قىلمىشتۇر. مىليونلىغان مۇسۇلمانلارنىڭ ھېسسىياتىنى قەستەن غىدىقلاشنى مەقسەت قىلغان بۇ ھەرىكەت، تېررورچى ھۇسىيلارنىڭ قارا تارىخىدا يېڭى بىر داغ بولۇپ قالىدۇ.» دېگەنلەرنى قەيت قىلدى.

ئۇ ھەج ۋە ئۆمرە زىيارەتچىلىرىنىڭ بىخەتەرلىكىنىڭ «قىزىل سىزىق» ئىكەنلىكىنى ئالاھىدە تەكىتلەپ، بىرلەشمە ئارمىيە قوماندانلىق ئىشتابىنىڭ ھۇسىيلارنىڭ بۇ قىلمىشلىرىغا قارشى زۆرۈر ھەم چەكلەش كۈچىگە ئىگە بارلىق تەدبىرلەرنى ئېلىشتا ئىككىلەنمەيدىغانلىقىنى سۆزلىرىگە ئىلاۋە قىلدى. شۇنىڭ بىلەن بىرگە، ھۇسىيلار تۈنۈگۈن مەككەنى ئاساس قىلغان مۇقەددەس جايلارنىڭ يەمەندىن كەلگەن بىر تەھدىتنىڭ نىشانى بولغانلىقىغا ئائىت دەۋالارنى رەت قىلغانىدى.