سۈرىيەنىڭ دۆلەت ئىلكىدىكى «سانا» خەۋەر ئاگېنتلىقىنىڭ ئۇچۇرىغا ئاساسلانغاندا، سۈرىيە تاشقى ئىشلار مىنىستىرلىقى ئىسرائىلىيەنىڭ جەنۇبتىكى دەرئا ۋىلايىتىگە قىلغان توپچى ھۇجۇمىنى ئەيىبلەپ، ھۇجۇمنىڭ «ئېغىر ئىنسان ۋە ماددىي تالاپەتلەرنى» كەلتۈرۈپ چىقارغانلىقىنى بىلدۈرگەن.

بۇ بومباردىمان ئىسرائىلىيە ئارمىيەسىنىڭ سۈرىيەدىن ئىسرائىلىيە ئىشغالىيىتى ئاستىدىكى گولان ئېگىزلىكىگە قارىتىپ ئىككى پاي راكېتاميوت ئوقى ئېتىلغانلىقى ھەققىدىكى دەۋاسىدىن كېيىن يۈز بەرگەن. سۈرىيە تاشقى ئىشلار مىنىستىرلىقى بۇ دەۋانى «دەلىللەنمىگەن» دەپ ئاتىغان.

«سانا»نىڭ خەۋىرىگە قارىغاندا، سەيشەنبە كۈنى كەچتە ئىسرائىلىيە توپچى قىسىملىرى دەرئانىڭ غەربىدىكى يەرمۇك ئويمانلىقىغا ھۇجۇم قىلغان. ئاگېنتلىق ھۇجۇمدا ئۆلگەنلەر سانىنى تىلغا ئالمىغان بولسىمۇ، لېكىن زىياننىڭ ئېغىر ئىكەنلىكىنى قەيت قىلغان.

ئىسرائىلىيەنىڭ 13-قانىلى، راكېتامىيوت ئېتىلغانلىقى ھەققىدىكى دەۋادىن كېيىن ئىشغالىيەت ئاستىدىكى گولان ئېگىزلىكىدە ھاۋا ھۇجۇمىدىن ئاگاھلاندۇرۇش سىگنالىنىڭ ياڭرىغانلىقىنى جەزملەشتۈرگەن بولسىمۇ، ھېچقانداق ئادەم يارىلىنىش ياكى ماددىي زىيان كۆرۈلگەنلىكى توغرىسىدا مەلۇمات بەرمىگەن. ئىسرائىلىيە رادىيو-تېلېۋىزىيە ئىدارىسى (KAN) بولسا، ئوق-دورانىڭ بوش يەرلەرگە چۈشكەنلىكىنى ۋە ئۇلارنىڭ كېلىش مەنبەسىنىڭ تېخىچە ئېنىقسىز ئىكەنلىكىنى بىلدۈرگەن.

ئىسرائىلىيە ئارمىيەسى ئېلان قىلغان قىسقىغىنە باياناتتا، توپچى قىسىملىرىنىڭ «ئىسرائىلىيە زېمىنىغا قارىتىپ ئوق چىقىرىلغاندىن كېيىن سۈرىيەنىڭ جەنۇبىغا زەربە بەرگەنلىكىنى ئېيتقان. دەمەشق بۇ ئەيىبلەشلەرگە تېخى جاۋاب قايتۇرمىغان.

كۈچىيىۋاتقان ئىسرائىلىيە ھۇجۇملىرى

ئىسرائىلىيەنىڭ سۈرىيەگە قاراتقان ھۇجۇملىرى، سۈرىيە بەئس ھاكىمىيىتىنىڭ سابىق رەھبىرى بەششار ئەسەدنىڭ 2024-يىلىنىڭ ئاخىرلىرىدا ھاكىمىيەتتىن چۈشۈرۈلۈشىدىن كېيىن كۈچىيىشكە باشلىدى.

ئىسرائىلىيە قورال-ياراغ ئىسكىلاتلىرى ۋە ھەربىي ماشىنىلارنى زەربە ئوبيېكتى قىلغان ھالدا سۈرىيەگە قاراتقان ھۇجۇملىرىنى كۈچەيتكەن بولۇپ، نۇرغۇن ۋەقەدە ئادەتتىكى پۇقرالارنىڭ جېنىدىن ئايرىلغانلىقى مەلۇم قىلىنماقتا.

ئىسرائىلىيە 1967-يىلىدىن بۇيان گولان ئېگىزلىكىنىڭ زور بىر قىسمىنى ئىشغالىيىتى ئاستىدا تۇتۇپ كەلمەكتە.

ئەسەدنىڭ ئاغدۇرۇلۇشىدىن كېيىن، ئىسرائىلىيە قىسىملىرى چېگرا بويىدىكى «تەڭپۇڭ رايون» دەپ ئاتالغان جاينى ئىشغال قىلىپ، 1974-يىلىدىكى «قوشۇنلارنى بىر-بىرىدىن ئايرىش كېلىشىمى»نى ئىناۋەتسىز دەپ جاكارلىدى.